متن نوحه های ترکی و فارسی

زبانحالِ حضرتِ زینب کبری (س) در کوچ از قتلگاه

سنون گُل پیکرون چون شانه شان شاندور آنام اوغلی

منیم زلفیم کیمی حالیم پریشاندور آنام اوغلی

سنون جسمون دولوب باشدان باشا تیر و سِنانیله

منیم باغریم دولوب چون غنچه ، پرده پرده قانیله

سن ئولدون قالدی زینب ناله و داد و فغانیله

منیم سندن غم و غصّم فراواندور آنام اوغلی

دگوب هر تیغ جسمونده چکوب بیر قرمزی جدول

مُذَهّب دور قزل قانیله گویا مصحفِ مُنزل

سلامتدور نه باش ، نه سینه ، نه اعضا، نه قارداش ال

قزل گل دسته سی گویا که خنداندور آنام اوغلی

حروفِ ابجدی اوسته یازیلمیش نه گوزل تنوین

دوشوبدور یر به یر، زیر و زَبَر، نیزه ایدوب تضمین

قویوب اوچ شعبه اوخ تشدید ، خنجرلر چکوب مَدّین

حروفات اوسته نقطه ، نوکِ پیکاندور آنام اوغلی

اوزون قرآن ناطق سن ، آدون قرآنه پیرایه

وروبلار بسکه کاری یاره لر بو جسمِ زیبایه

یوز اون دورت سورهء قرآنی یازوبلار آیه به آیه

قلم اوخدور ، مُرکّب قرمزی قاندور آنام اوغلی

ووروب چون هیکلِ توحید باشون نیزیه اعدا

اولوب شیرازه سیز قرآن کیمی اوراق بو اعضا

ولی هر بیر ورقدن مین ورق توحید اولور پیدا

بو صد پاره بدن ، بی جلد قرآندور آنام اوغلی

بیری گر ایستسه مرئی نشانه ذاتِ یکتادن

سراغ آلسون بو پاره پاره قانلی اعضادن

دوشر اهل اولمیان چوخ فکره بو معمّادن

و لیکن زینبه حلّی چوخ آساندور آنام اوغلی

محال ایشیدور منیم بیرده بو عالمده یوزوم گولسون

دلیم دوتمور هانی بیر اهل دل ، دردِ دلی بولسون

هانی جسمونده ابعادِ ثَلاثه؟ زینبون ئولسون

یارالی پیکرون خاکیله یکساندور آنام اوغلی

گلنده رزمگاهه ایسته دون بیر کهنه پیراهن

اونی تا سویماسون قارداش ، سویاندا رَختوی دشمن

اولا کول باشیمه نه نوعی تاب ایلیوم بس من

وجودون گون کیمی قان ایچره عریاندور آنام اوغلی

گچن ای نیزیه باشی ، قالان نعشی قوری یرده

(حسینی) نوکرون شاها دوشوب بیر چاره سیز درده

ایدنمور چاره دکترلر چکوللّر مطلبه پرده

سنون لطفون فقط بو درده درماندور آنام اوغلی

اگر چه چوخ گناهیم وار ، تاپولماز جرمیمه پایه

سیزه وار نسبتیم امّا ، منه اسموندی پیرایه

سنی زهرا آنان قیلما منی محتاج اطبّایه

بولورسن جُرمدن اوغلون پشیماندور آنام اوغلی

بو دکترلرده بو دردین علاجین بولمسون سنده؟

امامت عِلمینه باخ گور اولور بو شیوه زیبنده؟

تالاندیم تنگه گلدیم درده یوخ طاقت داخی منده

نچه آیدور انیسیم داد و افغاندور آنام اوغلی.

مرحوم حسینی سعدی زمان 

منبع مجموعه کانالهای مدح و مرثیه