متن نوحه های ترکی و فارسی

احوالات قتلگاه

چون لشگر اشتباه ایدوب امر شهادته

آراء مختلف اولوب اهل ضلالته

بعضی بو رائدیدی که تسلیم ایدوبدی جان

بعضی سی انتظاریدی معلوم علامته

بعضی دیردی قان چوخ آخوب ، حالی ضعف ایدوب

ممکندی وضعی زایل اولوب گلسون حالته

شمر ایستدی که کشف ایده بو سری یوز قویوب

بیر دسته لشگریله خیام طهارته

بی صاحب اهل بیت گورنده قوشون گلور

بیر حاله دوشدولر که سیخشماز حکایته

بعضی الی باشندا چکوب وا محمدا

بعضی سی یالواروردی گروه عداوته

تل اوسته چخدی زینب علیا جناب او دم

یوز دوتدی مصرع شه دین ولایته

عرض ایلدی حسین بولورم زنده سن هنوز

سن ئولمه میش سالور بیزی کفار وحشته

امداده گل که خوفه دوشوبدور حرم لرون

مشگلده قالموشوخ یتیشوب امر عسرته

آز قالدی نازنین بالالار زهره چاک اولا

یوخ بیر حمایت ایلین آل رسالته

السیز ایاقسیز عورت اوشاق الامان چکور

محشردی خیمه گاه ، حسین باخ قیامته

قارداش باجی سسین ایشیدوب آچدی گوزلرین

بولدی گلوب جفای عدودن شکایته

گویا او وقت او وقتیدی سلطان عاشقین

تاپموشدی وقت ، راز و نیاز و عبادته

باش سجده دن گوتوروب ایلدی قعود

قصد قیامیله حرکت ویردی قامته

تا یاره لر تکان یدی گوز گوز آچیلدیلار

قان آخدی سو کیمی ، جریان دوشدی شدته

ضعف ایلیوب یخلوب خاک و خون آرا

باخدی قوآء اربعه عاجزدی قوته

نچه قدم یوز اوسته سوروندی دیزی دیزی

تا بلکه اهل بیتینه گیتسون حمایته

گوردی که اقتداری گیدوب ظاهراً داخی

یوخ اقتداری مقتدر اولسون بو قدرته

تکیه ایدوب قلینجنا رقتلی حالیله

بیر صیحه ووردی لشگر بدکیش و فطرته

سویلوب نقدر ئولمه میشم اهل بیتمی

قورختمیون بیر آز گلون آخر مروته

سیزلر منیله ، من سیزیله ایلورم قتال

عورت اوشاق که مقتدر اولماز جنایته

تحقیر ایتمیون داخی سیز ئولدورون منی

تا منده وار نفس دوزه بولمم حقارته

انصاف ایدون مروت ایدون ، بیر حیا ایدون

سالمون منی بو صون نفسیمده مشقته

شمر دنی بو حالده یوز دوتدی لشگره

ایتدی خطاب غیظیله قوم شرارته

مطلب بودور بولون که هنوز ئولمیوب حسین

من واقفم بو خسرو صاحب حمیته

ایتمز قبول غیرتی کف کریم دور

تا ئولمیوب ، عیالی دوشه خوف و وحشته

اول اوز امرینی بو غریبون تمام ایدون

اوندانصورا شروع ایدورخ نهب و غارته

لشگر قیتدیلر هامی بغض و عنادیله

یوز قویدولار او خسرو بی یار و نصرته

هر فرد فرد وورماقا تعجیل تام ایدوب

تا تیز یتیشسون امر شهادت نهایته

بیر نازنین وجود نچه مین یارا ووران

اولموب محل مساعد او انبوه کثرته

آلات حرب هواده دگوب بیر بیره تمام

دگمزدی چوخ سلاح وجود امامته

سبقت ایدردی یاره ورونلار بیری بیره

بولمم وورادیلار او غریبی نه نیته؟

گویا که امر حضرت پرودگاردور

بیر یاره وورسون هر کس حضوراً او حضرته

چوخ کشمکشلر اولدی، قوشون یخدی بیر بیرین

طبعاً بو کشمکش سبب اولدی لجاجته

آخر بولوک بولوک بولونوب لشگر نفاق

جوخه به جوخه یاره ووران دوردی نوبته

بیر جمع او قدری نیزه یاراسی ووروب دویوب

ایلردی واگذار بیر اوزگه جماعته

خنجر ووران او قدر ووروب خنجر ال چکوب

نوبت یتردی صاحب تیغ شقاوته

خط اوسته یاره خط سالوب ازبس او گل بدن

بنزردی سطر سطر یازیلموش کتابته

اعضا ورق ورق داغیلان بیر کتاب تک

شیرازه دن چیخوب دوشوب آشفته صورته

آیریلدی قطعه قطعه بدن بند بنددن

از بسکه وصل اولوندی جراحت جراحته

هر بیر جفانی اهل جفا ایتدیلر ولی

جور و جفا یتیشمدی حد کفایته

بیر جمع سنگدل یتوب الده اتکده داش

بولمم دیوم ؟ حجاب چکوم یا روایته

بیر کس دیمزدی رحمه گلون ورمیون داخی

آخر ووران ترحم ایدوب گلدی رقته

بیر اوزگه ظلم ده وار اونی ایتمرم بیان

قدرت دلیمده یوخدی داخی بو عبارته

قان صاحبی امام زماندور ، اوزی گلوب

شرح و بیان ویرر بیله ظلم و جنایته

یارب نه وقت اولار که او قان صاحبی گلوب

بو قانلاری آلوب ، سالا معنانی صورته

(ذهنی) قلم دایاندی ، ذیحقدی شبهه یوخ

منده مقیدم بو مباحثده صحبته

ایله نصیب (کاتبه) هم (ذهنیه) خدا

بیر وقفه حاضرینیله گلسون زیارته.

مرحوم استاد مشهدی علی اصغر ذهنی

منبع مجموعه کانالهای مدح و مرثیه