متن نوحه های ترکی و فارسی

احوالات حضرت فاطمه زهرا (سلام الله)

دوشنده ظاهراً شان و جلالون یاده یازهرا 

گوگل مبهوت اولور بو خلقته معناده یازهرا 

نه عصمتده نه عفتده نه عزتده نه شوکتده

گلوب مثلون سنون بو صفحه ایجاده یازهرا

سنیله بیر بیر اصحاب کسانی خالق سبحان

تانیتدی جبرئیله عالم بالاده یازهرا

کمینه بیر کنیز اولسا سزادور هاجر و حوا

یقین واردور بو حسرت مریم و ساراده یازهرا

بشر فرض ایلسم عین خطادور، نور وحدت سن

گوروب کیم بیر بشر بو صورت و سیماده یازهرا

سنون تک بیر بلاکش گورمیوبدور دیده عالم

گوروب بیر تک سنی بو دامن غبراده یازهرا

او گوندن کیم قدم قویدون جهانه گورمدون خوشگون

ملال و غصه چکدون دائماً دنیاده یازهرا

اولوب اون سگز ایل عمرون سنون بو دار دنیاده

باشا ویردون بو عمری یثرب و بطحاده یازهرا

آتان پیغمبر رحمت ایوینده دوقوز ایل قالدون

ازلدن اولدون هر بیر محنته آماده یازهرا

گلوب دوقوز آینده خاندان بو تراب ابچره

گیچیددون سن همان ایامی سالام یاده یازهرا

عم اوغلون راضی اولمازدون سنون دردونله غملنسون

گورنمزدون غم اولسون خاطر مولاده یازهرا

او قدری باشداکی چادر شبه، وصله ویرمشدون

که اسباب غم اولموش جمله اوتاده یازهرا

گیردون کهنه جامه، ایلمزدون زیور و زینت

شرافت گورمدون سن جامه دیباده یازهرا

پیمبردن صورا قویموب عدو اوچ گون سنه حرمت

قاپو یاندی، جلال و جاه گیتدی باده یازهرا

گوگردی قولارون، سندی قابورقان جور اعدادن

نولوب بطنونده کی سقط اولدی بو اثناده یازهرا

عم اوغلون چکدیلر قولاری باغلی مسجده امت

دیوب یانام او ظلمه رحمسیز یازهرا

اوزون غش ایلمشدون هوشه گلدون آغلادون یاندون

گیدردون وقریله سن مسجده امداده یازهرا

گوروب بو حالی فضه دوردی گلدی ایلدی نصرت

سنه همدرد اولوب بو محنت عظماده یازهرا

گلیدون کربلایه روز عاشورا گوریدون سن

نجه زینب گزردی هولیله صحراده یا زهرا

یازیلمش بیر نفر سید ایوینده بو کتاب غم

یازان صافی دیر آغلار گلور فریاده یازهرا

آدی یوسف، هامی اخلاقی احسن، حسن یوسف تک

ویروبلر نسبتین سندن اولان اولاده یازهرا

سنی اوغلون حسینون جانی لطف ایله شفاعت قیل

منه هم حاضرینه هم اونا عقباده یا زهرا

مرحوم صافی

منبع مجموعه کانالهای مدح و مرثیه