حکایت بوم و عندلیب 5977
حکایت بوم و عندلیب و
گریز به غارتِ خیام و
گریز به ورود کوفه و ورود به شام
یتدی تمامه فصلِ خزان گَلدی نوبهار
عالَمده ظاهر اولدی گینه صُنعِ کردگار
گللّر آچلدی صحنِ گلستاندا رنگ رنگ
باغِ بهشته دوندی گلستان و لاله زار
توحیده هر گُلین ورقی بیر کتاب دور
اثباتِ صُنعِ صانعه آئینه دور بهار
صحن و چمن دولوبدی گُلِ مشگبوئیله
توحیدِ حقّی ، هر گل ایدور تک تک آشکار
لاله چکوبدی قلبینه داغِ غمِ فراق
بلبل وصالین ایستر ، ایدر گزلین آه و زار
بلبلده گلدن اوتری گل اوسته توکر سرشگ
گل یپراقین ایدر گوزونون یاشی ژاله وار
خلدِ برین شمیمی ویرور جان ، مشامنه
بادِ صبا دگنده ریاحینِ مشگبار
نیلوفر و بنفشه و نسرین و یاسمن
معشوقه وار عاشقی ایلولّه بیقرار
نرگس نظاره نازیله ایلور قزل گله
پُرتاب اولاندا سنبلِ تر همچو زلفِ یار
هر عندلیب مسکن ایدوب بر گل اوستونی
ایلور وفاسین انفس و آفاقه اشتهار
هجران غمین چکوب گتوروبدور اله وصال
هجرانیدن شکایت ایدور عندلیبِ زار
بو گل بو گلستان منه اما غم آرتورور
جاری اولور گوزوم یاشی چون دُرّ شاهوار
علّت بودور بهار گیدیر تز گلیر خزان
بادِ خزان اَسر سارالار لاله ، گل سولار
بو فکر پوزدی فکریمی غم دوتدی گویلومی
مرغِ خیال اولدی باشیمنان گینه کنار
بال و پر آچدی گردشه چیخدی گوگل قوشی
ناگاه بیر خرابه یره ایلدی گذار
باخدی خرابیه ، نگوروب همنشین اولوب
بیر بوم ، دلِ غمینیله بیر شاد دل هَزار
بلبل گلوبدی نطقه دیور بومه گوئیا
کِی ملّتِ طَیوره اولان شاهِ تاجدار
فصلِ بهاردور گل آچوب گلشن و چمن
قلبِ ملولی شاد ایدوری سیرِ لاله زار
چوخ گلستان و گلشن و صحرا و باغ وار
اگلشمیسن خرابه ده ، ویرانه ده نه وار؟
تا عندلیبیدن ایشیدیب وصفِ گلشنی
پژمرده حالیله دل آچوب بومِ خوش شعار
ویردی جواب سن نه بولورسن نه سرّدور
بُلسن منیم کیمی اولوسان سنده اشگبار
بوندان صورا زمانه ده نه گل نه گلستان
گلزار دینی کوفه لیلر ایتدی تار و مار
اسدی سمومِ ظلم ، حسین لاله زارینه
تاراج اولوندی فاطمه دن صبر و اختیار
پیغمبر اوغلونی سوسوز اولدوردی کوفیان
شیر خدا آچوب باشینی ایتدی آه و زار
بر طُرفه گلستانه دونوب کربلا چولی
اهلحرم نوایه گلوب عندلیب وار
کرب و بلا چولنده قزل گل کیمی تمام
خندان اولوب داغیلدیلا اجسادِ زخمدار
خرگاهِ طاهراته توکولدی سپاهِ شام
سویدی بنات فاطمه نی قومِ نابکار
اولدی امامتین گونی قانیله منکسف
آل اللهه ایشیق گونوز اولدی چو لیلِ تار
بیر خیمه کی طنابی اونون زلفِ حوریدی
یاندیردی نارِ ظلمه او خرگاهی اهلِ نار
خیمه آلیشدی یاندی ، چوله قاچدی اهلبیت
یتدی مرامه اهلجفا اولدی کامکار
شهزاده لر او ششدرِ حیرتده قالدی مات
آتلو پیاده کوفه لیلر ایتدی افتخار
آلِ عبا باشیندا قالیب کهنه بیر عبا
یغمایه گیتدی معجر زردوز و زرنگار
خوردا بویوک مُخدّره لر یوز قویوب چوله
اما نجه؟ نقابلری زلفِ تابدار
اوضاعِ شورِ حشریدی سلطانِ دین باشی
نوک‌ِ جِداده گون کیمی اولموشدی پایدار
راوی دیَرکه ببر بالا قیز گوردوم اول زمان
چخدی خیامدن اتکی اود دوتوب یانار
گورجک او حالی قلبیم اونون یاندی حالینه
بی اختیار اولدوم او احواله سوگوار
آت سالدیم آردیجا اودینی ایلیم خموش
گورجک منی ایتوردی اوزون ایلدی فرار
دوندی بیوردی گلمه سواره سویولموشام
یوخ برزادیم باشیمدا گورورسن کی یوخ خِمار
ویردیم جواب قوخما بالا دوشمه وحشته
گلدیم اودون خموش ایلیم اولما دلفکار
گورجک بو مهربانلیقی ویردی منه سلام
حالیم پوزولدی قلبیمه یوز ویردی انکسار
یندیم آتیمنان ، ایتدیم اونون آتشین خموش
گوردوم کی وار سوزی دیماقا ایلور اعتذار
ایتدیم سوال گر سوزون اولسا بیان ایله
چوخ شرمیله دئدی منه اول طفلِ گلعذار
ایسّی هوا ، یانیر سوسوزومنان دوداقلاریم
یا شیخ وار سویا دئ گوروم سنده اقتدار؟
بیر جام دولدوروب سو اونا ویردیم اولزمان
آلدی سویی خیامه طرف دوندی اشگبار
عرض ایلدیم بالا آپارورسان سویی هارا؟
بو سوزدن اولدی مضطرب اول معدنِ وقار
ویردی جواب خیمه ده وار خیردا بر باجیم
منن سوسوزدی ، آهی سالور عالمه شرار
عرض ایلدیم سن ایچ قدغن سیندی ایتمه خوف
ایندی نصیب اولار اونادا آبِ خوشگوار
گوز جامینه سو جامی کیمی دولدوروب سرشگ
دوندی منه بیوردی که ای مردِ نامدار
سویله باباما ویردیله باشین کسنده سو؟
یا تشنه کسدیلر باشینی قومِ کین شعار
ویردیم جواب ایچمدی آبِ فراتدن
قانیله ویردی سو باباوا تیغِ آبدار
توکدی سو جامینی یره ال آتدی باشینه
آغلار گوزیله توکدی یوزه زلفِ تابدار
القصّه آهوانِ حرم دامِ ظلمده
صیّادِ نابکار الینده اولوب شکار
نسوانِ هاشمیّه نی بی پرده محمله
قمچی وورا وورا ایلیوب اشقیا سوار
طیّ اولدی راه ، سرعتیله یتدی کوفیه
غم کاروانی ، کوفه ده لنگ ایلدی قطار
تقریره گلمز آلِ علینون او حالتی
آغلاردیلا کجاوه ده هم خورد و هم کبار
گه کف چالاردی کوفه نین اهلی ، گولردی گاه
گه ناسزا دیردیلر اول قومِ بی تبار
ایلر روایت ابنِ وُکیده بو مطلبی
بو غصّه حشره تک دلِ زهرانی یاندیرار
گوردوم اتکلری دولودور داشیله تمام
اطفالِ کوفه بیر آقاجا جمله داش وُورار
فکر ایلدیم ندن بو اوشاقلار آتولّا داش؟
آخر خدا دگل بو آقاج ، نخلِ میوه دار
گوردوم باخاندا بیر یارالی نازنین باشی
داره چکوبله کوفه نین اهلی مسیح وار
آنّیندا اوخ یاراسی ، یوزینده قلج یری
بی اختیار قان ویرور اولدوقجا سنگسار
بولدوم او قانلی باشدی حسین ابنِ فاطمه
آز قالدی ایلیم اوزومی غمدن انتحار
فکر ایلدیم من اوز اوزومه قویمارام قالا
گلّم گیجه آقاجدان اونی ایلرم کنار
ناگاه دگدی بیر بیرینه قانلی لبلری
گوردوم دیور منه سرِ سلطانِ تاجدار
یَابنَ وُکیده یوخدی بو سّرّه یولون سنون
اولموب تمام ، بو باشیمون چوخ بلاسی وار
عیسی تنوره گلوب ، باز دیدینه -
دِیره گرک گیدم بودی سر مشقِ روزگار
روزِ ازلده خالقیمه وعده ویرمیشم
قانلی باشیم گرکدی گوره مجلسِ قمار
حقّی گروهِ باطله هر یرده بولدورم
ارکانِ دینی ایلیم عالمده استوار
بسدور (حسینی) مطلبه ویرمه بو قدر طول
یاز محنتِ خرابه نی بَر وجهِ اختصار
یولّاندی شامه کوفه دن اولادِ بوتراب
شامه یتنده چترِ سپهری دوتوب غبار
شام اهلی پیشوازه چیخوب الده نای و چنگ
بیر ازدحام اولدی که باغلاندی رهگذار
شامه گیرنده حاملیدی افتخاریله
بیر نچّه گون کیمی باشا بیر نچّه نیزه دار
یا فاطمه گوزوندن ایراق شامِ شومده
دوشمیشدی بیر منادی قاباقجا چکردی جار
یانسون دلیم دیمم نه دیوردی بو قدر وار
شام اهلی بولدی عترتیوی روم و زنگبار
شامه گیرنده صبحیدی ، گُل یوزلی اهلِ بیت
شامه کیمی دولاندیلا هر رهگذرده خوار
چون بختِ زینب اولدی هوا تار ، وقتِ شام
ویرانیه یتیشدی اسیرانِ گلعذار
ویرانه مسکن اولدی خواتینِ عصمته
هر گوشه ده بیری یخیلوب قالدی بیقرار
هر صبح و شام ، شامده اُمّ المصائبه
ساقیّ چرخ ویردی مِی تلخِ ناگوار
رُکن الیقین ، عزّتِ دین ، فخرِ ساجدین
دربان اولوب خرابیه هم لیل و هم نهار
یابن الحسن امامِ زمان عرض ایدون نجه
اولدی او یرده جدّیوه نه ظلمِ بی شمار
ویرانیه شرف یتوب آلِ رسولدن
علّت اودور خرابه نشین اولدی بومِ زار
جهد ایله ال گوتورمه (حسینی) حسیندن
دنیا فنادی عمرلره یوخدی اعتبار
پیکِ اجل دالونجا گلور ، غفلت ایلمه
یاز شرحِ غم ، سوزون قالا دنیاده یادگار.
مرحوم حسینی سعدی زمان
منبع مجموعه کانالهای مدح و مرثیه
با سلام