زبانحال حضرت لیلا (س) در راه شام

 

ای ایدن لیلینی مجنون کیمی دیوانه علی

جذبه عشقی چکن کوه و بیابانه علی

 

ای سالان سلسله زلف گره گیره منی

باغلیان طره شبرنگیله زنجیره منی

سالموسان ششدرحیرتده نه تسخیره منی

قالموشام مات ولی منتی وارجانه علی

 

طاقت حسنیوه بیر بلبل شیدایم من

واله خال و خط و زلف سمن سایم من

دوشموشم چوللره مجنون کیمی لیلایم من

گیجه گوندوز گلرم نی کیمی افغانه علی

 

توکمه زلف سیهین عارض مه سیمایه

لن ترانی دیوب اوخشاتما منی موسایه

لعل جان بخشون اوغول مظهراولوب عیسایه

گرتکلم ایده سن مرده گلورجانه علی

 

یوسفین شهرت حسنی که اولوب بازاری

یوخ اونون حسنینه هیج کیمسه نین انکاری

زافیوی بیرجه کنار ایله یوزیندن باری

گورلرنسبتی یوخ یوسف کنعانه علی

 

مه جمالینده سیه زلفین عجب هاله سالوب

گوراو هاله من بیچاره نی نه حاله سالوب

بو گوگل مرغی نظرچون او خط و خاله سالوب

زلفی بیردام گوروب خالی اونا دانه علی

 

سالموسان لیلینی مجنون کیمی صحرایه علی

باغلادون زلفیمی اول زلف چلیپایه علی

سنین عشقیندی چکن دیر و کلیسایه علی

ایده سن مسکنیمی آخری ویرانه علی

 

ماه رخساره نقاب ایتمه او زلف سیهین

شام شوم اهلینی قوی گورسون او رخسارمهین

بله لریوخ بیله شهزاده سی هیچ پادشهین

گلمیوبدورعوضون عالم امکانه علی

 

توکولوب گل یوزیوه زلف سیاهین چو سحاب

ایله بل چشمه خورشیدی دوتوب پرغراب

اسه گرباد صبا ایلیه بیرکشف نقاب

گوره هرکافرو ترسا گلی ایمانه علی

 

(نوحه خوان) چنگ ووروب دامنیوه مردانه

اولوب ایللرکه عزادار شه عطشانه

بزم ماتمده گلوب صبح و مسا افغانه

حشریده قویما یانا آتش نیرانه علی

 

مرحوم خادم عطار تبریزی (نوحه خوان)

منبع کانال گنجینه گذشتگان