متن نوحه های ترکی و فارسی

ازدواج امیرالمومنین حضرت علی (علیه السلام)

و حضرت فاطمه زهرا (سلام الله)

گون او گون اولدی گیدور زهرا عروس

اولدی حوریلر بو عروسه پای بوس

چخدی ائودن فاطمه خوش حالیلن

آلدیلار اطرافینی اجلالین

قیز عروس اولسا اولا خوشدور آنا

ایلیر حاضر جهازیّه اونا

اوندا زهرانون یوخیدی مادری

آغلیوب آغلاتدیلار پیغمبری

ناقه اوستونده عروس مه جمال

قدی طوبا شبه طاها خوش خصال

هاشمیّه قیزلار آلدی دوره سین

میر شب سالدی قرانلق پرده سین

اُم ایمن، فضّه و اسماسی وار

مین آنادان مهربان باباسی وار

نه آناسی واردی نه قارداشی وار

گوزده مروارید تک گوزیاشی وار

نور رخساری چخوردی گوگلره

غرق شادی دور مدینه یکسره

گوگده اولدوزلار باخور چشمک ورور

صاق صولا رقص ایلیور زیبا آخور

سسلنور حور و ملک یا فاطمه

سسلنور چرخ فلک یا فاطمه

قالمیوبلار بیر او قدری منزله

منتظر داماد، ائوه زهرا گله

دوردی ناقه دوردی ناگه حاضرین

بو توقُّفدن وله دور عابرین

حضرت پیغمبر اولدی باخبر

منزل داماده زهرا گتمیر

علّت اِستِفسار ایدوب شاه زمن

ای قزیم ایتدون توقف بس ندن

عرض ایدوبدی آزدی مهریّم بابا

ایتدی فرمایش عجب الان بالا

عرض ایدوبدی مرتضایه مایلم

اوز عم اوغلومدور اونیلان یک دلم

تا دوتوب پیغمبرین قلبین محن

نازل اولدی جبرئیل خوش سخن

سویلدی ای افتخار کائنات

ابتلا بحرینده کشتی نجات

حق تعالادن گتوردوم من سلام

امر ایدور زهرا نه ایستور حاضرام

اختیار جنّتی ویردیم اونا

قویما آز مهریّه دن قلبی سنا

کلّ افلاکی یری دریالری

کهکشانلاری بو ماه و اختری

امر رحمانی یتوردی دختره

اولمادی راضی خانم بو سوزلره

آز قالوب خُلق عظیم اولسون پریش

قلب پاکی غمدن اولسون ریش ریش

ایتدی فرمایش قزیم دردون نه دور؟

شمع عشقیم جان سنه پروانه دور

دوردومنجی آسماندا جشن وار

ورما بو جشنی بهم ای گلعذار

مقصدون بو مهریدن گلمور اله

بو سکوت عالملری ایلوب وله

آچدی دل گفتاره اول مریم شیم

عرض ایدوب بابا علیدن راضیم

ایستورم الله عنایت ایلسون

اُمّته زهرا شفاعت ایلسون

نازل اولدی جبرئیل خوش قدم

قول حَقلن عرض ایدوب ای ذوالکرم

ویردی کتباً قول ذات ذوالجلال

فاطمه قلبین دیدی بو سوزده آل

گور روادور بو خانم مظلوم اُله؟

سینه سین مسمار ظلمیلن دله

شاخ برگ زندگیسی تز صولا

غنچه سی گول ویرممیش پرپر اولا

ال دگرمانی چکن الدن عدو

تازیانه وُردی گور انصافدی بو؟

ظلمیله درگاهی اودلانسون بلی

ذوالفقاره هی باخوب یانسون علی

بسدی «عینی فرد» قورتار مطلبین

شعریلن ترویج ایله مکتبین

 حاج غلامرضا عینی فرد زنجانی