متن نوحه های ترکی و فارسی

احوالات یعقوب کندی

یخلدی شاه لب عطشان او دمکه قتلگهه

او وقته حال وله ویردی سنگدل سپهه

باخوبلا بیربیرینین یوزلرینه چوخ حیران

اولوب وجودلری برگ بید تک لرزان

بیری دیردی بودور پادشاه یوم نشور

گورون ننوعیله پروردگاریله دانشور

آچوبدی حقه دلین چوخ خدا خدا سویلور

یقین که جدینین امتلرین دعا ایلور

بیری دیردی سولوب گللری یانوب باغی

که وار اونون اورگینده جوان اوغول داغی

گوروب او حالتی سعد اوغلی مطلبی بلدی

دونوب امامه طرف باخدی طعن ایدوب گلدی

دیدی که ای قشون اهلی مگر نه فکر ایدوسوز

حسینین امری تمام اولماموش هارا گیدوسوز

دایانمیون توکولون تیز کسون اونو باشینی

نجه که قتله یتوردوز بو چولده قارداشینی

جواب ویردیله بو امره ایتمروخ اقدام

اونون بو حالی بو دللردن آلدی صبر و قوام

بو سوزده گوردیله گرد عظیم گورسندی

باشیندا جمعی قشون گلدی یعقوب کندی

چاقوردی زاده وقاص اونی برابرینه

دیدی که دیر گلوبسن بو کربلا یرینه

بو گونده وار گنهون مورد مواخذه سن

که سن یوبانماقوا ایسته سن عوض ایده سن

دایانما دلدهکی قصدون امیریوه بلدور

او تپراق استه دوشن تشنه کامی گیت الدور

دیدی منی ایلیون سیز بو سریدن آگاه

که اول یارالیه سیز ثابت ایتموسوز نه گناه

جواب ویردی امام زمانه چون اولوب عاق

ثوابیدور اونی بو گونده تشنه الدورماق

ایشتدی تا بو سوزی سویلدی بفوریت

امامیمون ایدرم امرینه بو گون طاعت

اقام امام حسینه اگر اولوبدورعاق

بو دمده من اونی الدورماقا وارام مشتاق

بو گون بو عرصه ده قیلام اونا حیاتی حرام

گیدوب مدینه ده آلام حسینیدن انعام

امامه عاق اولانون باشینی گیدوب کسرم

کسنده باشینی فریاد یا حسین چکرم

مدینه شاهی حسیندور اولوم اونا قربان

که کیمدی دهریده اوندان صورا امام زمان

الینه خنجر آلوب یوز ویروبدی شور و شعف

یوگوردی هولیله گودال قتلگاهه طرف

یتوب باش استنه گوردی سیزیلدوری او غریب

اونون سیزیلدیسی الدن آلور قرار و شکیب

دوتوب گویه یوزینی عرض ایدور خداوندا

بو یرده دینیوی قانیمله ایلرم احیا

بو کونکه گونده وارام وصلیوه سنون شایق

گتورمدیم ولی اول بزمه تحفه لایق

اولار که ممکنیدی هر نیه گلوردی گمان

سنون یولوندا تمامین من ایلدیم قربان

سوسوز فدالری گوردوقجا منده کام آلدوم

سنون او فدیه لریندن اوزوم گیجه قالدیم

منیم بو حالتیمه رحمتیوی قیل مشمول

بو آز فدالریمی درگهونده ایله قبول

بو قتلگاهیده گوستر تفضل آثارین

منه بغشله خدا امتین گنهکارین

یولوندا تشنه لب الماقه نه هراسیم وار

تفضل ایتسن اگر بیر جه التماسیم وار

گوروب بو حالتی یعقوب اولوبدی چوخ دلگیر

دیدی که ای یارالی سنده واردی نه تقصیر

که ایلیوبله سنین قتلیوه منی مامور

یقین که ایمدی کناهوندان اولموسان معذور

دولاندوروب یوزینی حضرت اول جوانه باخوب

باخا با خا یوزینه گوزدن اشک چشمی آخوب

بویوردی من بلورم اشقیای دور زمن

سنه دیوبله منیم باشیمی بو گون کسه سن

سالوب عمر سنی آیری خیاله خوش گلدون

که یولیوبدی بو امر محاله خوشگلدون

خزان جاندی ولی نوبهار ایماندی

چیخوبدی گلشن وصلونده لاله خوشگلدون

الیوی ساخلا جوان خنجریوی قوی یرینه

تامل ایله گلوم بیر جه حاله خوشگلدون

سنس قضا قلمی یازمیوب منه قاتل

ایدوبدی قتلیمه شمره حواله خوشگلدون

الینده خنجری دوتما باخور سکینه قیزیم

که تاب ایلمه سن ایتسه ناله خوشگلدون

دوروبدی خیمه قباقینده قر خادین عورت

ترحم ایله او اهل و عیاله خوشگلدون

اولوبدی گل یوزینه کربلا غباری نقاب

سالوبدی قان بو خط و خاله هاله خوشگلدون

وفا سپهرینین اولدوزلاری ایدوبدی غروب

یتوبدی شمس امامت زواله خوشگلدون

گورونمیوبدی که یعقوب یوسف الدورسون

یتنده مصریده بزم وصاله خوشگلدون

ایشتدی بو سوزی یعقوب چکدی دلدن آه

دیدی اوزیوی نشان ویر منه سنی الله

یانقلی سوزلریله قلبیمی اریتدون سن

آدون بیان ایله آندور منه گوروم کیمسن

بویوردی حضرت اونا ای جوان غرق محن

بو گونده صبح زمانی چیخاندا ایودن سن

آنان سنه دیدی کشف ایدوم سنه او سوزی

تعجب ایلدی یعقوب شه بو یوردی اوزی

دیدی که صبح ایویندن چیخان زماندا

جوان آنان قباقیوی کسدی الینده بیر قران

دیدی قسم ویرورم بو عزیز قرآنه

اونون دالینجا اوغول گیسوی پریشانه

گوتورمرم اتگوندن قیامته کیمی ال

حلال ایلمرم ای اوغول سنی تیز گل

علاج ایله بو یانان قلبیمون حرارتینه

آپار منی قیدنده حسین زیارتینه

دیدی یارالی سینیق قلبی یاخشی شاد ایلدون

اولوم حسینیمه قربان حسینی یاد ایلدون

کسوب باشیوی عمر سعده خیر خواه اولام

حسین زیارتینین خرجینی تمام الام

بویوردی قانیمه ای نوجوان چوخ سوساما

یوبانما بوردا بیله رحم ایله غریب آناوا

داخی لزوم دگل جانب حجازه گیده

باشیمی گل کس آپار تا آنان زیارت ایده

سنه زیارت آناندان قباقجا اولدی نصیب

عزیز حضرت زهرا منم حسین غریب

ایشتدی بو سوزی یعقوب خنجری آتدی

سرشک چشمینی خونابه دله قاتدی

اورک دوگوندی جگر داغلی حولیله دوردی

 قزاردی رنگی ایکی اللی باشینه ووردی

اوزینی سالدی امام حسین قدملرینه

ویروب اجازه او دم اشک دیده ترینه

دیدی که کور اولیدی منیم گوزوم ایکاش

سزادی گر یوزیمه دیده دن آخا قانیاش

منی گذشت ایله ای من سنه بلا گردان

قصوریمی سن اوزون عفو قیل سنه قربان

تانومادیم سنی من هتک احترام ایلدیم

جسارتیله سنین قتلیوه قیام ایلدیم

مقصرم منی عفو ایله ای شه ازلی

سنه یارا وورانون من گوروم شل اولسون الی

بو قدر یاره که جسم چاک چاکه دگوب

علاوه تیر سه شعبه بو قلب پاکه دگوب

نجه بدندی بو قدری یارایه تاب ایتدی

منیمده قلبیمی بو سوز دل کباب ایتدی

سنه فدا اولا جانیم ایا شه مدنی

نقدر اولسا قصوریم گذشت ایله منی

ایا شهنشه دوران عزیز ختم رسول

منیم بو عرضیمی گل لطف اوزیله ایله قبول

خدادن استه منی ایتمسون جهاندا ذلیل

گلوب بو درگهه سالدیم اوزیمی منده دخیل

مرحوم دخیل مراغه ای

منبع کانال گنجینه گذشتگان