احوالات شام غریبان حضرت زهرا (سلام الله)

 

آغلا گوزوم بو محنت عظماده هران

دوتموش بتوله مرتضی شام غریبان

 

زهرا الوب پیغمبرین گیچدی چراغی

قالدی ولی حشره کیمی دللرده داغی

بیله بلا کش بیر کسین یوخدور سراغی

واللهی یوخدور بو سوزیمده جای نقصان

 

ایمدی یغوب باشه علی آل بتولی

دلدن سالوب زهرا غمی اول دل ملولی

گاهی بتولی سسلیور گاهی رسولی

سویلور قیزون گلدی سنه بو گونده مهمان

 

سن اول امانت که منه ایتدون سپرده

رد ایلدیم یتدی سنه اول غم کشیده

بیر صورتی نیلی اولوب قولاری بیرده

وار بیرده صدمه نچه اعضاسینده باخ یان

 

چون صبره امر ایتدون منی رحلت زمانی

قویدی در و دیوار آرا زهرانی ثانی

مسمار ایدنده سینه سین زخم آخدی قانی

گوردوخجا یاندیم حالتیم اولدی پریشان

 

کاهی دیردی درد دل قبر رسوله

دلدن یاناردی گه یتیمان بتوله

همناله اولموشدی اشاقلار اول ملوله

سو یلردیلرایوای آنا هر لحظه هرآن

 

گاهی یاناردی مجتبایه میر بطحا

سویلردی ای جان و دلیم آنان بس هاردا

قویدی نجه آغلارسنی اول دخت طاها

تا واردی عمریم آغلارام دنیاده ألقان

 

تاثیر ایدوب بو غم او شاه نشاتینه

گاهی دوتاردی یوز او شه اوغلی حسینه

سویلردی چوخ گلمه عزیزیم شور و شینه

آغلار گوزه اولسون علینین جانی قربان

 

گه زینب و کلثومه ایلردی نظاره

جاری ایدردی متصل اشکین عذاره

آغلاردی دلدن بو غمه بو گیر و داره

زینب دینده وای أنا کلثوم أنا جان

 

گاهی بتولین عالمین یاده سالاردی

هر لحظه ده بیر اوزگه احواله قالاردی

زهرانین آجلوق محنتی صبرین آلاردی

قویدون منی یاخشی دیردی دیده گریان

 

(حامد)گیچوتدون عمریوی دور جهاندا

گوردون گیچنلرده نه گون قالسین قالاندا

جهد ایله یازدور آدیوی بو آستاندا

بیر ایت حساب ایتسون سنی خلاق سبحان

 

مرحوم حامد تبریزی

منبع کانال گنجینه گذشتگان