متن نوحه های ترکی و فارسی

احوالات اربعین حسینی

دور حسینیم یاخشی ساعتدور بو ساعت زینبه

آچدی وصلون نعمتی باب سعادت زینبه

سالمشام قارداش اله اؤز کعبۀ آمالیمی

اذن وئرسن شرح قیلّام سرگذشت حالیمی

ایلیوب هجران غمی پژمرده تر احوالیمی

ایلمز عاشق اولان هرگز ملامت زینبه

سن اؤزون آگاه سن ای خسرو ملک حجاز

زینبون عشقی حقیقتدور نه صورت نه مجاز

باجیلار ایچره وئروب الله منه بیر امتیاز

ایلیوبدور سن کیمی قارداش کرامت زینبه

بیر اوزون مدّتدی من نار فراقه یانمشام

انتظار وصلیله هر طلمی آسان سانمشام

ظاهراً گرچه طناب ظلمیله باغلانمشام

باطناً عشقون اولوب قید اسارت زینبه

شکر لله اولدی قسمت نعمت وصلون منه

شمر یوخ دونموش بلا صحراسی دشت ایمنه

دور اوتور دردون بیان ایله باجون قربان سنه

بیلکه قارداش ال وئره فیض زیارت زینبه

نعشیوی یرده قویوب شاماته ائتمشدیم سفر

نچه مدتدور باجون چوللرده سرگردان گزر

گلمشم دور وئر منه قلبونده کی اوخدان خبر

شرح حالون سنده بیر ایله روایت زینبه

سن بولورسن پایۀ عشقیم نه میزاندور سنه

قتلگاهون ماجراسی الده برهاندور منه

خاطرونده وار حسینیم یالواروردوم دشمنه

عشقنون اثباتنه ایلر کفایت زینبه

التماس ایلردیم ئولدورمه حسین قارداشمی

چخما عرش داوره توکمه یوزه گوز یاشمی

قارداشمدان ال گوتور ظالم منیم کس باشمی

تاپشوروب زهرا حسینی چون امانت زینبه

غیضدن گرچه دوتولموشدی او بی پروا گوزی

سن بولورسن شمردن باک ایلمز زهرا قزی

ایلیوبدور مفتخر الله شجاعتله بیزی

ارث دور زهرا آنامدان بو شجاعت زینبه

ایستدیم قاتل الیندن قورتارام قارداش سنی

بولمرم اما نجه بی رحمدی شمر دنی

نحس ایاقین قوزادی گوردون نجه ووردی منی

قویمادی حرمت سنه ائتدی جسارت زینبه

تاپمادیم چاره قیتدیم خیمیه شوریله من

اولمادی سن جان وئرنده گوزلریوی باغلیَن

شمر دون ووردی جدایه باشیوی تکبیریلَن

نیزه باشندا اوزون وئردون اشارت زینبه

ائتدی برپا قانلو باشون شور محشر نیزه ده

دینی تبلیغ ایلدی خلقه مکرّر نیزه ده

خیمه دن گوردوم دیور الله اکبر نیزه ده

رمزیله او حالینی ایلر حکایت زینبه

قانلو باشین ماجراسین صبر سرحدّین یخور

چخموری هرگز یادیمدان قلبیمی دائم سخور

کوفه ده گوردوم ووروبلا نیزیه قرآن اوخور

ساخلیوبدی گول یوزون کولدن علامت زینبه

آغلادیم رحم ائتمیوب خولی قویوب باشون کوله

جوشه گلدی آتش عشقیم کسیلدی حوصله

منده ووردوم باشمی شوریله چوبِ محمله

آخدی قان وئردی عجب تغییر حالت زینبه

سانه گلمز گوردوقوم جور و جفا چوخدور حسین

بیر به بیر عرض ایلسم یارای دل یوخدور حسین

گور چتین بو یاره دور یا نیزه و اوخدور حسین

بیر نفر معجر وئروب ائتدی حمایت زینبه

بزم شربه بیزلری حاضر ائدوب اهل عناد

یخماقا دینون ائوین دینسیزلر ائتدی اتّحاد

مست اولوبدور ناروا سوزلر دئدی ابن زیاد

الده چوب خیزران ائتدی اهانت زینبه

دوشدی بو فکره که ئولدورسون منی اول بی حیا

نشر ائدر اهل قلم بوندان صورا هم سالها

دشمنی رحمه گتوردی نالۀ وا عَمَّتا

ائتدیلر بیگانه لر آخر شفاعت زینبه

منده گوستردیم شهامت گردش ایّامده

ایلدیم سوا زیاد اوغلون حضور عامده

بیر شجاعتده نشان وئردیم یزیده شامده

اوندا که قصد ایلدی ائتسون سیاست زینبه

سوز بورا منجر اولوب آگاهیدور پروردگار

قتلمه فرمان وئروب قارداش یزید نابکار

من دایاندیم قورخمادیم عورت اوشاق آغلاشدیلار

سسلدیم اگلش یره ائتمه جسارت زینبه

بو سفردن چوخ مصیبت گوردی آواره باجون

کوفه و شامی دولاندی تاپمادی چاره باجون

چکدیلر دیره گهی گه بزم اغیاره باجون

گه دوگوب گه ائتدیلر طعن و شماتت زینبه

دلده یارا یوخ دیم دوگدی نجه قوم شرار

وئر اجازه ایلیوم اؤز کوینگیمی برکنار

بیربدنده گور نقدری یاره لر آثاری وار

تا شهادت ایلسون هر بیر جراحت زینبه

وعده وئرمیشدیم قبول ائتدیم اؤزوم هر زحمتی

نوش قیلدیم صدق اوزیله جام درد و محنتی

باغریمی قان ایلیوب امّا رقیّه صحبتی

نشگل اولدی بو مصیبت بی نهایت زینبه

وئردیلر ویرانه منزلده بیزه یر اشقیا

توپراق اوسته آج یاتاردی صبحه تک نازلی بالا

بیر گجه گوردوم دوروب سورتور یوزون توپراقلارا

یاتموری ایلور آجندان چوخ شکایت زینبه

حسرتیله آغلادی یاندردی بیر درده منی

سوزلریندن آنلادیم قارداش ائدوب رؤیا سنی

سس اوجالدی گوگلره رحمه گتوردی دشمنی

بتدی بو اثناده بیر عالی بشارت زینبه

گتدیله قانلو باشین ویرانیه اهل جفا

سویلدیم گلدی بابان دور پیشواز ائت آغلاما

آلدی باسدی باغرینا سسلندی هاردیدون بابا

وئرمیشم سنسیز نه چوخ رنج و ریاضت زینبه

ائتدی بیر ذکر مصیبت جمله سینه داغلادوخ

بیر به بیر دردین دئدی سن آغلادون بیز آغلادوخ

آیرلاندا روحی گئتمیشدی گوزینی باغلادوخ

اولمدای بیر کیمسه وئرسون سر سلامت زینبه

کربلاده بیزلری سویموشدی اشرار زمن

نیلیوم بیر معجره محتاجدیم دنیاده من

گوز یاشیله غسل وئردوخ کوینگین ائتدوخ کفن

بو کفندی اولدی اسباب شفاعت زینبه

ای «رجایی» بیر نفر معصومیدن آلدی خبر

حاجتیم وار نیلیوم اولسون دعامه بیر اثر

اقتضا تفصیله یوخدور اؤرگدوبدور مختصر

قیل توسُّل عمّۀ صاحب جلالت زینبه

مرحوم رجائی

منبع مجموعه کانالهای مدح و مرثیه