زبانحال در احوالات حضرت علی اکبر (ع) 5949
زبانحال در احوالات حضرت علی اکبر (علیه السلام)
اکبریم باش ویردی ، باشه یتدی پیمانیم باجی
جان ویروب ، جان اوستیَم ایمدی چیخار جانیم باجی
قول ویرمشدیم بو چولده جان ویرم جانانیمه
اکبریم امضا قویوب ، قول چکدیروب فرمانیمه
بو جوان قانه بویاندی من بویاندیم قانیمه
روح بیر ، قالب ایکی ، بوندان آخار قانیم باجی
ظلمیله قانه باتوبدور جدّیمون آیینه سی
تیغ و خنجرله یازیلمیش صفحه صفحه سینه سی
منشیِ عمر ال چکوب ، تعطیل اولوب کابینه سی
خدمتین تصدیق ایدوب بی مثل جانانیم باجی
زلفی باشندن آخان قانیله خون آلود اولوب
پیکری تیریله ، چشمِ مستی قانیله دولوب
گُل کیمی اوراق اولوب نعشی ، یوزی گُل تک سولوب
گورسن احوالون پوزار سولموش گلستانیم باجی
گُل کیمی صدپاره گوردوم پیکرِ زیباسینی
ممکن اولمازدی گتورماق چاک چاک اعضاسینی
بیر پوزولموش گلستانین ارغوان و یاسینی
بیر عبایه یغدیلار ، حمل ایتدی اعوانیم باجی
بیله خندان گر گوره لیلا گُلِ یاسین ، یانار
اوزلوقندان چیخماسا یاخشی دوتار یاسین ، یانار
چوخ سُوَر جدّیم شبهین عترتِ یاسین یانار
یاسینی ساخلار حریمِ دیده گریانیم باجی
من باخوب بو نوجوانه یانمیشام ، دشمن گولوب
جسمدن چکدوقجا اوخ ، نه چکمیشم الله بولوب
گوز یاشیم قویمور گورم ، باخ گور نفس وار یا ئولوب؟
وار یری لیلانی مجنون ایتسه افغانیم باجی
هر گورن خال و خطین حیران قالوب نقّاشینه
بیر قلج امّا ووروب بی رحم منقذ باشینه
مه جبین منشقّ اولوب یاره یتوبدور باشینه
گوسترور شقّ القمر بو ماهِ تابانیم باجی
ویر خبر سوزِ جگردن لیلی سینه داغلاسون
اوغلونین نعشین گوروب یانسون دویونجا آغلاسین
باش آچوب زلفِ سیاهیله یاراسین باغلاسون
زخمینی من باغلیوم قالموبدی امکانیم باجی
باغریمی بو نازنین جسمه دگن اوخلار دلوب
آغلاما دیندیرمه ، دعوادن بالام یورقون گلوب
رختین آهسته سویوندور آز زماندا دینجلوب
چوخ چکوب جان اوسته زحمت تشنه قربانیم باجی
چشمِ مستیندن خجالتدور غزالِ مُلکِ چین
تل به تل قانه باتوب ، زلفِ سیاهی چین بچین
خرمنِ عشقیمده بو صحراده سنسن خوشه چین
خرمنون یاندورماسا گر آهِ سوزانیم باجی
ای (حسینی) گچدی ماضی ، توشه قیل مُستَقبَله
صرف ایله عمرون بو نحو اشعاری سال الدن اله
بیر مطوّل احتجاج ایستر بو مجمل مسئله
اکبریم باش ویردی ، باشه یتدی پیمانیم باجی.
مرحوم حسینی سعدی زمان
منبع مجموعه کانالهای مدح و مرثیه
با سلام