متن نوحه های ترکی و فارسی

احوالات عاشورا

آه او ساعتدن که صبح صادق اولدی جلوه گر

انفس و آفاقه ویردی شور محشردن خبر

بیر قیامت اولدی کیم شرحینده بسدور بو قدر

محشر کبری اونون بیر آیت صغراسیدور

نور محضیله اولوب ظلمت مقابل بیر بیره

ظلمت باطل چکوب حق دوره سنده دایره

ساکنان عالم اعلا، باخوب گویدن یره

گوردولر مظلوم امامین یوم عاشوراسیدور

عقل حیراندور بو غم ، بو غمفزا شوری ندور

یوم عاشورا یانندا محشر کبری ندور

عاجزم شرح ایلیم معنای عاشورا ندور

بو قدر وار مظهر خلاق عالم یاسیدور

حجه اللهه طرف سعد اوغلی آتدی بیر خدنگ

خون ثاراللهی توکماقلیقدا اولدی پیش جنگ

امرینه تابع اولوب اولفرقه بی نام و ننگ

هر زمان اعلایه قاتل، عالمین ادناسیدور

قطره باران کیمی یاغدیردی دشمنلر اوخی

من دیمم نولدی، اوزون گیت مقتل و تاریخ اوخی

خیمه گاه ایچره یارالاندی خانیملاردان چوخی

غیرت الله دوزدی، چون بولدی بو دین احیاسیدور

شاه دین اردوسینون بیر عده سی اولدی قتیل

تا شکست آثاری گورسندی، حسین ایتدی عویل

اوز مقدس فکرینون تعقیبنه اولدی دلیل

ایتدی اعلان مقصدیم قانون دین اجراسیدور

یاور و انصاری تک تک گیچدیلر جاندان تمام

ایلدی اتمام حجت لشگره شاه انام

یوز دوتوب اشرار شامه ، سسلدی مظلوم امام

ای جماعت کیم امامت تختنون داراسیدور؟

شارب الخمر و جفاجودور یزید بی حیا

جاهل و خونریزدور، یوخ حقی اولسون پیشوا

سیز اوزوز انصاف ایدون کیمدور امام رهنما

کیم بو گون اسلامیانین ملجاء و مولاسیدور؟

من حسینم حجت اللهم ، بابامدور مصطفی

مرتضی باب کباریمدور، آنام خیرالنسا

عالم احکام دینم، هادی دین خدا

کیم فضیلتده بو گون بو بیکسین همتاسیدور؟

ایتمشم هانسی حرامی شرعده آیا حلال؟

قتلیمی واجب بولورسوز ای گروه بد مآل

قتیلمه فتوا ویروبدور مفتی کافر خصال

سیزلری اغوا ایدن، اول کافرین فتواسیدور

گوردی قلب دشمنین محکم غبار تارینی

غیضیله آلدی اله شمشیر آتشبارینی

پوزدی قرخ مین لشگرین بیر حمله ده پرگارینی

بو حسیندور دوشمه تردیده خدا یاراسیدور

بارگاه قدس عشقه اولین مسند نشین

دلده الفاظ گهربار و ملیح و دل نشین

حیدر کرار تک الده حسام آتشین

مقصدی دلده ولی عهد الست ایفاسیدور

بیر شجاعت گوستروب یالقوز اوغولسوز پادشاه

گورمیوب مثل و نظیرین خلق اولاندان مهر و ماه

ضرب و شصت مرتضی اولدی یانندا پر کاه

ایمدیده ضرب المثل بو سرورین دعواسیدور.

یوز قویاردی هر یانا، اول شه الینده ذوالفقار

گله روباه تک ایلردی دشمنلر فرار

گه دیوب تکبیر گه سسلردی شاه تاجدار

قاچمیون لشگر، حسینین نوبت هیجاسیدور

باخمیون یوخدور منیم بو چولده بیر آرخام ایلیم

قاداشیم عباسی ئولدوردوز، داخی گلمور بلیم

تشنه ام از بس ، دولانمور ای سپاه کین دلیم

سیزلره بوندان بیله ، تیغیم اجل صهباسیدور

من علی المرتضاتین شیردل فرزندیم

عصمت کبری آنامدور، مصطفی دلبندیم

بو بیاباندا ولی اوز عهدیمون پابندیم

عشقیمون عشاق عالم، آفرین گویاسیدور

قدرتیم وار ایلیم بیر نحویله من کارزار

تا اولا بو عالم امکان سراسر تار مار

نیلیوم باش ویرماقیمدا وار رضای کردگار

سست ایدن قولاریمی، روز الست امضاسیدور

ای جماعت چرخ عزتده آتامدور آفتاب

برج عصمتده آنام زهرا جمالی ماهتاب

مهریله مهدن اولان بیر اولدوزام والاجناب

نوریمون بیر ذره سی موسی ید بیضاسیدور

من نه موسایم ایدم قبطی جفاسیندن فرار

من نه عیسایم گیدم چرخه، گورنده پای دار

طشت تک قانیله قیلام من بو دشتی لاله زار

عالم عشقین حسین باشدان گیچن یحیاسیدور

جنگیله سرگرمیدی اول یکه تاز کربلا

بیر صحیفه نازل اولدی، اوندا یازمیشدی خدا

ما حتمناک الشهاده ای حبیب باوفا

وار نه علت ذوالفقارون خصم، جانفرساسیدور؟

دستخط قدرتین گورجک حبیب داورین

ایتدی تکیه نیزیه، سالدی خیاله اکبرین

ایتدیلر ناگه نشان سنگه جبین انورین

آخدی قان، بیر قان که ثارالله اونون معناسیدور

قان آخوب خشگ ایلمشدی هر لباسین آفتاب

ایتدی قانین سیلماقا پیراهنین شاه انتخاب

آه آه اوچ شعبه لی اوخ یاردی قلبین بی حجاب

کتفدن چیخدی او اوخ، مقتللرین انشاسیدور

وقت او وقت اولدی یارالی قان ایچینده جان ویره

صاق یوزی اوسته یخلدی ذوالجناح اوستن یره

نقطه توحید دورین آلدیلار چون دایره

فکریمی نشر ایلین، منشور اولان اعضاسیدور

ایتدی لرزه شمر ظلمندن زمین و آسمان

واقعاً ئولدوردی اما شاه مظلومی سنان

ای ((حسینی)) بو شهادت امرینی یازما دایان

غرق اولارسان قتلگاهه گیتمه، قان دریاسیدور

مرحوم حسینی سعدی زمان

منبع مجموعه کانالهای مدح و مرثیه