متن نوحه های ترکی و فارسی

زبانحال حضرت رقیه (سلام الله)

سوال و جواب

عمه‌جان یقین اؤللم، چون منه عیان اوْلدۇ

گلمدی علی اکبر، جان وئرن زمان اوْلدۇ

دۇر چێراغێ بیر یاندێر، عمه‌جان سنی تاری

قوْی دۇرۇم آیاق اۆسته، بیر باخێم وطن ساری

بیر وصیتیم واردێر، ائیله گؤز یاشۇن جاری

اکبریم فراقیندا، باغرێم عمه قان اوْلدۇ

ای اسیر آواره، تاپمادم سنه چاره

گل قۇجاغیمه قوْیما، گۆل اۆزۆنی دیواره

یئدی قارداشێم اؤلمۆش، رحم ائله من زاره

باشیمه گلیب توفان، ای رقیه جان لای لای

بۇ خرابه ده ، سوْلدۇ گۆل بۇداغیندا

قالدێ گؤزلریم یوْلدا، اکبرین فراقیندا

گل چالێشگینان عمه، من یتیم سوْراغیندا

معجرین کفن ائیله، چوْخ حالیم یامان اوْلدۇ

ای یتیم بیچاره، زینبین ندن اؤلمز

کثرت قناعتدن، گؤزلریم بالا گؤرمز

بیر نفر غریب اوْلسا، کیمسه یانینا گلمز

من اوْلۇم سنه قۇربان، ای رقیه جان لای لای

عمه جان یقینیمدیر، نعشیمه کفن اوْلماز

من بۇ حالیله اؤللم، زنجیریم آچان اوْلماز

گلمدی علی اکبر، قبریمی قازان اوْلماز

جان گلیب دوْداغیمه، مؤهلتیم بیر آن اوْلدۇ

شام و کوفنین اهلی، تؤکدی قانلێ گؤز یاشێم

چوْخ منی دانێشدێرما، اؤلدۆ یئددی قارداشێم

طاقتیم گئدیب الدن، گؤر قارالێ دیر باشێم

باشێما گلیب توفان، ای رقیه جان لای لای

اۆزدیلر الیم آللاه، ماه بی‌قرینمدن

حسرت آیرێلیر جانیم، خێرداجا رقیه مدن

حشر اوْلۇنجا بۇ نیسگیل، سوز وْ آه سینه‌ مدن

گئتمز ای موسلمانلار، ای رقیه جان لای لای