در احوالات حضرت فاطمه زهرا (س) 5793
در احوالات حضرت فاطمه زهرا (سلام الله)
یارب اگر ایجاب ایلسه امرمشیت
احسان ایله گلسون عمله دلده کی نیت
زهرانین ایدوم ساحتینه عرض ارادت
بو شرطیله گراولسا عنایت خانیمیمدان
همواره اولوبلطف و کرامت خانیمیمدان
من بیرنفرم معترف جرم و گناهکار
آلوده و ناپاکم و محتاج نمکذار
بیرروسیهم عاصی و مجرم خطاکار
اما خانیمیم لطف و عنایتدی سرا پا
هم عاطفه و نعمت و رحمتدی سرا پا
هرچندکه احبابینه ایتگیندی مزاری
اوچ یرده ایدر اهل ولا گوزیاشی جاری
بیرمنبرو محراب آراسی یا که کناری
ممکن اولا زواری گیدربیرده بقیعه
بیرده اوز ایوینده اولا شاید او ودیعه
هرنوعیله تحسینه سزاواریدی زهرا
احساسیدی اخلاصیدی ایثاریدی زهرا
اوزهمسرینه یار فداکاریدی زهرا
معلومیدی مولایه حیاتین بو نکاتی
مرهونیدی زهرایه حقیقتده حیاتی
زهرا نجه زهرا فلک عصمته اختر
زهرا نجه زهرا صدف عفته گوهر
زهرا نجه زهرااو کمکسیز شهه یاور
بیرکیمسه ده اولماز اولا بو قدرت و تمکین
ایثاری ایده همسرینین عمرینی تضمین
پیغمبر رحمت شرف عالم امکان
ایستردی ایده بو خانمین شانینی اعلان
فرمایش ایدردی آتاسی بو قیزا قربان
ایلربیزه بو نکته بو معنانی حکایت
زهرادی گل سرسبد عالم خلقت
زهرا نجه زهرا گل زیبای رسالت
زهرا نجه زهرا دردریای محبت
زهرا نجه زهرا شرف عالم خلقت
مانندینی گورمز بو جهان تا بو جهان وار
باشدان ایاقا مهرو وفا رافت و ایثار
ای گلشن طاهایه گل نازو معطر
ای عفته پیرایه اوزی عصمته زیور
وی بحرمحبت صدف خلقته گوهر
سن نوگل زیبای گلستان وفاسن
سن گوهرپرارزش دریای حیاسن
ای سرو قدی نخله گلزاررسالت
وی معنی ایثار و وفا روح فضیلت
مسجدده علیدن ایلین وقته حمایت
فاش اولدی که سن آیت حی ازلیسن
سن یار وفادار و فداکار علیسن
سن گلشن توحیدیده بیرغنچه ترسن
سن معنی کوثرده کی پربار ثمرسن
افسوس که عمرین گونی تک زورگذرسن
هیچ بیر گلین سنون عمرون تک آز اولماز
هیچ بیر گل افسرده جمالین کیمی سولماز
بو مطلبه مولا اوزیده ایلوری اقرار
مین ایللراگردورایده بو گنبددوار
مشکل گوره زهرا کیمی بیریار وفادار
هیهات بتولین گوره مانندینی دنیا
باشدان ایاقا مهریدی ایثاریدی زهرا
نه همسریدی تک منه زهرای فداکار
بیریاروفاداریدی بیریاورغمخوار
باشدان ایاقه عشقیدی اخلاصیدی ایثار
هراحظه که گورسیدی اگرغصه لیم من
دوزمزدی آلاردی غم و اندوهیمی دلدن
بیعت گونی جبرا آیراندا بونی مندن
قنفذ ایله بیر ظلم ایلیوب منفعلم من
ای کاش دوشیدی او ایکی شوم الی تندن
مجروح ایلیوب ضربتی بازوی بتولی
قمجی یری درده گتوروب قلب رسولی
بیرکشمکش اولدی دیمورم من نلر اولدی
باد ستم اسدی خانیمون گلشنی سولدی
هرغنچه گلین باغری قزل قانیله دولدی
بو حادثه لر قویدی آناسیز حسنینی
زهرانی شهید ایلدی آغلاتدی حسینی
تهدید اولونان وقتیده دربارامامت
بوردا دیدیلرفاطمه وارایتمه جسارت
باشد دیدی وارفاطمه وارمنده اوجرئت
بودرگهی یاندورام علی ایتمسه بیعت
ایوای اگرنفس ایده انسانه حکومت
چون عقلی اسیراولدی اونون نفسینه ناچار
باب الاهی یاندورماقا چوخ ایلدی اصرار
باخ شرمه اودون ایستدی اول شوم و جفاکار
ای کاش او ظالم شل اولیدی ایکی الدن
تا نادم اولیدیبیله بیر زشت عملدن
شورای سقیفه ایلموشدی بیله تضویب
تامنده ایدم بیعت اولا دین ایوی تخریب
السمده اولانمازبیله بیر مرحله تعقیب
هیهات که عالم ایلیه جاهله بیعت
بی ارزش و نا چیزیدی بو امرخلافت
شورائیله اوز دلده کی مقصودیزه یتدوز
دوزیولدان آیردوزیولی بیراهیه گیتدوز
بو غصب خلافتدی مسیرین عوض ایتدوز
بو ناقه مجروح سیزه سود ویره بلمز
قان اولدی او سود خلق سعادت گوره بلمز
وقت اولدی خلاصه خانیمی درک ایده رحلت
وقت اولدی که اوزایستدیقی تک اولا راحت
وقت اولدی که حق خواهشینی ایتدی اجابت
وقت اولدی خانم امر قضایه اولا تسلیم
اوزجانین ایده محضرجانانینه تقدیم
مولایه خبرویدیله درک ایله بتولی
گل منزله ترک ایت حرم پاک رسولی
امرایله بتولین گله اطفال ملولی
زهرانی دویونجا گوره بیرده حسنینی
زهراده گوره گوزلرینین نوری حسینی
مولا حرمی ترک ایلیوب عالم و آگاه
نه قدر چتیندور بونا بو آیریلیق الله
دوردی گیده ایوای یخلدی یره ناگاه
بلمم نقدرقلبی بو محنتده سیخیلدی
دنیا جه حوادث اونی یخمازدی یخیلدی
دوردی ایاقا یاس تمامیله اومولا
گلدی گوره نه حالیده دور عصمت کبرا
گوردی که یاتوب بسترآلامیده زهرا
قصد ایتدی دانشدیرسین او محزون و حزینی
زهراده جواب اولمادی آغلاتدی علینی
فرمایش ایدوب ای یارالی قلبیمه یارا
چوخ غصه لیم هجریوه یوخ منده شکیبا
بیرکلمه دانش آل بو سینق گوگلیمی زهرا
هرچند حذر یوخدی قضای ازلیدن
آچ گوزلریوی دویما بو تزلیقدا علیدن
ای هر غم و محنت گونیمون یاوری زهرا
وی چرخ حیا و ادبین اختری زهرا
ای بو حرمین طایرخونین پری زهرا
پروازایلدون عرشه سینان بال و پریله
قویدون منی عالمجه غم و دردسریله
زهرا بیله فکرایتمه محبتده یانشدی
تا آلدی علینین سسینی گوردی تانشدی
نازیله گوزین آچدی دله گلدی دانشدی
عرض ایلدی ای سروردین خسرو خوبان
سن آغلاما آغلارگوزیوه فاطمه قربان
سن آغلاما ای خلقته شخصیتی زیور
سن آغلاما ای قافله امته رهبر
سن آغلاما ای یار وفادارپیمبر
سن آغلاما آغلاتما بو محزون و ملولی
عفو ایله گذشت ایله حلال ایله بتولی
بیرآز ایکی دلداده او دم درد دل ایتدی
اذن آلدی خانم محضرپیغمبره گیتدی
تک قویدی علینی اوزی مقصودینه یتدی
مولایه نه اندازه اولوب مشکل او هجران
بیرفاطمه بلدی بیراوزی بیرحق سبحان
ایتموشدی وصیت گیجه غسل و کفن اولسون
تشییعینه حاشا نه گلن نه گیدن اولسون
نه قبری بولونسون و نه دفنی علن اولسون
ایوای اولار که بو ملاله سبب اولدی
زهرا و علینین اورگی قانیله دولدی
بیر نیمه شب ایتدی علی منزلی خلوت
اول پیکرزهرایه باخوب شاه ولایت
کیم بلدی او باخماقدا وار نلرگوردی او حضرت
عرشه اوجالوب ناله سی اشرارین الیندن
گوردی که گلی پرپراولوب خارین الیندن
خلوت گیجه دنیانی دوتوب پرده ظلمت
زهرایه اوزی غسل ویروب شاه ولایت
زهرا نه حقیقتده الوب عالم خلقت
ذی روح یقین یوخ کسیلوب شهریده سسلر
محبوس اولونوب سینه ده هراودلی نفسلر
راوی دیر ال چکدی علی غسلیدن اما
دیواره یوزین قویدی ایله آغلادی مولا
عرض ایلدیم ای صبرینه حیران هامی دنیا
بو آیریلیق ایتدی سنی بو نوع مکدر
یا وارآقا بو آغلاماقا علت دیگر
فرمایش ایدوب هرنقدر عمرایده دوران
منده او قدرعمرایلیم گراولا امکان
بیر عمر اولام فاطمه نین فقدینه گریان
ایتمزله مذمت منی اهل دل اولانلار
اما او که آغلاتدی منی اهل دل آنلار
بیخود اولا بلمزاولا عشقیمده ثباتیم
مرهون اولا بیر ال که بو حالیمده حیاتیم
زهرانین الیدی که اولوب فلک نجاتیم
اللردن آلوب دشمنه محصورقالاندا
شمشیر لرآلتندا او گون بیعت آلاندا
جبریله چکن وقته منی مسجدده دشمن
زهرا الی دامانیمی گوردوم که دوتوب من
قنفذ که آیردی منی اوندان اونی مندن
بو شاخه گلده اثر خاروارایمدی
قمچی اثریندن هله آثار وارایمدی
درد دل مولایه عجب ایتدیله چاره
ووردی یارالی قلبینه غملرگینه یاره
کیملرگتوروب فاطمه نی پای مزاره
دنیا جه غم و غصه دی اول معدن صبره
مولا اوز الیله قویا محبوبینی قبره
زهرانی قویوب قبره او شه با دل محزون
گویا ایدوب اوزروحینی زهرائیله مدفون
اشکین یوزه جاری ایلدی چون درمکنون
فرمایش ایدوب ای گوزیمین نوری عزیزیم
شایسته دی گیتسه گوزیمین نوری عزیزیم
ای وای بو دنیا نقدرپستیدی یارب
کیم بلدی نجه روح علی اولدی معذب
تا مغرب ظلمتده غروب ایتدی او کوکب
آغوشینه خاک آلدی ایله گوهر پاکی
عرشه یری وارفخرایلسه عالم خاکی
بیرنیمه شب خلوت و خاموش مدینه
گیزلینجه گیدر منزل قبره او دفینه
علت ایکی عاملدی فراهمدی زمینه
بیرعلتی زهرا اوزی ایتموشدی وصیت
شاید اولا بیرعلتی بیگانه جماعت
اعلام ایلموشدی اوزی پیغمبررحمت
هرکیمسه بتولین ایده تشییعینه شرکت
بی شبهه اولارحشرگونی داخل جنت
چوخلاربو امیدیله که گیتسونله بهشته
ایستردیله تشییع اولا اول حورسرشته
اما او قرانلوق گیجه آخرسحراولدی
تا پرتو خورشید فلک جلوه گراولدی
بو حادثه دن اهل جفا باخبراولدی
یعنی ثمرین ویردی او دم نخل سقیفه
قصد ایتدی نمازه گله زهرایه خلیفه
هیهات اولا نائل بیله بیر امرخطایه
کرکس اولا بلمزکه سالا سایه همایه
مشکلدی الومدنده بو غم اهل ولایه
یارب نیه خسف ایتمدی یر اهل حجازی
گور کیم گلوب ایستر قیلا زهرایه نمازی
ثانی که اوگون مصدریدی امریده ناگاه
اولدی او خانم فاطمه نین دفنینه آگه
جمع ایلدی اوز باشینه بیر عده گمراه
یوز قویدولا قبراستینه اللرده وسیله
بو امر اهانتدی او بانوی جلیله
بلمم نیه دوندرمدی حق چرخ مدارین
یا ایتمدی شل اللرینی قوم شرارین
گلمیشدیله نبش ایتماقا مرضیه مزارین
هیهات ایله بیرامره اولارایلیه اقدام
بو مسئله شخصیدی دگل صحبت اسلام
ناگاه گوروبلرکه گلورشاه ولایت
اندامی دوتوب لرزه غضبدندی علامت
باشدا ساری دستمالی دیوروارنه حکایت
غیظیله دوتوب الده او شه قبضه شمشیر
آماده دی بیرحملیه روبه لره چون شیر
فرق اولمیا بیر جامعه ده نیک و بدیله
انسانی برابر سایالاردیو و ددیله
بیردل که دولا کینه و بغض و حسدیله
آیا او علی غیرعلی فرقینی آنلار
یا مهلکه ده جامعه نین غرقینی آنلار
فرمایش ایدوب یاندی قاپوم اوندا دایاندیم
ظاهرده دایاندیم ولی دلدن یارالاندیم
اودشعله لنوب منده شرارغمه یاندیم
منظوریدی چون مصلحت دین الهی
دوزدوم که خلل گورمیه آئین الهی
اما اوکه بو قبرلره اولسا جسارت
مربوطیدی شخصا اوزومه حفظ و حراست
شمشیرهمان الده همان الدی جماعت
چون چوخلاروزین قدرتیمه واردی یقینی
سیراب ایدرم قانوزیله روی زمینی
چون گوردوله مولانی غضبناک او اشرار
ال قبضه شمشیریده آماده پیکار
ال آچسا او بیرحمله ده قویماز قالا دیار
عذرایستدی ثانی دیدی ای شیرشجاعت
عفو ایت بیزی بیزده یوخودی قصد اهانت
مولا او که خشم ایتدون او افراد جهوله
دنیا بوئی حسرتدی بو محزون و ملوله
بیرقبرکه منسوبیدی ظاهرده بتوله
دومزدون او تپراقه دگه دست جسارت
ایستردون اولا زیر و زبر عالم خلقت
اما او که عاشورگونی دشت بلاده
اشرارایلدی سویماقا اطفالی اراده
زینب او کشاکشده چاغوردی سنی داده
گرمصلحت اولسیدی گلردون او دیاره
ناچارقالان قیزلاریوا ایتماقا چاره
یا فاطمه ای گلشن دین سروخرامی
وی چرخ حیا و ادبین بدرتمامی
(خوندل) سیزه هرگونده ایدرعرض سلامی
وارقصدی که بیرگون اولا احسانیوه مشمول
قبرینده یقین ایلر اولوب خدمتی مقبول
بیرشخص مشخص سیزه دارای ارادت
صادق متعهد اوزی آماده خدمت
افسوس که یوخ جامعه ده فهم و فراست
اوندندی عطا خواهشی مندندی اشاره
ایوای اگر ایتمیه سوز دردینه چاره
اشعار چاپ نشده
مرحوم حاج حیدر خوندل (سال 1372 شمسی)
منبع کانال گنجینه گذشتگان
با سلام