متن نوحه های ترکی و فارسی

در احوالات حضرت امام رضا (علیه السلام)

فراق و هجر نصیبان منزل غربت

غریب غصّه شعاران گوشه محنت

بیله روایت ایدون چون گل ریاض عزا

شفیع عرصه روز جزا امام رضا

دیار شهر خراسانی ایتمشیدی مقام

گئچردی آهیله عمری او غربت ایچره مدام

او شاهه غربت آرا نه انیس و نه غمخوار

ملازمیدی اباسلط مومن و دیندار

زبسکه قالمیشیدی آیریلوب ولایتدن

دیار طوسده چوخ تنگه گلدی غربتدن

کمال حزنیله بیر گون او سرور بطحا

زبانحالی اولوردی بو دیللّره گویا

فلک نه ظلمدی قیلدون منی بلایه دچار

عزیزیدیم ایلدون آخریمده بیر بیله خوار

آیردون حسرتیلن جدّیمون مزاریندن

ستمله شهر خراساندا قالمیشام بی ریا

عیالیمی گوزی یولاّردا انتظار ایتدون

الی اورکده جگر داغلی دیده سی خونبار

عیال فاطمه ئیله بو نه عداوتدور

گوروم خراب اولاسان آی سپهر کینه شعار

گورن زماندا اباسلط او سروری گریان

دیدی آقا بو غریب جانیوا اولوم قربان

ندندی قلب شریفون اولوب بیله غمگین

نه مطلبون وار اورکده ایا امام مبین

او دم بویوردی اباسلط سرور مدنی

عجب بلالره سالدی بو روزگار منی

اوزاق زماندی که من گلمیشم خراسانه

یانار منیم اوره کیم سوز نار هجرانه

دولان سراغ ایله قاصد اولسا ایت معلوم

یازوم مدینیه بیر نامه تا من مظلوم

گزوب دولاندی اباسلط گوردی قاصدوار

گلوب امام حضورینده ایلدی اظهار

قلم آلوب الینه شاه عالم امکان

یازاردی نامه ده گویا بو نوعیلن عنوان

گل ای جهاندا بلا مبتلاسی معصومه

اولان زمانه ده یوزمین بلاسی معصومه

اگر سوال ابده سن حالیمی ایدوم معلوم

آلوبدی جانیمی غربت جفاسی معصومه

باجی محبّتی دوران غمی فلک ستمی

سالوبدی درده منی یوخ دواسی معصومه

او سن گورن گل رنگیم فراقدن سارالوب

گئدوبدی گوزلریمونده ضیاسی معصومه

مدینه دن نه گلن وار نه بیر خبر گتورن

اوزاقدی یثربیلن طوس آراسی معصومه

قزیم دوشوب یادیما اود دوتوب یانار جگریم

گلنده هر قیز اوشاقلار صداسی معصومه

نه واردی بیر گئجه لر گونوزلر آرامیم

چوخ انجیدور منی هجران یاراسی معصومه

نه مشگل ایشدی غریب اولکه ده ذلیل اولماق

یانیندا اولماسا بیر اقرباسی معصومه

کناره چیخماقا قویماز داخی منی مامون

گئدن الیندن امام رضاسی معصومه

گئجه یاتاندا محمّد تقی خیالیمده

بو جانیمون اودی بهجت فزاسی معصومه

دوشوبدی باشیمه شوق زیارت ال چاتماز

حسین تشنه لبون کربلاسی معصومه

آتام قراسینی باشوندن آچما قوی قالسون

یاخوندی سالماقا قارداش قراسی معصومه

یتنده نامه خراسانه گل دایانما داخی

یاخونلاشوبدی رضانوم عزاسی معصومه

ئولنده گل گوزومی باغلا نعشیمی یولا سال

جنازم اوسته باش آچ ساخلا یاسی معصومه

ریاض ماتمینه نوحه خوان اولور قمری

گلور قولاقیمه دایم نواسی معصومه

مرحوم قمری