زبانحال حضرت زینب کبری (سلام الله)

بعد از شهادت حضرت فاطمه زهرا (سلام الله)

و گریز به احوالات حضرت ابوالفضل (علیه السلام)

 

 بعد از وفات فاطمه زینب اولوب نزار

آچدی بیان حاله دلون اولدی دُر نثار

 

دلده اولان مصائب بسیاره آغلارام

صبح و مسا غمونده من همواره آغلارام

 

آغلار گوزوم مدام باخار آستانیه

گلزاریده سولان گل بی خاره آغلارام

 

عطرون گلور مشامیمه مسماریدن هنوز

دوشدوقجا گوزلریم در و دیواره آغلارام

 

 غملندیرر دوشنده گوزوم آستانیه

باخدوقجا من او سهمیلی مسماره آغلارام

 

مسمار یاره سین نجّه خشک ایلینمدیم

قان آغلادار اولونجه همان یاره آغلارام

 

بیرکشمکش اولوبدی همین آستانه ده

جور و جفای قنفذ قداره آغلارام

 

اولدی او کَشمکَشده  نَلر بیر خدا بولور

بیرده علی بولور غم دشواره آغلارام

 

دشمن چکوردی مسجده قول باغلی حیدری

خیبر شکن غضنفر بی یاره آغلارام

 

هر چند که مشیته تسلیم اولوب ولی

قولاری باغلانان شه ابراره آغلارام

 

غم یوز ویرنده آغلامیوم نینیم آنا

دردیم یاماندی دردیمه یوخ چاره آغلارام

 

خشنود اولمادون آنا سن روزگاریدن

تا جاندا جان واریمدی دل زاره آغلارام

 

دائم خطور خاطر اولار چهر نیلگون

نیلی اولان ستمله او رخساره آغلارام

 

یوز دوتماقون اورکده یامان درد اولوب منه

دلدن یانوب همیشه او رفتاره آغلارام

 

جانیم فدا بیر اللی یارا باغلیان اله

هم زخمه زخمداره پرستاره آغلارام

 

بلبل نجه چمنده گَلر شور و شیونه

بلبل کیمی خزانی گلزاره آغلارام

 

طومار اولار یازلسا غم و محنتین سنون

لوح ضمیریده غم طوماره آغلارام

 

ملفوف پیرهن ندی اولموش امانتون

بولمم نه سرّی وار که بو اسراره آغلارام

 

سرّی ندور بو پیرهنون قان اِیگیِ گلور

سرّ سکوت پیرهن یاره آغلارام

 

هرچند وار شمیم بهشتی ولیک من

هر دم باخاندا نکهت خونباره آغلارام

 

هر قدری آغلورام اورکیم دوتموری قرار

حاشا دئیم ازلده کی اقراره آغلارام

 

اولدی حواله شعریمه سرّ فراز تل

عرض ایتدی شهریاره علمداره آغلارام

 

ترکیبدن سالوبلا علمداریوی حسین

آخر وفای عهد سپهداره آغلارام

 

سن آغلاما بو گوزلریوه زینبون فدا

هرگز دئمه وفای وفاداره آغلارام

 

زخم جبینی زینبی حالدان حالا سالور

روباه الینده شیر گرفتاره آغلارام

 

ای کاش گورمییدی آنام ظلم نوفلی

قان، یاره سیندن ایلدی فواره آغلارام

 

گلدی کنار علقمه زهرا آنام اوزی

آغوشینی آچوبدی علمداره آغلارام

 

عباسه مرحبا که دوشندی ایاقینه

بند رکابه پای نگونساره آغلارام

 

پرچمده یاحسین چاغورور، یاحسین مدد

پرچمده سسلنور دل تبداره آغلارام

 

دل آچدی پرچم شه لب تشنه گان عشق

عرض ایتدی تلین اوسته کی دلداره آغلارام

 

گوزلور یولون رباب و رقیه خیامیده

حال نزار تشنه دیداره آغلارام

 

وار آرزوکه پرچم اولا ساقیه کفن

ام البنین حالینه آواره آغلارام

 

گونلرکچوبدی گلدی او گون،  اولدی روز دفن

اوضاع دفنیده غم غمخواره آغلارام

 

تشریف آپاردی سید سجاد شرعیه

عشق عالمینده عاشق بیماره آغلارام

 

گوردی ورق ورق داغلوب پیکر وزیر

نطقه گلوب بویوردی بو ایثاره آغلارام

 

نصب ایلیوبله آت دوشونه راس یوی عمو

ظلم و جفای فرقه فجاره آغلارام

 

قولاریوی آنام آپاروبدور شفاعته

نهر اوسته عطر احمد مختاره آغلارام

 

هر بند بند جسمون ایدور ذکر یاحسین

بو باره دن مذکر اِذکاره آغلارام

 

حفر اولدی سرو قامته بیر خرداجا مزار

موضوع شعریمه غم عیاره آغلارام

 

معیار عشقیدور که وریبدی (عتیقه) جان

جان و دلیمده شعشع معیاره آغلارام

 

(شبگیر) طوطی حرم عشقیدور یقین

شَکَر نثار ایدوب که شکر باره آغلارام

 

 شبگیر تبریزی و طهمورثی (عتیق)

منبع مجموعه کانالهای مدح و مرثیه