متن نوحه های ترکی و فارسی

وداع زائر با حضرت امام رضا (ع)

یا امام هشتم گَلمیشوخ نیازه

تا اولاخ مرخّص ایستیروخ اجازه

شام هجر ظاهردی، بو وداع آخِردی

باشیوه دولانّوق، باشیوه دولانّوق

گیچدی وصل وقتی، یتدی نار فرقت

یوزلره دوباره آخدی اشک حسرت

بس ندور علاجی قویموری محبّت

آیریلاق جواروندان، دویمادوق مزاروندان

باشیوه دولانّوق، باشیوه دولانّوق

زائری همیشه لطفه مایل ایله

لطفیوی بو جَمعه بیرده شامل ایله

دعوت ایله هر ایل فیضه نائل ایله

ایلمه بیزی مایوس، آهیله اولاق مانوس

باشیوه دولانّوق، باشیوه دولانّوق

نکهت مزارون دولدوروب جهانی

قبریوی گورنلر نیلوری جِنانی

شمع وصله یانّوق آیریلیق زمانی

آیریلیق چَتین غمدور، یاندوران همین غمدور

باشیوه دولانّوق، باشیوه دولانّوق

صحنیوه گَلنده دسته لر دوزولدی

حسرتیله گوزدن اشکیمیز سوزولدی

مرقدوندن اَللر بیر زمان اوزولدی

یوخدی قالماقا فرصت، ایلیاخ گرک رجعت

باشیوه دولانّوق، باشیوه دولانّوق

هر کیمون اورکده واردی بیر ملالی

لطفیله قبول ایت بیزدن عرض حالی

درگهوندن آخِر ایتمه دست خالی

سائلی یولا سالسان، خوشدی گوگلینی آلسان

باشیوه دولانّوق، باشیوه دولانّوق

نسگلون اورکده بو سیاق آپارّوخ

بو گوزل رواقدان اشتیاق آپارّوخ

سینه لرده درد افتراق آپارّوخ

هجریله یاناق اوقات، بیرده بیز گَلاق هیهات

باشیوه دولانّوق، باشیوه دولانّوق

گلشن مزارون گُل آچوبدی تازه

هر کس اوز دلینجه دل آچوبدی تازه

تا اولاق مرخّص ایستیروخ اجازه

(اعظمی) قالوب حسرت، ایله قبریوه دعوت

باشیوه دولانّوق، باشیوه دولانّوق

مرحوم اعظمی تبریزی

منبع مجموعه کانالهای مدح و مرثیه