حضرت امام حسین (علیه السلام)

 

سلام او سینیه‌ کی اوخ دگنده اوخ دئمه‌دی

سلام او اللره کی ساربانه یوخ دئمه‌دی

 

سلام او شخصه‌که عشقینده پر اراده‌ایدی

بدنی قوملارون اوسته باشی جداده‌ ایدی

 

سلام او سالکه اسلامی سرفراز ائلدی

سلام او لبلره که خیزرانه ناز ائلدی

 

سلام او شاهده قانه بوروندی مقتلده

وئروب شعار عدالت سوروندی مقتلده

 

سلام او مسته آدین جلوهٔ‌ی حیات ائلدی

اورگینون یاراسی جبرئیلی مات ائلدی

 

ائدنده لبلری قانلی نگاری یاد حسین

ملک‌ لر عرشیده سسلندی زنده‌باد حسین

 

گنه‌ ده مرغ خیالیم رهِ ولاده گزور

قلمده دایره ی دشت کربلاده گزور

 

نه کربلا که ملک آستانینه باش ایَر

نه کربلا که تماشاسی مین بهشته دگر

 

نه کربلا غمی مردان عشق قدین اگوب

رباب و لیلیه‌ده اوردا تازیانه دگوب

 

نه کربلا که گداسینده شاه منصبی وار

گورَن بیلر نه گوزلیکده تلّ زینبی وار

 

 سید تقی سیفی اردبیلی