متن نوحه های ترکی و فارسی

ازدواج حضرت فاطمه زهرا (سلام الله)

با امیرالمومنین حضرت علی (علیه السلام)

فاطمه یار وفادار علی

هر کشاکشده هوادار علی

فاطمه نه فاطمه حورا سرشت

آستان اقدسی رشک بهشت

رشد ائدوب محبوبهء پروردگار

اولدی بیر عده بتوله خواستگار

محضر طاهایه اشراف عرب

چوخلاری گلدی که اولسون منتخب

سویلدی طاها او باغ حقه گل

اختیار فاطمه منده دگول

نازل اولدی پیک حق دلده سلام

جانب حقدن دئدی گتدیم پیام

امر ائدور خالق حق اعلا منم

مالک دنیا و مافیها منم

لاشریکم حکم و فرمان منده دور

اختیار کون و امکان منده دور

فاش ائدیم بو مطلبی بی واهمه

بولسون عالم که منیمدور فاطمه

دهریده هر مدعی عاشق دگول

هر گلن بو وصلته لایق دگول

یا رسول الله بودور ختم کلام

لایق زهرا علیدور والسلام

مرتضا مظهردی وجه باقیه

کوثر مواجی وئردیم ساقیه

ایستورم بو ماهه دورد اولدوز وئرم

حیدره زینب کیمین بیر قیز وئرم

سولماسین تا اینکه بو باغ و چمن

بیر حسن وئرم حسن اندر حسن

بیر حسین وئرم بو زوج اطهره

تا قیامت آدی دوشسون دیللره

من حسینی کربلایی ایلرم

راه قرآندا فدایی ایلرم

بو پیامیله اولوب مطلب تمام

ناگهان ائتدی ملک لر ازدحام

بیت معموره یغشدی قدسیان

جبرئیل اولدی بتوله عقدخوان

بو خبردن قلب طاها شاد اولور

سس دوشوبدور که علی داماد اولور

خلد اعلایه دوشوب بیر آیری شور

تهنیت گویان گلوبدور شوره حور

سسلنوبلر که دگول وقت جلوس

بنت طاها فاطمه اولدی عروس

وقت او وقت اولدی عروس نوجوان

بخت ائوینه شوقیله اولسون روان

بی سبب چشم پیمبر دولمادی

حیف اولا اوندا خدیجه اولمادی

نیلدی گور دختر حبل المتین

سائله وئردی خانم طوی کوینگین

میندیروب طاها عروسی ناقیه

کوثری تحویل وئردی ساقیه

سویلدی زهرادی بو ای خوش سیر

بیر توکی الحق که جناته دئیر

سن بونا گر عم قیزی ائتسن خطاب

جان عم اوغلی سسلنر بو مه نقاب

عصمت کبرادی بو عالی تبار

دوشسه بیر یپراق یوزونده خط سالار

یا علی بند دل طاهادی بو

صورتی نیلی دگول زهرادی بو

الغرض زهرا اولوب یار علی

همدم و دلدار و غمخوار علی

بولدی عالم بو سوزی بی واهمه

تا قیامت حیدریدور فاطمه

باغلانوب روز ازل پیمانلاری

جسمه باخما بیردی روح و جانلاری

گرچه جسما" هر بیری شایسته دی

لیک روحا" بیربیره پیوسته دی

گل جمالیندن که رد اولدی نقاب

خانهء حیدرده چیخدی آفتاب

کوثر طاهایه باخ گور نیلدی

بیر باخیشدا ساقینی مست ایلدی

هر قدر زهرا واریدی بیش و کم

مرتضا هیچ گورمدی عمرونده غم

دوقوز ائل اولدی بو ایام سرور

پوزدی بو آرامشی قوم شرور

تا گوزون یومدی پیمبر قوم شر

بی اجازه وحی ائوینه گلدیلر

یوز وئروبدور عصمت اللهه خطر

سالدی تا جاندان اونی دیوار و در

سسلدی فضه ئوزون امداد گل

محسنیم ئولدی اماندور داده گل

قوی دیوم قالدی نه حاله بوتراب

ئوز ائویندن چیخدی بوینوندا طناب

(صادقی) هرنه وارون شعر و شعور

ئوزلری احسان ائدوب تاپما غرور

حضرت مولادن ایسته عجزیله

خاطر زهرا سنه وئرسون صله

استاد صادقی (شیدا)