اربعین حسینی

 

قارداش جفای شامدن از بس اوسانموشام

هر رنگه من زمانه خمنده بویانمشام

 

احوال ایسته سن نه که مندن سوروش دیوم

چون شهر شامی کوچه به کوچه دولانموشام

 

سندن صورا او گون گهی میدانه قاچموشام

گاهی یاناندا خیمه لر اودلاره یانموشام

 

بیمار اوغلووی گهی اوددان چخاتموشام

گه چوللری یتیملریله دولانموشام

 

ابن زیاد بزمنه بی پرده گیتموشم

اول بزمده خانملیقیمی لیک دانموشام

 

یولاردا گاه ناقه ده گه یرده گیتمیشم

باشون دالنجه گاهی قاچوب گه دایانموشام

 

داش ووردولار یارالی باشندان ، او وقته من

ووردوم کجاویه باشیمی یارالانموشام

 

اما قیزون رقیه ویروب جان خرابه ده

مانند شمع شام غریباندا یانموشام

 

تعمیر ایچون ترابنی ، قبرون گل ایلرم

از بسکه سیل اشگ تریمدن اوسانموشام

 

سانما او وقتدن منیم آغلار گوزوم یاتار

هر شامگاه ، خلق یاتوب من اویانموشام

 

خون دل ، اشگ تریله مضاف اولوب

وجهی بودور که درد غمیله بویانموشام

 

قارداش حسین ، اسیره باجون گلدی شامدن

عرض ایلیوم نه نوع برادر تالانموشام

 

یا : عرض ایلرم باغشلا برادر تالانموشام

 

بیر جان قالوب نثار ایدم توزلی قبریوه

بو نوع ئولمگیمدن اوتور من یارانموشام

 

هر نوع غصه یته منه واردی طاقتیم

من زینبم مصیبتیله چوخ سنانموشام

 

سن دوزمین مصیبت و اندوهه دوزموشم

من شاهزاده طعن گدایه دایانموشام

 

من ئولمرم شماتت حسین ئولدورر منی

شاماتیدن جان اوستیم ، ئولم اینانموشام.

 

مرحوم واقف سرابی

منبع مجموعه کانالهای مدح و مرثیه