متن نوحه های ترکی و فارسی

احوالات خرابه شام

سوال و جواب

گوزینده اذن ویروبدور رقیّه گوز یاشینا

بو دللریله خطاب ایلدی آتا باشینا

نه یاخشی گلموسن ای شاهِ تاجدار بابا

دوتوبدی گور نجه رخساریمی غبار بابا

خرابه یرده نه مدّتدی گوزلورم یولوی

نه علّته منی قویموشدون انتظار بابا

چوخ آغلادیم بو گجه کردگاره یالواردیم

یوزون گورم ئولم ، ای صاحب وقار بابا

دعا اوخودوم هدفِ استجابته دگدی

یتوردی مقصدیمه حیّ کردگار بابا

بابام گَلیدی دیردیم گوریدی بیر یوزیمی

ایدوب نجه ستمِ شمر زخمدار بابا

باشیما یولدا ویروب تازیانه زجرِ شریر

منه او کافر ایدوب ظلمِ بیشمار بابا

او قدر خارِ مغیلان باتوب ایاقلاریما

ایدوبدی قلبیمی چون لاله داغدار بابا

منی او قدر عدو پا پیاده یول گَتوروب

که قالمیوبدی داخی تاب و اقتدار بابا

ایله دوداقلاریمی قورخی چاک چاک ایلیوب

که قالمیوب دلِ صدپاره ده قرار بابا

اوزون جِداده گوردون دویولّه سووگُلوی

عجبدور ایلمدون شامی تار مار بابا

سنی شهید ایلینلر منی اسیر ایلدی

دونیدی کاش گوروم دورِ روزگار بابا

الیمده چون یوخودی چاره دینمدیم دوزدوم

نقدر ووردی منی قومِ کین شعار بابا

یریم خرابه ، گجه گوندوز استراحت یوخ

گوزوم توکر یوزیمه دُرّ شاهوار بابا

تمام اولوب گورَسن درد و محنتیم یا نه؟

ایدیدی درک منی کاش احتضار بابا

یزید کاخینی سیلِ سرشگیله یخارام

جلالینی ایدرم محو و تار مار بابا

اگر ئولم باباجان قبریم اوسته کیم گله جاق؟

غریب قبری اولار خلق ایچینده خوار بابا

هارا مسافرت ایتسن منی یانونجا آپار

بو سوگلی قیزوی قویما اشگبار بابا

یوزیوی قوی یوزیمه بیر اوپوم جمالوندن

بو بیقرار دلیم تا تاپا قرار بابا

(حسینی) ذیلِ عنایاتیوه ووروبدور چنگ

سوزی جهاندا قالا بلکه یادگار بابا

ز بس رقیّه دیوب دردِ دل اولوب بی تاب

زبانِ حالیله ویردی آتاسی بیله جواب

سنون دوتوب گُل رخساروی غبار قیزیم

منیم یوزیمده تاپوب ، کولدن استتار قیزیم

اوزوم بیلوردوم عزیزیم منی گوزتلیردون

که قویمادیم گوزوی یولدا انتظار قیزیم

سنه خرابده یاتماق بالا دگل ذلّت

خرابه لرده اولار دُرّ شاهوار قیزیم

ایدوب سنون یوزوی لاله رنگ ، سیلی شمر

منیمده صورتیمی ، تیغ ، زخمدار قیزیم

سنون اگر باشوا تازیانه چوخ وورولوب

دگوب منیم باشیما زخمِ بی شمار قیزیم

ایاقلارون قابارین چوخ منه نشان ویرمه

یارالی قلبیمی آز ایله داغدار قیزیم

چوخ اینجیدوب سنی یولّاردا ساربانلار اگر

چوخ اینجیدوب منیده یولدا نیزه دار قیزیم

سنون دوداقلاریوی قورخی چاک چاک ایلیوب

منیم دوداقلاریمی ضربتِ فنار قیزیم

جِدا باشیندا گوروردوم ووراندا قمچی سنه

کومک لیقا یوخودی نیلیوم اقتدار قیزیم

سوسوز شهادته یتماق منه مُقدّریدی

سنون اسارتون ایستوردی کردگار قیزیم

رضای حقّیدی احیای دینیدی دوزدوم

نقدر ظلم ایلدی قومِ کین شعار قیزیم

یتوبدی باشه مقدّر اولان بَلیّاتون

یوزونده گورسنوری حالِ احتضار قیزیم

ابوتراب عزیزی یاتار تراب اوسته

بودور همیشه بلی وضعِ روزگار قیزیم

خدا عزیزینه ذلّت دگل اسیر اولماق

بیز اهلِ بیته اسارتدی افتخار قیزیم

دایان مصائبه تا صبرون اولماسون ناقص

یتر تمامه بو ایّامِ ناگوار قیزیم

یوزیمده کی کولی گوز یاشویله سیل ، صورا اوپ

کول ایتمسون لبِ لعلون جریحه دار قیزیم

تحمّل ایله گیدنده سنی آپارّام اوزوم

چوخ ایتمه ناله بیله اولما اشگبار قیزیم

یزید محو اولاجاق ، کاخِ ظلمی قالمیاجاق

جلالینی ایده جاق چرخ تار مار قیزیم

سنون ولی قالاجاق شامِ شومده قبرون

نقدر عالَمِ امکاندا وار مدار قیزیم

اگر (حسینی) سنون چنگ وورسا دامنیوه

قالار بو دهرده اشعاری یادگار قیزیم.

مرحوم حسینی سعدی زمان

منبع مجموعه کانالهای مدح و مرثیه