مناجات حضرت امام حسین (علیه السلام)

در قتلگاه

 

ظهر وقتی دوشوب عرصه میدانه حسین

جان دوداقینده گئدور محفل جانانه حسین

 

شوقیله دوتدی یوزین درگه ربُ الفلقه

باشلادی گودی گودالیده تقدیس حقه

قالدی حیران ملکوت اهلی او صاحب رفقه

دیل آچوب شکر حقه قلبی یانا یانه حسین

 

اوخلار آلتندا ائدور عشقینی جانانه ثبوت

اخیوب عشق نمازین دوتوب البته قنوت

عرض ائدور خالقه ای صاحب جاه و جبروت

سنون عشقونده الهی بویانوب قانه حسین

 

ایستورم باشدا گئده باشه چاتا عهد قدم

ایستورم تز یتیشم وصله غنیمتدی بو دم

رگ اسلامه وئرم من بو بیابانیده دم

دیه لر اولدی فدا مکتب قرآنه حسین

 

ائدورم ایندی که بو حالیله من راز و نیاز

قیلورام بو یارالی حالیله مقتلده نماز

سن منه عبدی دیورسن ائدورم عالمه ناز

جانی نیلور یتیشور وصلت جانانه حسین

 

وئردیم اکبر آدووا اکبری شوقیله فدا

تشنه سقّا بویانوب قانه ، اودا دوندی سودا

آلتی آیلیق قوزی وئردوم سنون عشقونده خدا

نیه ؟ ایستوردی که پایان وئره پیمانه حسین

 

بو بیاباندا اسوب صرصر محنت چمنه

سن وئرنلردی که تقدیم ائلدیم منده سنه

سنده بو حالیمه باخ شیعه نی عفو ایله منه

گوزتیکوب ، سن بیلوسن رحمت رحمانه حسین

 

سجده حالینده دوشوب مقتله شاه شهدا

گوزلیور قاتلی فرمانده فوج سُعدا

درگه ذات خدادن یتیشوب شاهه ندا

یخلوبسان منیم عشقیمده بو میدانه حسین

 

باش گتور سجده دن ای پور رسول مدنی

عرشه دعوت ائدورم محفل جانانه سنی

خوشدی ذکرون یارالی حالیده ذکر ایله منی

ویرمز ارزش بو مناجاتوه بیگانه حسین

 

می عشقیم بو بیاباندا سنی ایلدی مست

آلدی اطرافووی تا یتمیش ایکی باده پرست

هستیدن چکدون ال ای شاه که ائتدوم سنی مست

اولدی بو وادی محنت سنه خمخانه حسین

 

بو قیامون نقدر مکتبه واردی ثمری

ثمری ریشه کن ایلر بلی بیداد گری

سنون ایثارووه عفو ایلیورم شیعه لری

ائده لر روضه رضوانیده کاشانه حسین

 

 تقایی اردبیلی