متن نوحه های ترکی و فارسی

در احوالات حضرت زهرا (سلام الله)

الیمده خامه گوزیمده سرشگ طوفانی

غرض بودور که یازام ماجرای زهرانی

عنایت ایتسه اگر شهریار عشق اوزی

یازار قلمیم یتورر آخره بو طغرانی

او گونکه پایگه وحی پایکوب اولدی

نشیمن ایلدی زاغ و زغن گلستانی

بهانه بیعتیدی ظاهرا" ولی دلده

غرض عداوت دیرین و کین پنهانی

تهاجم اولدی آچیلدی قاپی ، اولان اولدی

ایدوبله نقش زمین ، قدّ نخل طوبانی

قیریلدی جبریله بیر غنچه شاخساریندن

خزان ایدوب گلِ نسرینِ باغ رضوانی

یخیلدی هیکلِ زهد و عفاف و شرم و حیا

خسوفه چکدی خطا ابری ،  ماهِ تابانی

بتول ضعف ایلدی شدتِ جراحتدن

آپاردی مسجده دشمن ، علیِ اعلانی

گلنده هوشه گوروب یوخ عم اوغلی سی ، ناچار

سوروشدی مطلبی دولدوردی چشمِ گریانی

بویوردی فضه گلون ایلیون منه نصرت

گلوب خانملاری انصارین ، اولدی اعوانی

باشندا چادرین اولده ایلیوب محکم

ایدوب او ضعفیله تعقیب راهِ جانانی

یتیشدی گوردی که مسجدده انکساریله

دوروب مقابل منبرده ، شیرِ یزدانی

قلنج الینده ایکمجی خلیفه ، غیظیله

ایدور شهادته تهدید ، شاهِ مردانی

دیر خلیفه نی سنده خلیفه بول اوزیوه

دلینده لفظ مکرردی بیعت عنوانی

علی قالوب ایاق اوستونده ، باش آچوق ، مقهور

ایدر عتابیله تهدید ، بعته ثانی

او قدر قالموری تا نور حق اولا خاموش

توکوب عذاره خانم ، اشکِ چشمِ شهلانی

ابی قحافه نون اوغلون گوروب غروریله

یقوبدی باشینه بیر عده بی سر و پانی

اوتانمیوب اوتوروب مسند پیغمبرده

اولوبدی عقلینه غالب ، هوای نفسانی

او منظره خانمین الدن اختیارین آلوب

پوزولدی زلفی کیمی حالتِ پریشانی

ایدوب عتابیله تهدید ، مسجدین اهلین

بویوردی باشیمه سالام قَمیصِ طاهانی

اگر گوتورمیه سوز ال ، منیم عم اوغلومدان

عذراریمه توکرم زلفِ عنبر افشانی

شکایته دل آچوب ، ایلرم سیزی نفرین

یانار او آتش قهریله ، عالی و دانی

اولار نه ناقه صالح منیم اوزومدن عزیز

حسینیله حسنه نه فُصیل رُجحانی

یتیشمه میشدی کلامی تمامه فاطمه نون

اولوب مشاهده قهرِ بلایِ ربّانی

گوروندی ناگه عوالیمده آیری تغییرات

دوتوبدی شدتیله لرزه ، ظلم بنیانی

او وقته حضرت سلمانه ، امر ایدوب امام

گئت ایله صبره سفارش ، بتولِ عذرانی

دئ امر ایدور که عم اوغلون ، دایان تحمل ایله

رعایت ایله رضایِ خدایِ یکتانی

بابان رسول خدا ، صبره چون سفارش ایدوب

مُطاع دور هامی افرادِ خلقه ، فرمانی

گلوب بتوله امرِ علینی یتوردی ، دئدی

خانم هلاکته سالما بو قومِ نادانی

اورکلنوب دئدی مرضیه ، گورموسن سلمان؟

عم اوغلومون باشی اوستنده تیغِ بُرانی؟

حسینیله حسنیم آز قالور یتیم اولسون

بو غصه غارت ایدور طاقت و شکیبانی

تمام خلقه بیر آبرودی نفسِ علی

شهید ایدولّه بو آزاد مرد ، انسانی

امام مُفتَرَضُ الطّاعه دور ، ولایتی وار

علی دئسه دوزرم ، یوخ خلافین امکانی

خلیفه گوردی اوزون تنگناده ، ایتدی خطاب

علیدن ال گوتورون ، ای گروهِ سفیانی

اجازه ویردی علی دودمانینه گیتسون

(عجبدی اولمادی ویران بو عالم فانی)

امام خارج اولوب مسجد پیمبردن

ایدوبدی قصد او دم ، دودمانِ والانی

مصادف اولدی وفادار همسریله علی

خانم دایاندوروب اول شهر عشقه سلطانی

ادبله عرض ایلدی یا اباالحسن گلدون؟

فدا قدملریوه اهل عالمین جانی

قویوب ایکی علینی ، کتف مرتضایه دئدی

غم ایتمه یوخ کومکون ، ای ولی سبحانی

اولا بو جسموه جسمیم سپر بلالرده

او روحوون اولا روحِ بتول قربانی

مقام خیرده اولسان سنیله هم قدمم

گر اولسا شرده جسمون ، منم نگهبانی

کمال همته سیر ایله ، بیر مَه مخسوف

کسوفدن قوتاروب ، مهرِ عالم آرانی

بو یرده فکریمی بیر مطلب ایدوب اِشغال

محبت اهلی ایدر حل ، بو معمّانی

گیدردیلر یولی اما ، یقین علیِ ولی

ایدردی شرم گورنده او ماه سیمانی

اودا یقین اوتاناردی باخاندا مولایه

شکسته حال گورردی ، او شاهِ خوبانی

خلاصه وارد اولوب دودمانینه زهرا

نه حالدیدی؟ اونون الده یوخدی میزانی

سیزلداشاندا سیزلداردی ناله سین ایشدن

ویرردیلر سسینه سس ، مدینه نسوانی

گلردی نالیه آغلاردی سینه داغلاردی

دوتاردی دوده آهی ، سپهرِ مینانی

گلن گیدن دایاناردی ، دوراردی راهگذار

ایدردی اشکیله تر ، اهلِ شهر ، دامانی

یواش یواش هامویه ناله سی ایدردی اثر

اولاردی شورشه زهرا سیزلدیسی بانی

دولاردی ناله و دادیله سربسر یثرب

خیال ایدردیله شیون ، دوتوبدی دنیانی

اولوب بیر عدیه چوخ ناگوار بو جریان

آت اوینادانلارا تنگ ایلمشدی میدانی

بلی چتین اولارا ، قابل تحمل اولار

حکایت ایلر او شیون بیر آیری معنانی

گلوبدی نچه نفر پیشگاه مولایه

تظاهریله ایدوب طرح ،‌ بو تقاضانی

علی دئ فاطمیه یا گونوزلر آغلاماسون

عزالینون گجه لر وار نوایه بُرهانی

و یا بویور گجه نی صبح اولونجا راحت اولا

آز ایلیه بیزه داد و نواسی ایذانی

خانم ایشتدی ندور اهل شهر منظوری

ایدوب نثار رخِ زرده ، اشک مرجانی

دئدی عم اوغلی علاجبم ندور ، نه چارم وار؟

بیزه جسور ایلدی کیم بو عدوانی؟

عزالیم نیه قویمولّا اوز ایویمده منی

بابام گیدوبدی الیمدن اولام نواخوانی

ندور جوابی عم اوغلی بو قوم گمراهون

قوراندا حشرده حق ، عدل و داد دیوانی؟

دویونجا اولمامیشام کامیاب ، وصلوندن

نجه تحمل ایدوم من جفای هجرانی

خلاصه جهلیله از بس که قوم بی دانش

فشاره سالدی او حدّ کماله دارانی

کنار شهرده بیر ایو علی ایدوبدی بنا

بو مقصدیله که تکمیل ایده نُقصانی

گیدردی اوردا خانم سس چکردی آغلاردی

آخاردی اشکیله رخساره قلبینون قانی

ابو ترابی عزیز ایله ، یا عزیز الله

اولاردی وردی ، قویاندا ترابه پیشانی

بو نیتیله که آثار جرمی محو ایده لر

خراب ایدوب ستم اهلی ، او بیت الاحزانی

سحر گلوب خانیمون چوخ پوزولدی احوالی

گوزی دوشنده گورنده او بیت ویرانی

گنه او حالیله ظلم اهلین ایلسون رسوا

مکان ایدوب نچه گون ، گوشهء بیابانی

نه تک خانم اوزی ، بلکه حسینیله حسنی

گون ایسی سینده یانوب ، اوچ جمال نورانی

حرارتی آزالا بلکه ، زیر چادردن

سالاردی عارضینه طره سمن سانی

غروب اولاندا گلردی امام هر گون اوزی

ایدردی نقل ، شبستانه شمعِ سوزانی

همان او غصه لر ایتدی وجودین تَحلیل

خمیده قامت ایدوب غم او سرور رعنانی

فریضه دن صورا هر گون دیردی یا الله

یورولموشام منه خوشدور بو عمر پایانی

عنایت ایله خدایا وفاتیمی یاخون ائت

جهانی نیلورم ای عالمین جهانبانی؟

دعای فاطمه اولدی اجابته مقرون

چکوبدی بستر مرگه او روح ایمانی

او نازنین بدنی غصه لر ایله اریدوب

شبیه ایدوبدی هلاله او ماه رخشانی

گلوبدی بیر گون علی، گوردی رو به قبله یاتوب

کسوب علاقه بدندن، قوای جسمانی

گورنده بی حرکت همسرین او سرور دین

نه حاله قالدی؟ بولر اهل دل او معنانی

بو نیتیله او خاموشی بیر دانشدیرسن

گلوب تکلمه، بو سوزلر اولدی عنوانی

خطاب ایدوب که دور ای قائد الصلوه قیزی

رعایت ائت بو علی غریب و تنهانی

دئدی دوباره دور ای حامل زکات قیزی

گوزون فداسی گوز آچ ، ایتمه نقض پیمانی

اوچومجی دفعه بویوردی عم اوغلوام زهرا

قسم علاقوه رد ایتمه بو تمنانی

ندا ندای علی، فاطمه جواب ویرن

منم که مشکله سالام بو امر آسانی

بو سوزده گوزلرین آچدی بتول نازیله

تبسمیله ایدوب شاد او غملی مولانی

دئدی عم اوغلی بیله آغلاما سنه قربان

گوزومده گوندوزومی ایتمه لیل ظلمانی

حیات و مرگی کناریمده روبرو گورورم

گل ای کرامتی عاجز قویان مسیحانی

بهشتیدن منی دنیایه ایلدون معطوف

زیارتوندن اولار بو نقیصه جبرانی

هزار روضه رضوان فداسی بیر نگهون

گورر دل اهلی جمالوندا بسط عرفانی

سن اولماسان نه بهشت و نه کوثر و نه قصور؟

تاپار سنیله صفا خلد، حور و غلمانی

جلال بارقه ذوالجلالی سنده گورر

ویرر کلیمه تجلای طور سینانی

سنه مطیع اوامردی قابض الارواح

اطاعت امریوه ایلر او پیک ربانی

گلوبدی منتقل ایتسون منی بو عالمدن

بقیه  چونکه بو عالمدی عالم فانی

ولی فراقیم اگر سخت مشکل اولسا سنه

حضوریون منه وار ، مین بهشت رجحانی

سن اولماسان منه سنسیز بهشت اولار زندان

بتول نیلوری سنسیز بهشت رضوانی

عم اوغلی امر سنوندور نه اولسا منظورون

عوالیمون سنه وار بیر خضوع شایانی

اگر بو مرحله ده خواهشون حیاتیمدی

بتول جانیله اجرا ایدر او فرمانی

عم اوغلی من سنی ترک ایتماقیم دگل آسان

بو آیریلیق دگی، بیر روح ترک ایدر جانی

حسینیله حسنون، زینبیله کلثومون

من اولماسام اولارین کیم اولار نگهبانی؟

بو قدر آغلاما آغلار گوزون فداسی اولوم

ایدر گوزون یاشی شرمنده بحر عمانی

حیات چشمه سی جاریدی هر دمونده، ولی

یازوب فنایه قلم، کل من علیهانی

اجازه ویرسن اگر چوخ یورولموشام منده

گیدوب بهشتده اولام رسول مهمانی

بویوردی فاطمه بیر اود آلشدیروب دلده

فراق سوزی آشوب حد و مرز طغیانی

فقط بو گوز یاشی هر دم ایدر اونی خاموش

بولر فراقه گرفتار اولان بو ایمانی

چتیندی داغ جوان، لیک سخت تر بولورم

خدایه آند اولا من فرقت احبانی

بو آیریلیق ایله ببر اوددی حشره تک سونمز

یانار یانار، کول ایلر یاندیرار تن و جانی

غمیم همیشه لیق اولدی سنون فراقوندا

سزادی اشکیم ایده شرمسار دریانی

اولار بو سر گجه یاتمیانلارا روشن

نیه منه گجه لر اولدی لیل طولانی؟

تیز اولدی هانیه ، صیاد غم شکار ایلدی

کمند مرگیله سن تک غزال زیبانی

قلم دایانموری  (خوندل) عجب عنایت اولوب

بو سره وار قلمون اعتراف و اذعانی

بو افتخارین ایله شکرینی که حی قدیر

سنه عنایت ایدوب نعمت تولانی

زهی سعادت و عزت، که سن اوزون گوردون

عطای فاطمه، جود علی عمرانی

خانم منه بولوسن اولدی دردسر بو صداع

او هانسی دردیدی سیزلره یوخدی درمانی؟

سنی عم اوغلوا ویرم قسم خانملوق ایله

بو خاکساروزا آرتور نوال و احسانی

خرابه شامده منظور اولوب ، ویرانه بیر منزل

نه اوردا سایبان نه سقف ، نه دیوار وار زینب

سولار بیر نوشکفته غنچهء گل ، بادِ خزانیله

کنارینده آچار باش هر نه گل رخسار وار زینب

اوزون سیل ، گردِ راهی ، چینِ زلفِ مشکباریندن

آچیلسون شانه وور ، پیچیده هر بیر تار وار زینب

نماز شبده ذکر ائت هر گجه مظلوم ئولنلردن

مگر عشق اهلینه بوندان گوزل اذکار وار زینب

فراموش ایتمه مخصوصا" ‌حسینی ، سن کیمی هاردا

عبادت مرکزینده نقطهء پرگار وار زینب

بو شعره(انورین) بیر بیتنی زیور ایدوب(خوندل)

بو صادق هم قلملرده عجب ایثار وار زینب

مرحوم حاج حیدر خوندل

منبع مجموعه کانالهای مدح و مرثیه