متن نوحه های ترکی و فارسی

احوالات اربعین

گلمیشم مزارون اوسته دور اویان یارالی قارداش

خردا قزلارون باشمدا ای باشی بلالی قارداش

شام و کوفه نی دولاندیم من باشی بلالی گلدیم

ای یارالی دور ایاقه منده گور یارالی گلدیم

شامده قزین رقیّه جان وئروب یارالی گلدیم

گلمشم مزارون اوسته دور اویان یارالی قارداش

سن او صاحبِ لوایه وئر حسینِ من اجازه

پرچمین الینه آلسون گلسون ایندی پیشوازه

گلدی شامدن عیالین کربلایه کشف رازه

گلمیشم مزارون اوسته دور اویان یارالی قارداش

دئ گوروم منه حسینیم نولوب اللرین یاراسی

ساغالوبدی ای یارالی تیغ خنجرین یاراسی

قان وئروری یا حسین جان قانلو پیکرین یاراسی

گلمیشم مزارون اوسته دور اویان یارالی قارداش

دست خالی گلمیوبدی بو حزینِ دل شکسته

قانلو کوینگین الیمده گلمیشم ملول و خسته

دور آل اگنوین لباسین سالمشوام مزارون اوسته

گلمیشم مزارون اوسته دور اویان یارالی قارداش

آز زماندا سرو قدّیم گور نجه دونوب کمانه

باشیمه ووروبدی اعدا آغلیاندا تازیانه

قمچی تازیانه دن وار قوللاریمدا چوخ نشانه

گلمیشم مزارون اوسته دور اویان یارالی قارداش

قالما قیدینه رقیّه شامده یاتوبدی راحت

جان وئرن زمان او بی کس گول یوزین چکردی حسرت

اولمادون اؤزون گوریدون اولدی زینبه قیامت

گلمیشم مزارون اوسته دور اویان یارالی قارداش

گول جمالینه توکردی گوز یاشین قزین رقیّه

دمبدم بلایه سالدی اؤز باشین قزین رقیّه

جان وئرنده آختاروردی قارداشین قزین رقیّه

گلمیشم مزارون اوسته دور اویان یارالی قارداش

سنده آغلا بو عزاده گل «علومی» شور شینه

ایسته جمعیله بو قبری گئت بو ایلده اربعینه

اوردا بو زبانحالی عرض قیل شهِ مبینه

گلمیشم مزارون اوسته دور اویان یارالی قارداش

جواب 

گلموسن مزاریم اوسته سینه دن یارالی باجی

بس هانی قزیم رقیّه ای باشی بلالی باجی

باشیم آردیجا دولاندون ای باشی بلالی گلدون

ظلمیله باشوندان اولدون من کیم یارالی گلدون

هاردا قالدی بس رقیّه سن بئله عزالی گلدون

گلموسن مزاریم اوسته سینه دن یارالی باجی

صاحب لوایه زینب من نجه وئروم اجازه

عُذری وار نه نوعی گَلسون پرچم اَلده پیشوازه

یوخدی اللری بدنده پرده چک بو غملی رازه

گلموسن مزاریم اوسته سینه دن یارالی باجی

ساغالوبدی باجی زینب داخی اللرین یاراسی

داخی وئرموری اذیّت تیغ و خنجرین یاراسی

ولی سینه ده ساغالماز بالام اکبرین یاراسی

گلموسن مزاریم اوسته سینه دن یارالی باجی

شامدن اگر گتوردون کوینگیمی دل شکسته

یثربه آپار الینده اولما چوخ ملول و خسته

سال مدینه ده آنامون گزلَنَن مزاری اوسته

گلموسن مزاریم اوسته سینه دن یارالی باجی

دوندروبدی سرو قدّین بار غصّه لر کمانه

باشووه ووربلا بُلمم اهل کینه تازیانه

جان وئرنجه باجی گئتمز قوللاریندا کی نشانه

گلموسن مزاریم اوسته سینه دن یارالی باجی

گلمدی قزیم رقیّه اولمارام بو یرده راحت

سینم اوسته بسلمیشدوم ایلرم همیشه حسرت

آج سوسوز خرابه یرده جان وئروب او ماه طلعت

گلموسن مزاریم اوسته سینه دن یارالی باجی

قانه دوندروبدی بُلدوم گوز یاشین قزیم رقیّه

توش ائدوب غم و بلایه اؤز باشین قزیم رقیّه

چوخ سوؤَردی جان و دلدن قارداشین قزیم رقیّه

گلموسن مزاریم اوسته سینه دن یارالی باجی

شوریله «علومی» هر آن گل فغان و شور و شینه

آغلا حاضرینیله گئت کربلایه اربعینه

اوردا ذکر ایله بو شعری وورسون اهل دسته سینه

گلموسن مزاریم اوسته سینه دن یارالی باجی

استاد علومی