متن نوحه های ترکی و فارسی

احوالات حضرت سکینه (سلام الله)

در قتلگاه

گلوب سکینه او گل جسمی چکدی آغوشه

او قدر آغلادی تا گیتدی غشدن هوشه

مهارکشلره امر ایتدی میر فوج ستم

آیردیلار اسرانی، شهیدلردن او دم

گلوبله بیر نچه بی رحم ساربان لعین

سکینیه دئدیلر، کای اسیر زار و حزین

بس ایله بو قدر ایتدون روانه گوز یاشون

که سنده، دور یولا دوش، گیتدی یار و یولداشون

او نازنین بالا گوردی، اونی سپاه شرور

جفا الیله او باشسیز جنازه دن آیرور

دئدی دیون که گوروم ایلسوز بو ساعت کوچ؟

و یا بو چولدن ایدر صبح بو جماعت کوچ؟

بو التماسی گلون مندن ایلیون قبول

قویون اولوم بو گجه من بو نعشیله مشغول

آتام جنازه سی اوستنده آغلیوم تا من

دویونجا کام دلیمجه بیر ایلیوم شیون

اگر هلاک ایده درنده لر بو چولده منی

اولا اوز عهده مه اوز قانیم، ای گروه دنی

بو التماس قبول اولمادی او مضطردن

آیریدیلار اونیدا نعش شاه بی سردن

تسلی ویردیله آیا آیردیلار؟ یوخ آه

آیردی بلکه اونی تازیانه خواه نخواه

گوروب که چاره سی یوخدور، گرک دوروب گیتسون

گوتورسون ال باباسیندان، آناسینه یتسون

آتا جنازه سینه بیرده باخدی حسرتیله

او ساربانلارا ایتدی خطاب رقتیله

دئدی قالام بو گجه ویرمدیز منه مهلت

گلون ویرون او قدر لامحاله بیر فرصت

گیدیم بو چولده تاپوم شیرخواره قارداشیمی

اونوندا نعشینه ایلوم نثار، گوز یاشیمی

بو خسته دلده اونون رشته محبتی وار

روا دگول که اونی گورممیش گیدم زینهار

گلوب ترحمه بی رحملر ویروبله امان

بیر آز دولاندی سکینه او چولده سرگردان

یتشدی مقصده آخر او وصل مشتاقی

که تاپدی نعشلر ایچره او قانلی قونداقی

گوروب او غنچه نی یرده ، فسرده بیر گل تک

او دلشکسته بالا، دل آچوبدی بلبل تک

دئدی اویان گوزون آچ، اصغریم اویان قارداش

نه خواب نازیدی توپراقلار اوسته؟ جان قارداش

اگر چه سوز عطشدن کباب اولوب یاندون

سو اولمادی سنه بیر شربه، تشنه اوخلاندون

ولی گیدوب اوزون ایتدون خلاص محنتدن

سکینه نون یوزی گولمز داخی مصیبتدن

اورکده چوخدی ملالیم، بیانه گلمز علی

هزار حیف که سندن باجون اوزولدی الی

یتنده جدیمزون محضر مقدسینه

منیم دلیمجه سلام ائت، حضور اقدسینه

باجون بو عرضینی ایله پیمبره اظهار

ایدوب عزیزه لرون، امتین شقی لری خوار

بو سهلدور بیزه اولمادی حرمت

اسیر ایدوبله بیزی کوفیان بدفطرت

چکوله جبریله شامات و کوفیه ساری

دئدیم گلیم سنی قارداش گوروم گیدوم باری

او سود امر بالانون بیر قولونی آچدی یره

باشین قویوب قولی اوسته، دله تسلی ویره

اوزاندی رافتیله آچدی هر ایکی قولونی

ایدوب حمایل او قنداقه، صاقینی صولینی

سرشگ آلی دوزوب یوزده، شده مرجان تک

او زرد و سرخ گلی، باسدی سینیه جان تک

ایکی دوداقینی پیکان بیچن یره قویدی

نه بلکه خنجر بران بیچن یره قویدی

گلوب او دمده گینه ساربان کینه شعار

او بلبلی او سولان غنچه سیندن ایتدی کنار

شتابیله اسرانی گینه ایدوبله سوار

دیار کوفیه یول باشلانوب چکلدی قطار

گیدردی قافله، و لیک چوخ نگران

که شهر کوفیه یتدی امان او گوندن امان...

 مرحوم استاد مشهدی علی اصغر ذهنی

منبع مجموعه کانالهای مدح و مرثیه