شهادت حضرت امام علی النقی (علیه السلام)

 

قان آغلا گوگل ایتدی ندا کونه منادی

دعوت اولونوب قرب حقه حضرت هادی

یعنی که علی النّقی اول قائد عالم

مسموم اولونوب با حِیَل کائد عالم

 

چون یوخدی عبادتده شهادت کیمی عامل

انسانی ایده کلّیه رحمته واصل

اعلا درجات ملکوته ایده نائل

علت اودی یاخشیلره قسمتدی شهادت

مرقدلری ایلر هامی اکوانه سیادت

 

هرکیم که شهادتله گیده دارفنادن

حیّ ابدی دور او یقین لطف خدادن

بو نکته نی البته سوروش اهل بقادن

یعنی اوخی قرآندا و لا تحسبنی سن

هرگز شهدایه دیمه موتادی چو دشمن

 

اشرف شهدا ایچره شهیدان ولی دور

از اینکه اولار-ماخلق الله- عِلَلی دور

خاصّه که اولاردان اون اوچی نور جلیدور

بیر فرد اولاردان که ملقّب به نقیدور

هم اسم شریفیدی علی  پور تقی دور

 

چون زهر ایچوب بو علیِ عالیِ اعلا

ماتم زده اولدی کره علوی و سفلی

افلاک توکوب گوز یاشی چو لؤلؤ لالا

جنّ و ملک و انس دوشوب بحر ملاله

اشغال ایدوبدور ملکوتی غم و ناله

 

گزلنجه ویروبدور بو شهه زهر حریفی

اودلاندی هامی داخله جسم شریفی

دوغراندی جگرلرده کی رگهای لطیفی

پیچ و خمه دوشدی بدن هیکل توحید

قرب احد اولدی ثمن هیکل توحید

 

جاناننه جان ویردی بوشه بستر ایچنده

عباس کیمی ویرمدی جان لشگر ایچنده

قولسوز بدنی قالمادی کافرلر ایچنده

شش پرله سر پاکنی سندیرمادی نوفل

عطشان لبله اولمادی کفّاره مقابل

 

بیر عده سوسوزدان یانان اطفال  پریشان

دورینده یوخیدی ایده لر ناله و افغان

شرمنده دگلدی اوزی عطشان بالالاردان

دریا اوره گی اولمادی قان ناله سسیندن

آزاد اولا تا مرغ روانی قفسندن

 

باشی سر نی ده چومه بدر دل افروز

سیر ایتمدی هر دشت و دیاری شبله روز

آی تک یوزینه اولمادی توهین جگر سوز

دگمزدی مبارک باشنا تیر عداوت

سپمزدیله رخسارینه خاشاک ملامت

 

(عاصم) سنه هادیدی اگر حضرت هادی

گور هانسی عملدور او شهون میل و مرادی

سندن به یقین ایستوری نفسونله جهادی

نفسونله جهاد ایت اولاسان عبد مهذّب

چون عبد مهذّبدی امامینه مقرّب

 

مرحوم عاصم زنجانی

منبع کانال گنجینه گذشتگان