زبانحال در خروج از خرابه شام

 

دوزولوب دوشوب حجازه یولا کاروان رقیه

دورایاقه سالما لنگه بیزی بیراویان رقیه

 

وطنه اولولا عازم هامی عترت پیمبر

گینوب هامی قراسین دوزولوب قرا علملر

توکولوب مزارین استه سنه آغلاشورحرملر

نجه گور توکوله گوزدن سو یرینه قان رقیه

 

بالا کاش اولیدی ویران بو اساس دورعالم

دوتا بلمدوق بویرده سنه بیز دویونجا ماتم

قویوب ایمدی بو مزارین بو خرابه یرده باهم

اولوروق حجازه عازم بیزی قیل روان رقیه

 

دوزولوبدی منتظردوردورایاقه غم قطاری

گیده بلمیوبله سنسیزدایانوب حرم قطاری

یقین ایله اولمازعازم بو غم الم قطاری

سن اوزون دوروب سالینجا یولا مهربان رقیه

 

بیزه گیتماقا حجازه ویریلوب اگرچه رخصت

سنی تک قویوب بو یرده گیدراهلبیت عصمت

بو خرابه ده ایدرکیم بو مزاری بس زیارت

منه هرمصیبتیمدن بو گلورگران رقیه

 

یتوشنده کربلایه بو قطاردرد و محنت

قورولان زماندا ماتم آچیلان زمان مصیبت

بو یزید و شمرالیندن ایلیم گرک شکایت

هاموسین حسینه بیربیرایلیم بیان رقیه

 

دیرم حسینه قارداش بیزی شمراسیرایدنده

قولی باغلی پا پیاده آپاروب شامه گیدنده

باشینا ووراردی قمچی یورولان زمان گورنده

گه اولاردی یولدا بیهوش یورولان زمان رقیه

 

یتورنده شهرشامه بیزی شمرناکس دون

بیزی چکدی بزم عامه او یزید دون و ملعون

باشیوا آغاج ووراندا بیزی ایتدی زارو محزون

ایلدی او یرده ناله سنه باغریقان رقیه

 

بلا کاش الیدی زینب قوتولیدی درد و غمدن

یتوشنده کربلایه نه دیوم حسینه سندن

هانی بس قیزیم رقیه خبرآلدی بلکه مندن

نجه عرض ایدوم ویروبدی قوری یرده جان رقیه

 

مرحوم حقیرخوئی

منبع کانال گنجینه گذشتگان