متن نوحه های ترکی و فارسی

احوالات حضرت فاطمه زهرا (سلام الله)

ای قلم ایله گلایه چرخ بد بنیادیدن

داده گل درگاه حقه بی حیا صیادیدن

قنفذ و ثانی، مغیره عالمان بد عمل

یغدیلار هیزم علینون درگهینده اولدی تل

سفره جرم و جنایت بی حیالر سردیلر

بوسه گاه جبرئیلی اود ویروب نامردیلر

هیچ بشر بیله جنایت روزگاره ایتمدی

پشت درده فاطمه دوردی کناره گیتمدی

سسلنوب ای قوم پست و کینه پرور،بی وفا

نیلیوبدور سیزلره ایا علی المرتضی؟

اود قوروبسوز درگهینده ایتموسوز ذره حیا

یاندیرورسوز قلب دخت حضرت خیرالورا

تا نقدری من وارام امکانیده ای اهل کین

ایلرم تبلیغ حیدر دی امیرالمومنین

من رسول اللهیدن درس الموشام بو گونلره

ویرمرم دنیانی یکسر تار موی حیدره

من طرفدارم حقیقت بین اولان بیرگوزلره

من طرفدارم غدیر خم ده اولموش سوزلره

عالمی ایلر مسخر سوزلریم چون نابیدی

بعد پیغمبر علی عالملرون اربابیدی

حق علیدور جان علیدور سوز علی

پاسبان دین علیدور عالمینه گوز علی

عین عین اللهیدی عالملره اولموش جلی

منزلت دیوانینون سر فصلیدی نام علی

ای ساتان دینی ریاست تختینه اوباشیلر

لشگر شیطان سیزی سرلشگر دوران بیلر

خانه زاد کعبیه سیزلر اهانت ایلوسوز

اود قوروبسوز درگهینده سیز خیانت ایلوسوز

قدرت بازولری اسلامی ایتدی سرفراز

شانینه کیم پی اپارسا ایلیر عرض نیاز

قلعه امنیت وحیثیت و ایمانیدی

معنی و مفهوم نصّ بارز قرانیدی

سوز حقیقت سوزدی ای بنیانگذاران دغل

بی ولای مرتضی باطلدی بطن هر عمل

رذل دور  نفسوز دوشوبسوز خاک پست ذلته

چوخ گران گلدی  بو سوزلر ثانی بی غیرته

بیلمورم هانسی خدا نشناس اولوب آموزگار

نیمه یانمش درگهه اول نانجیب ویردی فشار

سینیه مسمار اولو بدور اشنا غم بسلیوب

فضه نی امدادینه خاتون محشر سسلیوب

فضه گل قالدی ایاق آلتندا پرپر محسنیم

چک اونی اودلار ایچیندن یاندی بی پر محسنیم

آچمامیش گل گلشنی گوزدن آتوب راحت یاتوب

میخ در قالسون هله احوالیمی محسن قاتوب

چاتدیروب فضه اوزون ال باشدا گوزلر اشگبار

محسنی چکدی کناره زیر پادن غصه دار

باخدی زهرایه گوروب قان قامتین یکسر آلوب

دامنی آتش ده سینه میخ درده سد قالوب

سعی ادیبدور چوخ او ماواده هدف گلسون اله

عصمت کبرانی چکدی اود ایچیندن منزله

قول ، قابورقا ، سندی سالدی درده روح حیدری

حیف ، همای، پر ، همایونون سینوبدور شهپری

اولدی یتمیش بش گون عمری بستر بیماریده

دوتدی بیر اللی قنوتین محضر دلداریده

سوندی عزت شمعی چاتدی آخره عمر بتول

غسل ایدوب حیدر گجه زهراسینه اولدی ملول

گیدیروب دلدارینه حیدر کفن قان آغلادی

یاندی قلبی سسلدی جان فاطمه جان آغلادی

حمل ایدوب تابوتی قبرستانه حیدر خونجگر

نیمه شب دفن ایدوب یثرب غریبین دیده تر

چکدی شاهد غربت یارینده لیل تارینی

تاپشوروب توپراقه حیدر محرم اسرارینی

عرض ایدوب راحت یات ای غملرده غمخوار علی

سنگر صبریمده دائم هم ره و یار علی

عرصه پیکاریده ایتمزدیم اصلا واهمه

اگهیدیم حیدری ساخلار دعای فاطمه

گلشن عمریمدن عطر دلبریم الدن گیدوب

قالمیشام بی یارویاور یاوریم الدن گیدوب

روح حیدر دخت احمد کوثریم الدن گیدوب

یادگار حضرت پیعمبریم الدن گیدوب

باصفالی منزلیمده گونلریم الدن گیدوب

تاجداریم گل نگاریم گوزلریم الدن گیدوب

تیره توپراقی قوجاقلار حسرتیلن مرتضی

حامی مظلوم دوران درد هجره قیل دوا

کیم قویار سندنصورا درمانی سوز اهمه

بیر سنیدون دردیمه درمان عزیزیم فاطمه

وسعت فقدانوی من بیللم و الله بیلر

هجرون دردین علی هر نیمه شب چاهه دییر

برگ تاریخه یازاللار شرح حال حیدری

موبه مو  الدن  نجه گتدی علینون  کوثری

نکته دار و نکته دان و نکته سنج و نکته بین

ایلیر تمییز کیمدور اهل عدل و اهل کین

هانسی رگلرده علینون قانی طغیان ایلیر

طبع شعری ، طبع (عیسی) مثلی طوفان ایلیر

 عیسی محرمی