احوالات دیر راهب

 

فوج اسرا دیرنصارایه چکیلدی

خورشید امامت در ترسایه چکیلدی

 

اولماز بو جفایه داخی بیر ظلم مقابل

اوددوتدی آلیشدی جگرزینب خون دل

نصرانیلرین سایه سینی ویردیله منزل

سرمایه اسلام کلیسایه چکیلدی

 

دوشدی او زمان نه فلکه ولوله یکجا

آلدی الینه عرش الاهینی نصارا

زلفینی پریشان ایلدی زهره زهرا

سلطان شهیدان چون او ماوایه چکیلدی

 

چون مخزن داور اولوب اول راهبه تسلیم

سکان سماوات ایدوب اول بیرباشا تعظیم

اول راسیله دارینین ایدوب صدقیله ترمیم

کیم نوری اونون عرش معلایه چکیلدی

 

نصف شب اولوب ایستدی که ایتسون عبادت

گوردی او دم دیریده وار اوزگه علامت

قدرتله کسیک باش ایدوری آیه تلاوت

حیرتده قالوب تا که تماشایه چکیلدی

 

گوردی که اولوب ختم رسل چاک گریبان

سویلور که سنی کیم ایلدی قانیوه غلطان

سو ویردیله یا کیم باشیوی کسدیله عطشان

بو داغ حسینیم دل دنیایه چکیلدی

 

زهرا یتوشوب چکدی اورکدن ایله فریاد

آز قالدی که بیر لحظه ده دیری ایده برباد

سسلندی حسینیم اولا شمرین دلی ناشاد

بانوی حرم مجلس اعدایه چکیلدی

 

چکدیم گیجه لر زحمتیوی تا سحراولدی

دنیاده منه گوزیاشی خون جگراولدی

اهل حرمین دورنجه گوردربدر اولدی

گه دیر نصارا گهی صحرایه چکیلدی

 

من عاشق ثابت قدمم بو سوزوم استه

بو راه محبتده سورونم یوزوم استه

هر قدر جفا یتسه یری وارگوزوم استه

دردیله بو جامی هامی والایه چکیلدی

 

چکدیم باشا من شوقیله بو باده ی عشقی

سرمشق آلوب ترک ایلدیم سایر عشقی

گلدیم که گزم نیزه ده بازار دمشقی

سری بودور ایش دیر نصارایه چکیلدی

 

گرچه بو گیجه اولدوم آنا دیریده راحت

توش اولمادی والاهی منه بیرجه فراغت

چکدیله عیالیم قوری یرلرده مرارت

فریاد و نوا عالم بالایه چکیلدی

 

بو بیتی(ذلیلا) گیجه گوندوزایله ازبر

بیرظلم ایلدی دهزیده اول فرقه کافر

قانیله او چولده بویانوب طره اکبر

بیگانه الی زلف چلیپایه چکیلدی

 

مرحوم ذلیل تبریزی

منبع کانال گنجینه گذشتگان