متن نوحه های ترکی و فارسی

احوالات حضرت فاطمه زهرا (سلام الله)

(بخش دوم و پایانی)

دوشوبدی فرصت اَله بزم راز خلوتدور

که عمریدن منه بو فرصتیمجه مهلتدور

عرایضیم سنه هر چند سنه دردسر اولاجاق

سوزوم چوخ اولسادا وقت آزدی مختصر اولاجاق

هامی عرایضیمون نچّه سوزدی ماحَصَلی

قبول اولونسا بسیمدور او سوزلرین عملی

بیری بودور که منه حقّیوی حلال ایله

او باره دن بو دل زاری بی خیال ایله

ایکیمجیسی بودی گر عورت اختیار ایله سن

دیمم مجاز دَگیلسن، بو اختیاریده سن

بیر عورت آل یانا بو جانه اود سالانلاریمه

رئوف اولا، یانا دلدن منیم قالانلاریمه

حسینیله حسنیم ، روح جسم و جانیمدور

قرار صبر دلیم، طاقت و توانیمدور

گر اینجیسه حسنیم روحیمه اذیّت اولور

حسینیم اینجیسه جنّت سرای محنت اولور

سنه رضایت دل بونلارین رضایتیدور

نه چون رسول خدانون بولار امانتیدور

ایدوری بونلاریله کسب نور، دیده لریم

چکیده ی دل و جاندور بو نور دیده لریم

عم اوغلی زینب و کلثومیدن گوتورمه گوزون

من اولمارام، گَله هر کیم آنالیق ایله اوزون

اگرچه مشکل اولور هر آنا آتا اُلومی

ولیک سخت گَلور قیزلارا آنا اُلومی

نجه که اوغلان اوشاقی یتیم اولور آتادان

اولور یتیمه هامی قیز عیالیده آنادان

آنا یرینی اوغول بوش گورر کناره چخار

نجه دوزر قالا ایوده مگر کسوک قیزلار

علی الخصوص که بو زینبِ بلاکش اولا

آنا دیه یانا یکسر، وجودی آتش اولا

اوچومجیسی بودی من ایلین زمان رحلت

نقدر ممکن اولا قویما فوت اولا فرصت

سنه عیاندی که باغ وفا گُلِ تریم

چخارتما کوینگی کی دست حق مظهریم

گئجیله غسلیمی ویر، ایت کفن، مزاره یتور

منیم یولومدا قالان چشمی انتظاره یتور

بابام رسول خدانون یتور امانتینی

دعای خیر ویروب ایسته استجابتینی

مباد حاضر اولا دفنیمه منافق لر

موافقت ایده ، دین اوسته ناموافق لر

سالالّا زحمته تابوتیمه یتورسله اَل

قبول اولونماز اگرچه او جمعیدن بو عمل

دیمه علاقه کسور روح جسمیدن بُلمز

دیردی عالم معناده مومنین اُلمز

تانیسا قبریمی کفّار اولمارام راحت

قیامتیمدی مزار ایچره بُلدوقوم ساعت

همین بو حالیده اوّل او گُل شکفته لَنوب

دوباره سولدی خزان توپراقی باشه اَلنوب

شهادتِینی دیردی باخاردی باش اوسته

اجل تری او دیدوقجا اوتردی قاش اوسته

او گلشن ادبون نرجسی گوزین یومدی

یومان کیمی گوزینی بحر رحمته جومدی

گوزینی باغلادی اوّل او قبله ی ایمان

یوزینی قبله ی اسلامه دوندروب او زمان

قطیفه چکدی یوزینه که گورمسون یوزینی

وصیّته عمل ایتسون، ایتیرمسون اوزینی

قویوبدی سینه سی اوسته امام قرآنین

ووروبدی معنی قرآن بِلینه دامانین

قاباقدان حاضریدی صحن خانه ده اصحاب

صحابه آدلاری، بیر دسته با وفا احباب

همین که ناله صداسی اوجالدی آنلادیلار

لزوم اولمادی قیلسون امام استحضار

سو قیزدوروب ویروب اول شاهه، گَتدیلر تابوت

ایدردی غبطه بو اوضاعه عالم ملکوت

ویروبدی غسلینی ترتیبیله امام مبین

حنوط قیلدی او خاتونه، ایلدی تکفین

گَلوب کناریده قویدی یوزینی دیواره

ایدردی ناله، آخاردی سرشکی رخساره

روایت ایلر امامون او حالینی ورقه

دیردی ناظریدیم بو اسفلی مَا التَّفقه

ادبله عرض ایلدیم ای کننده ی خیبر

ندور که عارضه گوزدن توکورسن اشک بصر

مگر ایدوبدی سنی فقد فاطمه محزون

پوزوبدی رنگ رخون روزگار بوقلمون

جواب ویردی منی آغلادان نه هجراندور

نه بو محندی، نه بو غصّه ی فراواندور

ویرنده غسلینی زهرای اطهرین یاندیم

دوزوب دایاندیم، اگرچه اورکدن اودلاندیم

گوزوم ساتاشدی او آفت یتن گُل ترینه

قولوندا دَگدی اَلیم تازیانه یرلرینه

وارام نقدر ایدم ناله بو اودوم سونمز

اُلونجه گلشن و باغه طرف یوزوم دونمز

همین بو حالیده یتدی حسینیله حسنی

که یعنی فاطمه نون هر ایکی گُل چمنی

گَلوردیلر او اَیاق روضه ی پیمبردن

بو سوز یِتیشمیشیدی مرقد مطهردن

آچون یولی گَلوری فاطمه یتیملری

دگلدی لازمه بیر کس ویره اُلوم خبری

گوروبدیلر که کفن پوش اولوب آنا بدنی

کنار ایلدیلر بزم ماتمه گَله نی

سالوبلا اوزلرینی نعشی اوسته آغلادیلار

بو شیونیله هامی کائناتی داغلادیلار

دیردیلر بیزی گر ساقلیقون کیمی آناجان

کناره آلمیاسان ایلروق اُلونجه فغان

محبّتون اثری عارضی حیات ویروب

او غصّه مرگ اوزی بو غصّه دن نجات ویروب

کنار اولوب کفن ، آچدی آنا هر ایکی قولین

حمایل ایتدی بیرینه صاقین، بیرینه صولین

یتوردی لطفیله ناگه آنا بالا یارادان

آتا آیردی او ساعت بالالاری آنادان

گئجیله گوتدیله زهرا جنازه سین یردن

صحابه، صاحبی، اصحابیله حسین و حسن

بقیعه یتدیلر آماده گوردیلر بیر گور

او گوره غبطه ایدر نفخ صور اولونجه قبور

امام ایستدی قبره قویا او گُل بدنی

مشاهده ایلدی ناگهان بو منظره نی

کنار اولوب ایکی اَل آلدی نعش زهرانی

او حال حیرته سالدی تمام دنیانی

اولان او اَللره مالک رسول رحمتدی

آلان امانتینی صاحب امانتیدی

یری واریدی گَلیدی بو سس او صاحبدن

مصاحبه سین آلاندا او خوش مصاحبدن

ویرنده من بو امانت صحیح و سالمیدی

سلامت اولماقینا اهل یثرب عالمیدی

بُله بُله بو رسول خدا امانتی دی

ایکی قولیندا، یوزینده بو نه علامتی دی؟

ترابِ تیره اولوب گرچه خوابگاه بتول

قالوب قیامته دین گوگده دود آه بتول

روادی که علنی حقّی غصب اولان زهرا

نهان خزینه کیمی ایلیه قبول جفا

امام قبرینی بو علّتیله گیزلتدی

اوباره ده حسنِینی اوزینی دینجیتدی

نچه مزار درست ایلدی او قبره مثال

قِییتدیله ایوه اصحابیله پریشیان حال

صباح اولاندا بُلوبله منافقین یکسر

گئجیله دفن اولونوب یادگار پیغمبر

گلوب بقیعه سگ و روبه اتفاقیله

هامی لوازم حفریله، اشتیاقیله

دیردی ثانی گرک تازه قبرلر آچیلا

بتول قبرینه بیر بیدق فرح ساچیلا

لزومدور هامسی نبش اولا بو تازه قبور

چخا جنازه ی زهرا، اَله گَله منظور

پیمبرین قیزینا قیلماسا خلیفه نماز

دگل جنازه ی زهرایه کیمسه دفنه مجاز

بو حاله واقف ایدوبلر علیّ عمرانی

که قبر فاطمه نی آچماقا گَلوب ثانی

او دمده بیر ساری دسمال باغلیوب باشینا

علاوه عقده ی دل، بیر دوگون ووروب قاشینا

بِلینده تیغ دوسر، یوز قویوب بقیعه طرف

او قوم بی شرفه یتدی بحر عزّ و شرف

نه گوردیلر که علی بِلینده ذوالفقار گَلور

او شیره بنزری قصد ایلیوب شکار گَلور

او حالینی گوره نون رنگ صورتی قاچدی

چَکیلدی بیر طرفه شهریاره یول آچدی

بیرینون اوسته گَلوب اَگلنوبدی قبرلرون

گوروب ضلالتینی قوم کفرِ بدسیرون

خطاب ایلدی . خطّاب اوغلونا او زمان

ندندی ایلمیسن ظلمیده بیله طغیان

اگر بو قبرلرون سوءِ قصد اولا بیرینه

آخار بو عرصه ده قان چشمه چشمه سوریرینه

بو تازه قبرلره وورسا بیر کلنگ اشرار

قویام محالیدور اشراریدن قالا دَیّار

بو تیغ تیزیمی قانیله ایلرم سیراب

اگر دوباره آچلسا مزار امّ کتاب

گوروب علیّ ولینی بو حالیده ثانی

وجودی رعشه دوتوب، لرزیه دوشوب جانی

رسول حق بویوران نکته یادینه دوشدی

سارالدی رنگ رخی، اود نهادینه دوشدی

که یعنی قورخون او گوندن غضبلنه بو علی

گَله بقیعه قلج بِلده شیر لم یزلی

باشندا بیر ساری دسمال شیر شرزه مثال

مقام ایلیه بیر قبری مضطرب احوال

تمام یر یوزی گر قوم کفر و باطل اولا

او حالیده اونا ممکن دگل مقابل اولا

آچوبدی معذرته دل او روبه مکّار

ارادت دل و اخلاص قلب ایدوب اظهار

دیردی یا علی بو اعتذاری ایله قبول

به حقّ جاه رسول و به روح پاک بتول

دگولدی قبر بتوله مرام سوء ادب

اولوب ارادت قلبی بو اجتماعه سبب

گرک اولیدیلا تشیعیده مسلمانلار

گلیدی فاتیحیه اللرینده قرانلار

بولوبلر ایمدیکه ، حاضر اولوبلا قبر اوسته

چکولر آه گلوبلر فغانه آهسته

خلاصه اوز ایوینه دعوت ایلیوبدی امام

خدا بولور کی نه نوعی قیلوب همان گونی شام

یقوبدی دور بره فاطمه یتیم لرین

توکردی هم اوزی هم اهل بیتی اشگ ترین

باخاردی زینب و گلثومه چشم حسرتیله

گلردی شیونه ایلردی ناله رقتیله

بیلوردی خاطر زینب دولیدی نسگیلیله

دانشدیریردی آنا تک اونی شیرین دلیله

دیمه آتادان اونون حل مشکلی اولماز

آتا دلی ولی هرگز آنا دلی اولماز

گهی گوروب حسنی اود دوتاردی آغلاردی

گهی باخاردی حسینه یاناردی آغلاردی

گلون. حسینه هامی بیزده آه و ناله ایداخ

صدا صدایه ویراخ دشت کربلایه گیداخ

غریبه سیر ویرور کربلا گلستانی

سولان گولی پوزولان بلبل نوا خوانی

نه بوستان نه گلستان نه بلبل پرشور

او گلشن ایچره حسیندور کمکلری منظور

دوباره گورمیه جاخ دیده لر بیله گلزار

تصادف ایلیه بیر فصلده خزان و بهار

باخاندا خیمه گهه آفت خزان گورونور

باخاندا قتلگهه نو بهار عیان گورونور

بیان محشر کبری ایدر او هنگامه

نتیجه بوردا ویرور یازدقوم امان نامه

چوخ ایسترم اولا، گر اولسا دلده طاقت و تاب

دوباره باب حوائج آدیله فتحُ الباب

او کس که گورسِیدی سر و قدّ عبّاسی

بُلوردی سرویده یوخ یوزده بیر تماشاسی

ایکی قولینی کَسوبله او سرو آزادون

یره یخلماقینون سیری وار او شمشادون

تئز اولمادی یره دوشماقی، چوخ گجه دوشدی

عقابیدن یره من بُلمورم نجه دوشدی

یازیلّا تیریله اولموشدی جسمی مالامال

نجه دوشر یره آتدان، اوزون خیالیوه سال

عبث دگل اوزینی شاهیدن کنار ایلیوب

ادب ملاحظه گویا او نامدار ایلیوب

گَلور خیالیمه اولسون بیر اوزگه علّتیده

اولور که باعث اولا بعده قرب خدمتیده

سکینه قالموشدی چون سو انتظارینده

تاپاندا تاپدی بو سقّانی سو کنارینده

اگرچه ایچمَدی سو، خیمیه گَتورمدی آب

او اشک چشمیله، بو قانیله اولوب سیراب

هامی یارالاری بیر گُل کیمی بهار ایلدی

اوزی دوشن یری بیر آیری لاله زار ایلدی

بو سیریده بو سیاحتده گلستان اولماز

بیله بهار گورونموب، بیله خزان اولماز

اویاندا باد خزاندان گُل سمن قورویوب

بویاندا نسترن عطری هامی چولی بورویوب

که یعنی عارض لیلا سولوب سمن گُلی تک

گَلوبدی شوره ولی نوبهار بلبلی تک

دولانوری چمنی عشقی نوگُل آختاروری

به سان سنبل تر، زلف و کاکُل آختاروری

آلوبدی اکبرین عطرین او گلستان ایچره

شکسته پر گَزَر امّا او بوستان ایچره

نه گوردی قانیله هر گوشه بیر گلستاندور

او گلستاندا هامی رنگ گُل نمایاندور

جفا اوخیله گَُل سرخ آچوبدی گُل یارالار

دگنده خار بو واضحدی برگ کل یارالار

باخاردی نعشلره آختاروردی محبوبین

قباقجه روحی گیدن یرده تاپدی مطلوبین

خدا بولار دیدی گر گُلدی بیر طبق داغیلوب

ندندی اکبریم آخِر ورق ورق داغیلوب

سیاه زلفین آچوب سوخته پرند ایلسون

توکوب یارالارینه بلکه خشک بند ایلسون

اگرچه اوغلینی دیندیرماقا دیلی یوخیدی

ولی دوتولموشدی بس که نسگلی چوخیدی

بُلوردی اکبری یثربده گوزلین واردور

گئجه گونوز آدینی ذکر ایدوب دین واردور

خیال ایدردی اونی نه دلیله دیندیرسون

باجیسینا نجه بو حالتی بُلوندورسون

دوام ایدوب دوزه بُلمزدی قلب مجروحی

کنار اولوردی دایانسِیدی بیر نفس روحی

دیمه او گُل بدنیندن گوزی دویوب دوردی

علاج سیز یارالی نعشینی قویوب دوردی

گینه بهار و خزاندا قالان سوزوم واردور

که هر گولونده حسینون منیم گوزوم واردور

سالام عروسیله دامادی ایسترم یاده

اورک گوزیله باخام بو عروس و داماده

عروس تازه ، یوزی بیر سولان گله بنذر

شکنج طره داماد سنبله بنذر

او طوی بناسی اولوب درد عشقله محکم

ثبات و صبر ایلیوب بو بنانی مستحکم

گلنده قتلگهه ایتماقا مبارک باد

گوروبله اهل حرم قان اَله یاخوب داماد

اجازه ویردی آناسی هاموسنا باخسون

بو قان حنانی گوتورسون هامی اَله یاخسون

زفاف حجله سینه تا یتشدی تازه عروس

دوشوب ایاقینه دامادی ایلدی پابوس

گوروب که چوخ یولونی گوزلیوب گیدوب هوشه

یارالی پیکرینی چکدی جان تک آغوشه

عروس اویاتماسا دامادی کیم گلور اویادی

اویادا بولمدی قانیله زلفینی بویادی

دیدی تمرکز مهر و وداد عم اوغلوم وای

طوئی عزایه دونن نامراد عم اوغلوم وای

اوپوپ یارالاری ایگلردی گل کیمی هر آن

ایدردی بلبل شوریده تک گل اوسته فغان

او زلفدن الینه سالدی عنبر ازلی

مدینیه قایداندان سورا دولیدی الی

گورن دیردی نه زیبادی نه ملوسیدی بو

باشی قرالی طویی یاس اولان عروسیدی بو

عم اوغلوسندان اَله یاخشی بیر لقب سالدی

دیسم سزادی اُلنه کیمی بو آد قالدی

یتنده قارداشینون نعشی اوسته یومدی گوزین

او عشق گلشنینه عاشقانه سالدی اوزین

همان او دوشدیقی یرده اوزینی ترک ایتدی

او قدر گِچمدی حقدن مساعدت یتدی

دوباره آچدی گوزین اوز اوزینه هوشه گَلوب

گوروب او قانینه غلطانی، قانی جوشه گَلوب

بهار بلبلی تک اول گله پناه آپاروب

او شاهی قان آپاروبدور، بو ماهی آب آپاروب

اُلنلرین چخادوب یادلاریندن اهل حرم

هامی قوروب او چوخور یرده حلقه ی ماتم

بنات نعش کیمی دور ایدوب او نعشی بنات

قالوبلا ششدر حیرتده شاهی گورجک مات

ز بس اثر واریدی زینب آه و زارینده

دگلدی زینبون اشکی اوز اختیارینده

غریبه دللریله قارداشینی اوخشاردی

باجیدی ، گه قیزا ، گاهی آنایه اوخشاردی

دیردی قارداش اویان زینبون سنه قربان

جواب ویر منه، آز قالدی باغریم اولسون قان

سویوبلا نعشیوی ، عریان قویوبلا گُل بدنون

اولوب نسیم صبانون توخونماسون کفنون

ویروبله غسلینی قانیله هانسی مغسولین

شل اولسون اَللری ، کیم کسدی دست مقصودین

گیدوبدی غارته عمّامه و قبا و ردا

قوری یر اوسته دوشوب جلدسیز کلام خدا

او کهنه پیرهنونده سویوبلا بو لشکر

گوروبدی هانسی ستمدیده بیله غارتگر

یارالی پیکریوون پربها قباسی هانی

نولوبدی خامس آل عبا، عباسی هانی

ووروبلا نیزیه باشون به سان هیکل ماه

قالوبدی یرده یوزی اوسته مدِّ بسم ا...

باشین کَسوبله کسیلموبدی صوت قرآنی

آیردی بسم اللهیله رحیم و رحمانی

نه بو بدنده باشون وار، نه بارماقون اَلده

باجون اُلِیدی سنون کاش بو گون اوّلده

اوخ اوسته اوخ ووروب آخِر بو لشکر کینه

دوام ایدر نجه دورت مین یارایه بیر سینه

گَلنده غارته اود ووردی خیمَوه کفّار

آلشدی اهل عبا، بار ایستین دربار

علیل امام اود ایچره قالوب خلیل آسا

توکردی گوزیاشی رخساره سلسبیل آسا

رضا قضایه ویروب حدّسیز مصیبت ایله

چخارتمشام اونی اوددان کمال زحمتیله

تمام خیمه و خرگه گیدوبدی یغمایه

چخوبدیلار هامی اهل حرم مصلّایه

یغوب بالالاریوون هر بیرینی بیر یاندان

گَتورموشم اودی تک تک گِچیردورم ساندان

آلوبلا اهل جفا ظلم اَلیله معجریمی

قویوبلا سنسیز ایکی قولتوقومدا اَللریمی

قصوریم اولسا اگر خدمتیمده معذورم

نچون شتابیله کوچ ایتماقیمدا مجبورم

نه فرصتیم وار اَلیمده، نه وقت وار، نه مجال

مسافرم گیدورم، دوراوزون منی یولا سال

بو خون دلدی، نه اشکیم اولور یوزیمه روان

دیار شامه روان ایله، ویر دالیمجه اذان

دایانماقا داخی بو شمریله سَنان قویمور

اذیّت ایلدی بی رحم ساربان قویمور

دیمه بو گُل بدنوندن دویوب حسین گیدیرم

علاج سیز سنی عریان قویوب گیدیرم

چکیلدی جار، یولا دوشدی کاروان قارداش

گئجه گونوز دیرم جان ویرونجه جان قارداش

بو سن بو دشت بلا و محن خداحافظ

بو سن بو اکبر و عبّاس، من خداحافظ

ایدوب حسین اوزی صافی بو طبعیوی سرشار

یازوبدی کیم بیله کیفیّت خزان و بهار

نقدر وار نفسون بو حسینه خدمت ایله

اجل گَلینجه باغیشلات اوزیوی، همّت ایله

قبول اولونسا اگر توشه ی قیامت اولور

اُلنده، حشریده سرمایه ی سعادت اولور

حسین غمینی یازان کِلکیدن اوجی ایتی دی

دیولسه بسدی جزاده که بو حسین ایتی دی

مرحوم صافی تبریزی

منبع مجموعه مدح و مرثیه