متن نوحه های ترکی و فارسی

خروج از مدینه

زبانحال حضرت امام حسین (علیه السلام)

آچوب گوزون یوخدان اول امام دل غمگین

او پاک روضه نی قیلدی وداع باز پسین

نماز صبحی ادا ایلین زمان او جناب

زبان حالی ایدوب زینبه بو نوع خطاب

ای یادگار حضرت خیرالنسا باجی

زهرا آنام نشانه سی کان حیا باجی

غمگین گونومده یانیمه گل دردیمی دیوم

واردور باشیمدا گور نجه درد و بلا باجی

صادر اولان زماندا خطاب امام دین

ویردی جواب او پادشهه زینب حزین

جان ای نشانه اسدالله قارداشیم

سوز دلیله چکمه بیله آه قارداشیم

قربان باجی دئین دلوه بینوا باجون

درد دلوندن ایت منی آگاه قارداشیم

گلسون باشندا هر نه بلا واردی جانیمه

چوخ گورمسین سنی منه الله قارداشیم

امر ایتدی خواهرینه امام زمان حسین

واردور قباقدا بیر خبریم ایتمه شور شین

آلموش فلک قراریمی یوخ منده جان باجی

دور گور سفر تدارکینی مهربان باجی

زهرا آنام الیله تیکن پیرهن گتور

اوندان سورا آنام باجی دوقوز کفن گتور

وار بو سفرده ای باجی بیر اوزگه ماجرا

بیر دست کهنه جامه گتور بیر نچه قرا

ایشیتجاقین بو سوزی زینب علم پرور

سوال قیلدی که ای نور دیده حیدر

بو نه بلا نه سفردور سن اولموسان عازم

کفن اولنلره قارداش حسین اولور لازم؟

قوروب بو نوعیله سن غم اساسی نیلورسن

بویور گوروم منه کهنه لباسی نیلورسن

غرض او شوکت و جاه و جلال دریاسی

تسلی زینبه ویردی چاغوردی عباسی

بویوردی ای گل گلزار حیدریم قارداش

بلا جنودینه سد سکندریم قارداش

گرکدی رشک آپارا یرلره فلک طاقی

دوتا جلال حسینیه کل آفاقی

بو گون گرکدی ویرم فرشه عرشیدن ترجیح

جلال و جاهیمه حیران قالا فلکده مسیح

شهادتیله یازلسون شفاعتیم رقمی

اوجالسون عرشه سلیمان کربلا علمی

تلاطم ایلیه دریای شوکت و اجلال

اولا مدینه ملائکلریله مالا مال

او قدر ایلیه قدوسیان نزول و سعود

بسیط ارض اولا مد نظرده تا موجود

پیمبران اولولعزم انبیای عظام

گرکدی جمع اولالار محضر امامه تمام

نه چون که کرب و بلا شاهی کربلایه گیدر

ولی دار ولا دار ابتلایه گیدر

ده ساربانلارا اولسون بو ایشده مستعجل

تمام ناقه لر اوستونده باغلاسون محمل

اولا کجاوه لرین پوششی گرک زرتار

خصوص زینب ایچون بیر غلام خدمتکار

ستونی جمله زراندوز و زرنگار اولسون

فراز قبه سی یاغوت آبدار اولسون

چکون حریر منقش چو شهپر طاوس

گورنده حوری باغ جنان ایده افسوس

ویرون او تخت روانه ایله زر و زیور

باخوب جلالینه حیران قالا ملائک لر

ایشیدی حکم امام زمانی چون عباس

اولوب تدارکه مشغول ایتدی طرح اساس

 مرحوم قمری

منبع مجموعه کانالهای مدح و مرثیه