متن نوحه های ترکی و فارسی

احوالات دیر راهب

اي ياره لي باش دِيري گلستان اليوبسن

بو راهِبي رخساريوه حيران اليوبسن

جسميم باشا باش عشقيوه مستوريدي گويا

وار گوزلريون نوري خدا نوريدي گويا

بو مَعبَده خوش گلموسن اي قانه باتان باش

بيرجه دانيش اي گوزياشيمي قانه قاتان باش

بو باش نجه باشدي كيم ائدوب بيله جنايت

حلقونده نيه واردي بو قَد زخم و جراحت

الطافيوه شامل اليوبسن مني اي باش

اظهار اِله كيم سالدي بو حاله سني اي باش

ديلَّن ديله گل فاش اِله كيمسن سني تاري

آگاه اِله آلاميوه اي باش منِ زاري

علت نَدي گوزدن بئله دنياني آتوبسان

معلوميدي مطبَخده كول اوستونده ياتوبسان

صَرصَر يِئلي گلزاريمه گويا اَسيليبدي

واضحدي باشونان كي قفادن كسيليبدي

اي كاش بُولم بو باشيوون سلسله سينن

تُوز تپراقي سيلم گوزون هر گيله سينن

اظهار اِله بو ظلم و جنايت سَبَبينن

بيرجه دئگونن اُمُ اَبينَن ؛ نَصَبينن

آيا نه روادور كي بولوت تك دولاسان سن

فكر ايلمورم شخص سليمان اولاسان سن

سن حضرت آدم سن اگر بو نه فغاندي

حابيلي سن آيا نيه ياشون يارالاندي

يعقوب نبي سن هاني بَس يوسفون اي باش

يعقوب كيمين توكمه عذاره بئله قانياش

گر نوح نبي سن نيه محكوم بلاسن

طوفان زده سن ياره لي سن غرق دِما سن

يحياسن اگر بَس ذكريا لرون هاردا

يو سف سن اگر جمع زليخالرون هاردا

يونس سن اگر نهضتيوون همتي هاردا

موسي سن اگر امتيوون غيرتي هاردا

كيم قويدي كَسر ظلميله بو حلق مليحه

وار صورتيون اوخشاري سيماي مَسيحه

شايدَه كي عيسي اولاسان ؛حقه فداسن

اي ياره لي باش اولميا سن شخص خدا سن؟؟

طشت ايچره گلاب ايچره او مقصوده چاتان باش

بيردن بيره گلدي ديله دنياني آتان باش

اَمر ايلدي من مظهر خلاق جَليلم

سر لوحة خلقتلره برهان و دليلم

من سيد و سالار وحيد شهدايم

الله دگولم بندة ممتاز خدايم

قانيم منيم الله قانيدي روحه نه لازيم

من نوحي هدايت الديم نوحه نه لازيم

من باعثِ قبولي هر صوم صلاتم

پاينده ائدن خضري منم ؛ آب حياتم

من بَذل الديم روحِ شرف كُل جهانه

الياسي هدايت الديم باغ جنانه

گريانيدي پيغمبر خاتم منه خاطر

قبول اولونوب توبة آدم منه خاطر

زمزم منيم عشقيمده اولوب هاجره ظاهر

گلزار اولوب اوت شخصِ خَليله منه خاطر

موسي منيم آديمله شكاف ايلدي نيلي

اُول جلوة بَيضاسينه عشقيمدي دليلي

سالم آپاران يوسفي كنعانه منيديم

امداد اليين نوح و سليمانه منيديم

يحيالره يونس لره سرمايه منيديم

گهواره ده دَرس اورگدن عيسايه منيديم

من سِيدُالاَشباب جنان ، نور مليحَم

عيسي دگولم سرور عيسي مسيحم

بي نقص و شرافتليديلر ائيل و تباريم

پيغمبر خاتم دي منيم جَد كُباريم

باخ گوزلريمون نورينه من نور جَلييَم

بير باخ منه دقتله حسين ابن العَلييَم

من فاطميه روح و روان ؛ نور دو عينم

اللرده ئولن بي كس و مظلوم حُسينم

اي راهب بيگانه نَه گور دردهَ دُچارم

قارداشيم ئولوب اوغلوم ئولوب بيكس و يارم

شام اهلي بيزي گور نه يامان يوخلادي راهب

عطشان صود امر اصغريمي اوخلادي راهب

يان بو يارالي سيّدين آتشلي سوزونن

اوچ شعبلي اوخ وئرديلار عباس گوزونن

آلاله لريم پرپر اولوب ظلميله يكسر

قربان مَثَلي اكبريمي دوغرادي لشكر

ئولدوردوله يارانيله انصاريمي راهب

يولاردا دويوبلر بالا قيزلاريمي راهب

بير گونده اِله گِئدي منيم جاه و جلاليم

عريان دَوه لر اوسته گلور اهل و عياليم

شاماتيده آل الهي خوش يوخلويان اولماز

فكر ايلمه غم غصه لرين چوخلويان اولماز

وار علّتي اي پاك روان غرق فغانم

اوچ ياشدا قيزيم واردي اوقدري نگرانم

بو شهريده آثار جفا باشلياجاخدي

ناموسيمي قيزلاريمي ائل داشلياجاخدي

کربلایی رامین محمدزاده (پریشان)