متن نوحه های ترکی و فارسی

در احوالات غارت خیام و

کوچ اهلبیت و خرابه شام

گینه شوریده باشیمده هوای وصلِ جانان وار

هزار افسوس گوگلومده هراسِ رنجِ هجران وار

نه وصل ایستر گوگل بیر آن ، نه بیر دم محنتِ هجران

مآلِ کارِ وصل و هجره دائر ، مین پشیمان وار

دلِ شوریده وصل ایستر ، غمِ هجرانه تن ویرمز

ز بس شوریده دور فکرینده بولمز سهو و نسیان وار

نسیان : فراموشی

بهار اولجاخ گولر گل ، بلبلِ شوریده قان آغلار

نچون گوگلنده دائم فکرتِ فصلِ زمستان وار

ز بس دل تارینه مضرابِ محنت ایلیوب تأثیر

دلِ عاشق کیمی سینمده پرده پرده افغان وار

فنا بولمز جهانی بوالهوس آبادلیخ ایستر

دوتوب ویرانه لر کُنجنده مسکن هر نه انسان وار

نهادیم غم ترابیله مخمّر اولموش ازّلدن

ضمریمده فغان ، گوگلومده سونمز نارِ سوزان وار

پری دوشموش قوشام ، آیرلمیشام اوز آشیانیمدن

خیالیمده نه سِیر باغ و نه ذوقِ گلستان وار

دوتولموش خاطریم دولموش گوزوم ابرِ بهار آسا

اودور اشکیمده دریالر کیمی آثارِ طوفان وار

منی شورِ محبّت ایلیوب بیر قالبِ بی روح

آچوب پر طایرِ طبعیم سوزیمده جسم تک جان وار

مجسّم ایلیوب مدّ نظرده مردمِ دیده

خراب آبادِ عالمده نقدری خانه ویران وار

حسین تک گورمیوب بیر خانه ویران ، خانمان برباد

تحمّل ایلیه بیر بیله ظلمه کیمده امکان وار؟

خانم یا فاطمه سن عزّتیله باغِ جنّتده

تماشای جنان قیل ، خدمتونده حور و غِلمان وار

حسینون ئولدوروبله تشنه لب ، آبِ روان اوسته

سویولّار زینبون ، کرب و بلا دشتینده تالان وار

یاناندا خیمه لر خوردا اوشاقلار قورخوب آغلالّار

نقدری بولمورم شام اهلینون ظلمینده طغیان وار

قاچار صحرالره سر پا برهنه آل ِ پیغمبر

باتار گُل پالره صحراده هر خارِ مغیلان وار

غزالانِ حرم دوشموش کمندِ ظلمِ صیّاده

گوروب شمرِ جفا پیشه گینه ظلمینده نقصان وار

گتوردی گردنِ بیماره ووردی بیر آغور زنجیر

بو ظلمه گوئیا بولدی رضای آلِ سفیان وار

سَنان و خولی و شمره دیردی ثانی ثانی

الیمده شام امیریندن منیم بو امره فرمان وار

ایدم عازم حسینون قانلی باشین گون کیمی شامه

یانینجا حُسنِ اکبر تک ایشیقلی ماهِ تابان وار

قطارِ آلِ طاهانی چکون بیراهه راهیله

یتاخ سرعتله شامه ، شأنه لایق عزّت و شان وار

منازل طیّ اولوب مقصوده یتدی فرقهء کافر

یتیشدی شامه قیدِ شمرده هر نه اسیران وار

چکیلدی جار مطلب کشف اولوب ، بازار باغلاندی

رعیّت شهردن چیخدی کناره ، جشنِ سلطان وار

سنوب آئینهء آئین و دین سنگِ جفائیله

اودور آئین باغلانمیش ، سُرور و عیشِ شایان وار

دمشق اهلی گلور دلده شماتت ، الده نای و دف

حسینه ایتماخ استهزا خیالِ قومِ عدوان وار

جداده گوردوله بیر باش ایدر کهف آیه سین ازبر

دلنده کلمهء حق ، حق سوزینده شرحِ قرآن وار

اوتورموشدی عجوزه غرفه ده گوردی بو اعجازی

بولوب رأسِ حسیندی عارضینده نورِ ایمان وار

اله سرعتله بیر سنگِ جفا آلدی او ملعونه

بولوب باشدان او باشدا ظلمِ سِیرِ سنگِ نادان وار

لسانُ اللهی سالدی نطقدن سنگِ جفائیله

بیله معلوم اولوب گوگلنده بغضِ آلِ عمران وار

گوروب بو حالی زینب ووردی چوبِ محمله باشین

دئدی بو شهرده یارب گورَسن بیر مسلمان وار؟

کسوک باشی دیسون وورمازلا ، اینجیتمزله مقتولی

اسیره احترام ایللّه چونکه رسمِ دوران وار

بیزی بو حالیله کافر گوره رحم ایلیوب آغلار

مسلمانلار جفاسی اهلِ اسلامه فراوان وار

خلاصه شامه دین شامی دولاندی شام آل الله

یتیشدی مسجدِ ویرانیه هر نه اسیران وار

نجه ویرانه؟ شکسته دل کیمی دولموش ملالیله

شکسته دللره هر گوشه سینده بیت الاحزان وار

نجه ویرانه؟ نه واردور سایبان ، نه سقف و نه دیوار

دو شاخه کُنده و زنجیر و هم ایذای دونان وار

همین ویرانه ده قالدی خواتینِ حریمِ ناز

چکوبله ذلّتِ اهلِ جفانی جاندا تا جان وار

رقیّه بیر گجه گوردی شهِ عطشانی رؤیاده

خیال ایتدی گچن گونلر کیمی عیشینده پایان وار

او شیرین دل دله گلدی ایدوب دردِ دلین اظهار

دئدی ویرانه گوگلومده بابا مین دردِ پنهان وار

نظاره اشکیمه قیلسان بولورسن گوگلومین دردین

بیانِ حالیمه اشکِ تریمده ربطِ عنوان وار

ستمگر شمر الینده تتررم بیر مرغِ بسمل تک

هراسیمدن تاپوب لرزه وجودیم ، تنده لرزان وار

قولومدا نقشهء زنجیر ، یوزده نیلی سیلی

دو شاخه یاره سی جاندا ، گوگلده داغِ هجران وار

پیاده آت دوشونده گلمیشم شامه کیمی بابا

عراقون یولّاریندا هر قدر کوه و بیابان وار

دیردی دردین آغلاردی که ناگه گوز آچوب گوردی

یاتوب توپراقلار اوسته ، نه یانیندا شاهِ عطشان وار

چاقوردی زینبِ مظلومه نی عمّه گَل ئولّم

یتوب باشه اجل بولّم دیمه عرضیمده نقصان وار

خبر ویر قاره معجرلر عزایه اولسون آماده

یغیشسون باشیمه زلفیم کیمی هر نه پریشان وار

قرانلوخدی خرابه ، روشن ایله مشعلِ آهون

ویرنده جان کناریمده گوروم شمعِ شبستان وار

قتیل العبره یوخ بیز ، غسلیمی ویر آبِ چشمیله

سووا یوخ احتیاجون سنده ، اشکِ چشمِ گریان وار

قتیل العبره یوخ بیز : ما قتیل العبره هستیم

عدودن چکمه منّت اولماسا هر گه کفن ممکن

جنازم اوسته چین چین چینِ زلفِ عنبر افشان وار

اولوب شمعِ سحر تک سوزِ غمدن عاقبت خاموش

بو نسگل زینیون قلبینده وار تا کون و امکان وار

خبر ویردی یزیده شمرِ دون شام ایچره غوغادور

دیولّه بو گجه ویرانه ده شامِ غریبان وار

امامِ عصر آچوب باشین گلوب شوره ایله آغلار

هوای شامده گویا دیرسن ابرِ باران وار

چراغِ آهی یکسر یاندیریب اولادِ پیغمبر

بو گون ویرانه ده بازاردن آرتوخ چراغان وار

نجفدن یاعلی گَل شامِ شومه قیل نظر تا گور

یزیدِ بی مروّت بارگاهنده نه دیوان وار

قویوب اوغلون حسینون رأسِ پاکین پای تختنده

الینده خیزران ، گوگلونده ایذای لب عطشان وار

باشیندا نشئهء مِی ، هم قباقدا تختهء شطرنج

اولوبدور مستِ لایعقل دلنده حرفِ هذیان وار

عیال و عترتون بوینوندا گردن بند تک زنجیر

یزیدین قیزلاریندا دسته دسته دُرّ و مرجان وار

نجه مجلس؟ او مجلسده بساطِ عیش برپادور

ایده لّر عیش و عشرت دسته دسته باده خواران وار

آدیم (خازندی) امّا یا حسین رحم ائت تهی دستم

گناهیم چوخ ، یوزوم قاره ، قباقدا نارِ نیزان وار.

مرحوم میرعبدالحسین فتاحی (خازن)

منبع مجموعه کانالهای مدح و مرثیه