متن نوحه های ترکی و فارسی

احوالات حضرت ابوالفضل (ع)

گریز از احوالات غدیریه

بخش اول

 سو آدی گلدی دوشوب یاده تشنه لب سقّا

او یادگارِ علی ، شیرِ بیشهء هیجا

او دم کی گیردی فراته سوسوز دوداقیله

ازل باخوب سویا بیر وجد و اشتیاقیله

اولوبدی گوزلری خیره ، گوروب سویون موجین

اوزین ایتوردی ، سودان دولدوروب ایکی اوجین

جگر اودین او سودان ایستدی ایده خاموش

تجلیّاتِ محبّت گتوردی باشنه هوش

سوسوز امامی او ساعتده یادینه سالدی

امام بیلدی نه حاله که قارداشی قالدی

خطاب ایلدی اوز نفسینه عتابیله

اوزین آییتدی دوباره همان خطابیله

حسیندن صورا ای نفس هر زمان خوار اول

گر ایستسن اولاسان اولما ، بیرجه هوشیار اول

امام تشنه دی ایستر ایچه ئولوم جامی

سو ایچمگون دگل هرگز محبّت انجامی

وفا خطین هامی سندن گرکدی مشق آلسون

روادی سن ایچه سن سو ، حسین سوسوز قالسین؟

ایله مقامیده عباس نفسین ئولدوردی

تمام عالَمه مهر و وفانی بیلدیردی

اوزینه واجب و لازم بیلوب سودان گچسون

او قدر جهد ایلسون سو یرینه قان ایشسون

سرشک دیده سین اوجونداکی سویا قاتدی

ایچنمدی او سویی ، گوتدوگی یره آتدی

الین بوشاتدی گوروب قلبی مِهریله دولودور

بلی بودور اثرِ حُبّ ، بو وفا یولودور

ایکی اووج سودان ال چکمگی اونون خوشدور

الی دولی گله حشره ، دیمه الی بوشدور

فراتدن ولی دولدوردی مشکین آبیله

او مشگی چگننه سالدی چوخ اضطرابیله

نه مشگ آب ، اولوب تار و پودی تارِ حیات

سوسوز اوشاقلارا اول مشکیدی ، امیدِ نجات

سو جامی الده گزر خیمه لر کنارینده

امام قیزلاری اول مشکون انتظارینده

سرشکِ دیدهء زینب کیمی فرات آخور

حیاتِ آلِ رسول خدا او مشگه باخور

دولار سرشگ لریندن اگرچه دریالر

او مشکی گوزلوری مجنون مثال ، لیلالر

ال آتدی قبضهء شمشیره حیدرِ ثانی

رکاب چکدی عقابه او  عشق قربانی

نهنگِ بحرِ وفا ، کثرتِ تولّادن

سوسوز گیروب سویا لب تشنه چیخدی دریادن

سو ایچمدی او سوسوز ، کثرتِ محبّته باخ

تصوّر ایله مواساته باخ ، اُخوّته باخ

هواده رعد کیمی برق ووردی شمشیری

اوجالدی نعرهء تسبیحی ، صوتِ تکبیری

صاق الده تیغِ شرربار ، صول النده علَم

ایدردی لشکرِ کفّاره حمله ، چون ضیغم

عدوی اهلِ حقیقت ، صدیقِ اهلِ مجاز

کسن شریعه نی دورت مین پیاده ، تیرانداز

گوروب بو حالی ، هامی اوخلارین کمانه قویوب

او بیر نشانه نی دورت مین نفر نشانه قویوب

صاقا صولا دالیه دوندوردی سینه سینی

گلن خدنگه ویریردی نشان خزینه سینی

بولوردولر که یغوب نقدِ عشق ، سینه سینه

آچاردی هر اوخ آتان بیر قاپو خزینه سینه

یاراردی صفلری دشمن شکار صفدر تک

پوزاردی دسته لری اوز باباسی حیدر تک

ووراردی آتلی باشندان قلج او شیر اوژن

چیخاردی تیغِ شرربار تنگِ مرکبدن

بودور طریقِ بیان و مُبرهنِ مطلب

که بیر یره یخیلوردیلا راکب و مرکب

دگوب یخاردی قاچان آتلولار پیاده لری

اولوردی اکثرینون مرگ استفاده لری

قاریشدی بیربیرینه هرج و مرج اولوب صفلر

داغیلدی مور و ملخ تک حسابسیز لشگر

عیان اولوب او بیاباندا شورِ رستاخیز

قاچان قاچوب ، قالانا قالمیوبدی راهِ گریز

ووروردی قان چوخنون قورخودان ایکی دوداقی

دایاندی کوفیه آخر قاچانلارین قاباقی

ایله ایدردی یمین یسار ، قلب و جناح

که قالمامیشدی داخی بیر کسه امیدِ فلاح

دوشوبدی لرزه چوله ، پرچمِ لواسیندن

دوتولدی گوشِ فلک الحذر صداسیندن

ایتوردولر قوشون اهلی ایله بیر بیرینی

که بیر نفر تاپا بولمزدی اولدوقی یرینی

توکوب گچوردی او قومی بسانِ برگِ شجر

بو ضرب شصته مگر بیرده کیمسه تاب ایلر

قویاردی هر طرفه یوز قاباق آچوخ یولیدی

هواده بیر بیره پیوند ، باشیدی قولیدی

یوزینه قطرهء اشکین توکردی اشگ اوسته

گزردی طایرِ روحی ، همیشه مشک اوسته

دگلدی فکری لبِ تشنه و کبابینده

خیالی قالموشدی بیرجه مشک آبنده

اگر چه جسمی یارالیدی جانی خسته ایدی

هامی مجاهدتی حفظِ مشگه بسته ایدی

آپارماقا او سوئی خیمیه اولوب مایل

گلنده اوخ ، قولین ایلردی مشگنه حایل

دیردی بلکه چکه رنج و محنتی یتوره

او مشگی خیمه ده کی تشنه لبلره یتوره

دیردی بو سوئی بیر خیمیه یتورسیدیم

سکینه قلبی سینقدور ، اله گتورسیدیم

بو گیر و دارده بیر دشمنِ خدا یتدی

آقاج دالندان ، او بی یاوری کمین ایتدی

حسینِ فاطمه نون اختارینی آلدی

او صاحب عَلمون صاق قولین یره سالدی

و لیک ویرمدی تغییر ، حالِ اوّلنه

دوشه دوشه صاقی ، آلدی قلینجی صول النه

اولوب بو قصّهء جانسوزه راوی مطلب

بلا خزینه سی مظلومهء جهان زینب

دییر که دورموشیدیم قارداشیم حسینیله

همان او لحظه ده تلّ اوسته شور شینیله

که ناگهان ساری گل تک سارالدی رنگِ امام

بدون اینکه ایدم قارداشیمدان استعلام

کمالِ حُزنیله باخدیم او قانلی میدانه

ایدردی قارداشیم عبّاس جنگ مردانه

او شاهه عرض ایلدیم ای امامِ جنّ و بشر

سارالدی رنگِ شریفون گینه نه واردی مگر؟

هنوز ایلور علمدار جنگ میداندا

قلینجی برق وورور هر طرفده هر یاندا

بیوردی ای باجی ایلور نبرد ، او کانِ وفا

هزار حیف که صول اللّی ایلیری دعوا

دوباره قلیدی کمین بیر ستمگرِ بی دین

قلجلیوب صول النده ، یره سالوب او لعین

تعجبّم او رشیدین بو گوردوگی ایشینه

قلینجی مشکیله باهم نجه آلوب دیشینه؟

بو یرده بیر نچه سوز وار گرک مقاله گله

سوز اهلِ دل سوزیدور ، گر بیانِ حاله گله

اگرچه ایچمدی آبِ فراتدن عباس

سو ایچماقنا معذوریدی او زبدهء ناس

حسینِ تشنه لبی یاده سالدی ایچمدی سو

الین یوزین یومادی ، نولدی بَر طریقِ وضو

که دستمازیلی اولماق اولیدی اوز نظری

حرارتِ عطشین سوندورردی سو اثری

اولوردی ممکن اولا بیرده بیر نماز قیلا

اشاره ایله خداونده کشفِ راز قیلا

همین بو نکته نی مدّتدی من خیال ایدرم

جواب ویرّم اوزوم ، چون اوزوم سؤال ایدرم

حسین جمالینی گوردی سودا ایتیردی اوزین

حرام بیلدی سویا باخماقینی ، یومدی گوزین

وجودینی او سو بیر منجنیق تک ، سیخدی

خیالی سهلیدی روحین سودا قویوب چیخدی

گوروب که تیرِ جفا مشگین ایلدی پاره

توکولدی سو یره ، یوخ دردینه داخی چاره

امید رشته سینی قطع ایدوب حیاتیندن

رضا اولوب ئولومه ، گچدی اوز نجاتندن

گلوب بیر اوخدا اوز آنّندا دگدی بند اولدی

دوباره گوزلرینون جامی قانیله دولدی

چیخاتماقا او اوخی اگر چه اللری یوخیدی

شجاعیدی ولی ، از بس رشادتی چوخیدی

باشین قویوب دیزینه ، ایستدی که زور ویره

اوخی چیخاتدی ، و لیکن عمامه دوشدی یره

آخا آخا یوزه قا ،ن چشمِ نازنینیدن

ایکی دیزیله چیخاتدی اوخی جبینیندن

اشاقه سالدی باشین ، تا آچوخ قالوب باشی

دولوب گوزوندن آخان قانیله اَیَر قاشی

خضوعه سیر ایله ، بیر کثرتِ خشوعنه باخ

دالنجا سجده سی وار ، ایمدیده رکوعنه باخ

زیارتنده اوخورسان یانقلی بیر دِلیله

که ئولدوروبله سنی هم دلیله هم الیله

یتوب او وقته بیر ظالمِ ستم پیشه

بیلوب که یوخ داخی علّت هراس و تشویشه

آت اوسته بیر دوزَلوب آهنین عمود الده

ووروب او بیکسه بیر دل یاراسی اوّلده

دئدی که بس نیه عباس ایلمورسن جنگ؟

مگر که ایتممیسن عرصه نی بو لشگره تنگ؟

بویوردی اوندا گلیدون که قولّاریم واریدی

او شاهبازیدیم اوچماقه شهپریم واریدی

الیم که یوخدی اوزومدن ایدم مدافعه من

دلیوی باغلا ، الون آچ ، ایله نه ایتملی سن

دئدی سنون گر اولون یوخ ، ولی منیم وار الیم

الیمون اولماقینی ایمدی بیلدیرَر عملیم

دمیر عمودی ایله ووردی کاسهء سرینه

که کاسه سینده اولان گلدی دولدی گوزلرینه

ایله شکست تاپوب بیر دمیر عمودیله

که اول باشین عدمی بیر اولوب وجودیله

اولوبدی کیسهء سر پاره بیر نمودی قالوب

توخونموشی توکلوب بیر جه تار و پودی قالوب

( ازیلدی باش ، داغیدوب اَتلرین نُمود ایلدی

سوموگلی اَتلی قاتوب بیر بیرینه خورد ایلدی)

بیلوب تیمّمنی باعث اوز تقدّمینه

دوباره ایستدی مشغول اولا تیمّمینه

یر اوسته مَسح ایده توپراقی یوز گوزی اوسته

عقابدن یره سالدی اوزین ، یوزی اوسته

دوشنده سسلدی گل قویما سرّیم اولسون فاش

یارالیم ئولورم قارداشیوی تاپ قارداش

باتاندا گل یوزی توپراقه سجده حالینده

واریدی کسرِ تیمّم گینه خیالینده

او سجده نی گوروب افلاک شوریله دولدی

تیمّمنده همان سجده سی بیر عضو اولدی

یارا سیزیلدیسی اوز ناله سی او شوریله

ویروب مقابله طبلین او عرصهء طوریله

یر اوسته صاق صولا از بس یوزین سورتردی

تمام صورتینی توپراقه اورتَردی

بیلوردی ایستسه یتسون تمام مقصوده

گرک یوزین ایلسون خاک و خونه آلوده

که باشی اوسته گلنده او شاهِ عرش اساس

قویا قدملرینه بیله بیر یوزون عبّاس

گینه خیالیمه بیر سوز گلور که مجبورم

اونی دیماقا گذشت ایلیون که معذورم

ادامه دارد...

مرحوم صافی تبریزی

منبع مجموعه کانالهای مدح و مرثیه