احوالات کوچ از قتلگاه

 

ای قانه باتان سو اوسته عطشان ائل طایفه‌دن آرالی قارداش

زینب بو یارالی جسمه قربان غربتده اولن یارالی قارداش

 

زینب نجه گلمسون نوایه ای پادشه مدینه سنسیز

اولدوردی سنی سوسوز رعیت غربت ده گوزون سودا وطنسیز

گونلر قاباقینده پاره پاره عریان بدنون قالیب کفنسیز

نه وار کفن ایلین تدارک نه دفن ائدنون یارالی قارداش

 

ای کشته راه معنویت وی معرکه‌ی وفاده سلطان

ای حامی مذهب و شریعت ای جانون ائدن فدای قران

وئردی بو شهادتون حقیقت قرآنیله دینه تازه بیر قان

منده بو اسارتیله قیلّام تعقیب همین روالی قارداش

 

از بس یارا اوسته یاره آلمیش گل تک بدنون اولوبدی خندان

قان شبنمی برگ گللر اوسته واقعده وریب صفای شایان

بو قتلگه وفانی عطرون ایلوبدی صفالی بیر گلستان

ناله ایده جاق قانون آلینجا هر بلبل خوشنوالی قارداش

 

سن زاده شاه اولیا سن من دخت شهنشه ولایم

دین حقه سن فدا اولوبسان آماده‌ی رنج و ابتلایم

زین اَب اولان بلالی زینب زهرای زمین کربلایم

صبریمده آنام کیمی صبورم وار منده آنام خصالی قارداش

 

افسوس امیدیمین بهارین تاراج الیوب خزان اپاردی

شادی گلیمی آلیب الیمدن باد غم اولوب وزان آپاردی

قان موجی وروب باشوندا آشدی وردی سنی یخدی قان آپاردی

ثارالله اولان اوزی آتاسی الله قانی خون آلی قارداش

 

سن یات بو دیار کربلاده قارداش بو وفالی ائلریله

قول باغلی گدیم دیار شامه منده بو شکسته دیلریله

قوی قلبیمی داغلاسون رقیه یولدا بو یانیقلی دیلریله

سن اصغرون آل کناره منده مهریله بو مه جمالی قارداش

 

ای لفظ وفا و مهره میزان  ای گلشن عشق باغبانی

زینبدی گلستان عشقون خوش نغمه لی مرغ نغمه خوانی

مین شوریله نغمه حسینی دیلده گزورم بو گلستانی

سرتاسر نینوانی قلام اوز نالمیله نوالی قارداش

 

سندن صورا هر بلا منیم کی قربانگه کربلا سنون کی

هر شور منیم نوا منیم کی بو وادی نینوا سنون کی

شاماتیده هر جفا منیم کی بو گلشن باصفا سنون کی

قال کرب و بلا صفاسون آرتور ای روح صفا صفالی قارداش

 

سن سن که سنون بابان پیمبر ائتدی دل شبده سیر کیوان

سن سن که آتان سنون ائشیتدی اسرا گجه سی رسول رحمان

سن سن که محبتیله جدون اوز چیگنینه میندیرردی هر آن

گورسون نجه تپراقا یخیلمیش باغینده اولان نهالی قارداش

 

گر اولسا امانیم اشقیادن بیر عمر بو قتلگهدا قالّام

دائم کسرم سنون کنارون عطرون یارالی مشامه آلّام

خوش لحنیله اوخشارام حجازی بو دشت عراقه شور سالّام

همناله سیزیلتیمیله قیلّام دشت و دمن و جبالی قارداش

 

چوخلار اولونوب قتیل اعدا چوخ ائولر اولوب ستمله ویران

چوخ ائولر اولوب ستمله ویران چوخ خیمه اولوب ستمله سوزان

تاراجه گئدوبدی چوخ حشملر چوخ خیمه لری ائدوبله تالان

بیز تک سویولوب دویولمیوبدی هیچ بیر شهون اهل و آلی قارداش

 

زهرا آنام اشکی قانیویله باهم توکولوبدی کربلایه

بیر خاک شفا اولوب بو تربت هر درد و مریض بی دوایه

سالسا اوزونی مریض اولانلار گر خاک شفای کربلایه

جدیم بویوروب آلار شفاسین ای تربتی چوخ بهالی قارداش

 

ای مهر و محبت عالمینده بیر روشنیه دم سپیده

شامه آپارولا دست بسته گلدیم بو یول اوسته سنله دیده

گر دیدیمه ایلسن عوض گل ویرانه شامه بازدیده

گوزلور یولوی خرابه یرده هشتاده یاخین عزالی قارداش

 

(تائب) که قلم الینده واردور بیر عمر حسین حسین بیانی

هم نوحه یازار همی اولوبدی اولاد رسول نوحه خوانی

عمری قوتولوبدی سندن ایستر جمعیله برات کربلانی

ایسته اوخوسونلا دیلده آدون اوردا بو زبانحالی قارداش

 

مرحوم تائب تبریزی