متن نوحه های ترکی و فارسی

احوالات حضرت رسول اکرم (صلی الله)

ابدی کسوف ویروبدی یوز بو گون آفتاب رسالته

اثر خسوف بو وقعه دن یتیشوبدی ماه ولایته

پوزولوب نظامی ثوابتین داغیلوب کواکب لامعه

سالوب عالم ملکوتیده ایله انقلاب بو فاجعه

که مرمّت اولمیاجاق دیور ملکوتین اهلی بو ضایعه

ایله بیر شکست بو ضایعه یتوروبدی رکن هدایته

او که اصل علّت غائی هامی ممکناتیدی خلقتی

یتیشوب زمان تشرّفی یازولوبدی رقعه ی دعوتی

حرم مُکَوِّنِ عالمین گُل بزمی، محرم خلوتی

شرف حضور تاپوب یتوب گنه مجلس ازلیّته

ملکوتیان جبروتیان گِیینوب قرا بو ملالیدن

یری وار دیسم گَلور آغلاماق سسی بارگاه جلالیدن

اوجالوبدی ناله سسی علی شه ذوالجلال خصالیدن

که صفاته مظهر اولان گرک یتوشه مقام امامته

او که حقدی ذاتینه یوخدی یول بُلونوبدی ذاتی صفاتیله

تانیدوبلا ممکن و واجبی بیزه بیر ممات و حیاتیله

بو اَتّم آئینه روبرو اگر اولمیِیدی مماتیله

بونی عین ذات بُلردی خلق اوزینی سالاردی ضلالته

چکیلوبدی قاره فلک لره دوشنوبدی عرشیده فرش غم

احد، ‌احمده اوزی تعزیه دوتوب، عالمه یِتیشوب اَلَم

بودی فرق احمدیله احد، اونا وار حُدوث بونا وار قِدَم

بو قضیّه میمِ مماتیله یازولوبدی فرق عبارته

رخ جلوه ی ازلی تاپوب بو گون ابر مرگیله اختفا

ایکی گوشواره ی عرش اولوب بو خفائیله غمه مبتلا

او که سرّ طور سِنیندور آدی مصحف ایچره ایدر نوا

چکیلوبدی پرده ی درد و غم رخ ماه چرخ خدارته

گُل گلستان محمّدی شرف زنان جهان، بتول

ایله گُل کیمی سارالوب سولوب که گورن عذارین اولار ملول

گوزی یاشلی ویرماقا تسلیت جبروتین اهلی ایدوب نزول

گُل یاس و لاله ی غم دَرَر گَلن اول چمنده سیاحته

او خانم که تربت مقدمی اولوب عین مریمه توتیا

بابا وای دلینده عذارینه داغیدوبدی طُرّه ی مُشک سا

سارالان گُل اوسته باخان دیر توکولوبدی مُشک ترختا

نجه زلف سر، نجه مُشک تر، متحیّرم بو شباهته

من او زلفه مُشک ختا دیدیم بو خطادن ایلورم اعتذار

ایله تار زلفه دگل بها دوتا گر بو عالمی مُشک تار

قیریلا او زلفین اگر تِلی ایدر عالمی ایله تار و مار

که قیامت عالمی تک سالار هامی اهل عالمی وحشته

نجه مُشک تر که نظیری وار نه ختا خُتن ده نه چین ده

نه ختا و چین ده بلکه یوخ ایله مُشک خلد برین ده

نجه تار زلف که تِل به تِل داغیلاندا ماه جبین ده

پوزار انتظام طبیعتی دوشر اختلال جماعته

او سیاه زلف که حسرتین چکه مشکِ ناب و عبیر تر

نه روا آغاردا او طُرّه نی غم و غصّه و اَلَم و کَدَر

نه او طُرّه تک شب قدر اولار نه بتول حُسنیده بیر بشر

نه قدر جلالتی وار دوزوب او قدر ملال و مصیبته

نجه وار جلالت و جاهینون نه بدایتی نه نهایتی

ایله وار مصائب و رنجینون هامی ابتلایه مزیّتی

بو جهاندا گرچه آز عمر ایدوب ولی چوخ چوخ اولدی مصیبتی

نه وار ابتداسی جلالینون نه یتر ملالی نهایته

اوزی نور بخش خور فلک و جناتی مطلع نوریدی

ایله جسم پاکی لَطیفیدی که لباس اَلینده حوریدی

نجه حور؟ نوری جمالینون ایله زیب حور و قصوریدی

که اگر اولمیِیدی او نور خلق ابدی قصوریدی جنّته

بو قضیّه پوزدی خیالیمی منی سالدی ناله و شیونه

یری وار که قانینی قلبیمون ایکی گوزلریم توکه دامنه

ایله بیر لطیف بدن دوزر نجه تازیانه ی دشمنه؟

شل اولیدی قنفذین اللری که او جسمی سالدی مشقّته

نه مقامه عرض ایده بُلمورم یتوروب جفانی او نابکار

قرالوبدی فاطمه نین قولی یخیلوب حبیبه ی کردگار

ویروب عاقبت قیزی زینبه بو قولی قرالماقی یادگار

ولی چوخ تفوّقی وار اونون غمینون بو معدن عصمته

آناسی بتولین اگر قولین ستمیله قنفذ ایدوب کبود

بالاسی مخدّره زینبی او قَدَر ووروب سپهِ عنود

که شبیه اولوب گَُل سوسنه باشا باش او گُل کیمی بیر وجود

یری وار چمنده گَُل آغلیه او بنفش رنگ علامته

قلمین نه واردی او قدرتی یازا وار نه محنتی زینبون

دیلیمین نه وار او جسارتی دیه وار نه حالتی زینبون

او روایتی دیه بُلمورم واریدی جراحتی زینبون

آناسی بو بزمیده اولماسا ایدرم اشاره روایته

آناسیندان عذر ایدورم دِیَم قیزی زینبون نه ملالی وار

نه دُویولماقی نه سُویولماقی هامی غمده حدّ کمالی وار

اودی بزم قُرب الهیده ایله بیر مقام و جلالی وار

که بونا توسّل ایدن زمان یتوشر دعالر اجابته

بُلوسن ((حسینی)) نون ای خدا بدنینده واردی نه علّتی

نه طبیب لر بُلور آدینی نه ویرور نتیجه طبابتی

ید قدرتیله اوزون شِفا، ویر آپار بو رنج و بو زحمتی

بو آنا بالایه تصدّق ایت منی تیز یتور بو سعادته

 مرحوم حسینی سعدی زمان

منبع مجموعه کانالهای مدح و مرثیه