متن نوحه های ترکی و فارسی

زبانحال در تنور خولی

یاتما کول اوسته نازیله بیله اویان اوغول

زهرا گلوب سنه بو گجه میهمان اوغول

سارادی بو صاقیمدا سیزیلدار یواش یواش

هاجردی صولدا ایلوری نی تک فغان اوغول

مریمدی بو حسین سنه آهسته آغلیان

گوزیاشنی ایدن یوزه گوزدن روان اوغول

بو یانه یانه باشینه توپراقلاری سپن

جدَّن خدیجه دور کی اولوب اشگی قان اوغول

آچ گوزلرون قوناقلاریوا بیر نوازش ایت

زهرانی سرفراز ایله ای مهربان اوغول

دور بیر آنا بالا اوجادان شیون ایلیاخ

من آغلیوم سنه ، منه سن آغلا یان اوغول

نه منده واردی قدرت ، آلام سینه مه باشون

نه سنده وار تکلّمه تاب و توان اوغول

آغزون دولوبدی قانیله یوخسا دانشموسان

منحور اولان بوغازوا قربان آنان اوغول

اولمازدی یوخسا بیر باشا کافی بو یاره لر

آنّون اولوبدی تازه یارایه نشان اوغول

شل  اولسون سنه اللّری یاره  ویرانلّارین

حسرت قالا ایشیق گونوزه شامیان اوغول

خولی نه بی مروّتیمیش ، نه دَنی صفت

سن تک قوناقه خوش دگی بیله مکان اوغول

بیر زخمداره ایندیه تک بستر اولمیوب

ایسّی کول اوستی خلق اولوناندان جهان اوغول

حیرتدیم نه دیللریله دیندیرم سنی

دوتمور دلیم نه چاره ایدوم دلستان اوغول

خلوت سرای عشقیدی ، مطبخ سرا دگول

زهرا سنیله خوشدی بو یرده اینان اوغول

ایو صاحبی دانیشماسا دلتنگ اولار قوناق

دئ سوزلرون غریب آناوا خوش بیان اوغول

قانیله کول دوتوب یوزیوی بوس ایدنمیرم

رخشنده مِهر اولوب بولود آتدا نهان اوغول

زهرا گلوب سرشگیله بو عارضون یووا

ابرِ ظُلامدن اولا خورشید عیان اوغول

چوخ آزدی فرصت الده ، گجه نصفدن گچوب

معذورم اگلشم داخی قانه باتان اوغول

زینب قالوب اوشاقلار الینده ، گرک گیدم

تنهادی کربلاده او بی خانمان اوغول

زینبدن ایستوری سنی خردا بالالارون

بخصوص ایدور رقیه سرشگین روان اوغول

من زینبون  گرک بو گجه  دادینه یتم

بارِ غم ایلیوب قد سروین کمان اوغول

گوندوز او چولده چوخ دولانوب خسته دور بالام

دینجلمیوب بلالی باجون بیر زمان اوغول

قانه باتوبدی زلفی الی قتلگا هیده

سن تشنه لب ویرنده او صحراده جان اوغول

شمریله کشمکش ایلیوب دوغرانوب الی

یوخدور النده یاره سینی باغلیان اوغول

سوز بیر یره دایاندی کی (نجمی) یازامادی

عاجزدی قتلگاهده هر سوز یازان اوغول.

مرحوم نجمی

منبع مجموعه کانالهای مدح و مرثیه