متن نوحه های ترکی و فارسی

احوالات قتلگاه

داد او ساعتدن دوشوب ارکانِ عرشه ولوله

سبطِ طاهانی سالاندا مَرکب اوستن مقتله

هولیله تاجین آتوب باشدان یر اوسته جبرئیل

سسلدی اللهُ اکبر سالدی کونه زلزله

کعبه و منا و رمزم ، ایلدی بیر زمزمه

کعبهء مقصود ایدنده قان ایچینده هروله

جانِ عالَم قوملار اوسته ، قان ایچینده ضعفیده

دوشدی سُکّانِ سماواته خروش و غلغله

شمرِ دون سسلندی ایمدی من بولوندورّم سیزه

بیر سیاستله اولار سیزلرده رفعِ قائله

ویردی فرمان لشگره ، اولدی ایکی حِصّه قوشون

ایستدی اوز بولدوقی مقصودی تا گلسون اله

خیمه لر اوسته یریتدی لشگرین بیر حصّه سین

دستهء دیگر هارا گیتدی گیچاق ، قالسون هله

تا چالیندی کرّ و نای و طبل و طنبور و دُهُل

آز قالوب خوردا اوشاقلار خوف و وحشتدن ئوله

گون کیمی زینب طلوع ایتدی کنارِ خیمه دن

تا نظر سالدی او وضعِ سخته ، امرِ مشگله

اللری باشدا قاچوب تلّه هرایه سسلدی

قارداشی شاید که بیرده بلکه فریاده گَله

رحمسیز دشمن الینده قالدی خوردا قیزلارون

داده گَل قارداش دگل هنگامِ صبر و حوصله

زینبِ کبرادن آلدی شاهِ مظلومان سسی

قان ایچینده بیر دوروب اگلشدی پوزقون حالیله

سسلدی من ئولمه میش لشگر ، هله قورخوتمیون

بانوانِ عصمتِ طاهانی سیز بو نوعیله

من عرب ، سیزده عرب ، انصاف ایدون ای کوفیان

بی پناه عورت اوشاق ، بو هایهو بو هلهله

ویرمیون الدن عرب رسمین ، نقدری من صاقام

خیمه گاهه گیتمیون ، ایتمون جسارت بیر بئله

لشگره برگشت فرمانین ویروب شمرِ دنی

نَهبدن محروم اولان لشگر ایدوبله هلهله

قیل و قال اولدی ، او اثناده قوشون یول آچدیلار

بیر طرفدن گلدی خولی ، بیر طرفدن حرمله

داش وورانلار بیر طرفدن آلدیلار دور و بَرین

بعضی سی الده قلج ، بعضی ووراردی سنگله

کشمکشلر اولدی ووردی اولقَدَر یاره عدو

شرحینه من عاجزم ، گیت بیر اوزون باخ مقتله

نقشهء جسمین پوزوبدور یکسره آلاتِ حرب

برگ برگ اوراق اولوب ، بنزردی بیر خندان گُله

مقتلِ شاهِ شهیده یتدی اولوقته سَنان

شل اولیدی اللری ، تا نیزه سین آلدی اله

نیزه نی ایله ووروب غیظیله تشنه حلقینه

بند اولوب نوکِ سِنان ، دوشدی یوز اوسته مقتله

نیزه نی خارج ایدوب ، ووردی دوباره کِتفینه

ظلمِ اعظمدن دوشوب کون و مکانه ولوله

سعدین اوغلی ویردی فرمان لشگره تعجیل ایدون

ئولدورون گَلسون منیم نخلِ امیدیم حاصله

قتلِ شاهِ بیکسه مأمور اولوب نچّه نفر

اهلِ دل لازمدی دلدن بو بیاناتی بوله

هیچ بیری اقدام ایدنموب قتلِ شاهِ بیکسه

قاتلی تصویب اولوب شمرِ لعین و دون گله

آیریلوب شمرِ ستمگر لشگرِ گمراهدن

مصرعِ شاهنشهه گلدی دوروب ، بی فاصله

بیر طرفدن زینبِ کبری‌' چیخوب خرگاهدن

بیر طرفدن شمرِ ذی الجوشن گلوبدی مقتله

مخزنِ علمِ خدایه چکمه لی قویدی قدم

کینهء دیرینه سین تا که یتورسون کامله

من دیمم نه ظلم ایدوب ازّلده شاهِ بیکسه

قویدی خنجر ، حنجرِ سلطانِ دینه ظلمیله

زور ویردی هر قَدَر ، خنجر بوغازین کسمدی

دوندروب سالدی یوز اوسته ، شاهِ دینی غیظیله

ایتمدی شرم و حیا ، جدّی پیمبردن او دون

کسدی لب تشنه باشین ، گلمز داخی شرحی دِله

سخت مبحثده دایاندی چون شهادت وقعه سی

(روفه گر) وورما قلم ، ایتمه جسارت بیر بیله.

مرحوم روفه گر

منبع مجموعه کانالهای مدح و مرثیه