زبانحال حضرت رقیه (س) 3038
زبانحال حضرت رقیه (سلام الله)
اولوب سندنصورا ویرانه کنجی مسکنیم قارداش
ولی قورخوم بودی اولسون خرابه مدفنیم قارداش
سالوبسان نچّه مدّتدور من غمدیده نی گوزدن
دیردی کیم بو نوعیله دونر عالمده یوز یوزدن
ندور باعث علی قارداش علاقه کسموسن بیزدن
دیمورسن کنج غربتده باجیم واردور منیم قارداش
ایدوبدور طائر روحیم سر زلفونده کاشانه
او کاشانه سراغینده دوشوب کوه و بیابانه
ویروب ویرانه ده منزل سنون عشقون بو نالانه
اولوب فکر سر زلفون همیشه مامنیم قارداش
مگر عاشق اولان بلبل همیشه یالوارار خاره
امید وصل یاریله گرفتار اولدوم اغیاره
مریض عشقم، اولماز دردیمه بولّم منیم چاره
اوچوب روحیم قوشی، بیر بوش قفسدور بو تنیم قارداش
طریق عشقیده شکوه اساس عشقه نقصاندور
همیشه عاشقین جانی علی معشوقه قرباندور
نثار اوّل معشوقه راه عشقیده جاندور
الیمده نقد جانیمدور دلیل مُتقنیم قارداش
مریض عشقی کیم گوردی خلاص اولسون مرارتدن
اطبّا درد عشقه قالدیلار عاجز طبابتدن
امیدیم یوخدی بیرده قورتولام قید اسارتدن
پوزولدی گللریم پامال اولوبدی گلشنیم قارداش
گزن راه محبّتده بلادن تلخکام اولماز
اوزین یاندورماسا پروانه اوددا، نیکنام اولماز
بلایه دوزمسم برنامه ی عشقیم تمام اولماز
مدیر عشقیدن گلمز خطاب احسنیم قارداش
منیم تک عاشق صادق هانی بو سطح غبراده
بلادن ایتمیه شکوه، جفادن گلمیه داده
اگرچه ظاهراً شمره اسیرم لیک معناده
سنون زلفون اولوب باعث نه تک اهریمنیم قارداش
بلالی باشیمی سالدون جهاندا گور نه غوغایه
گهی قول باغلی چکدون کوفیه گه دیر ترسایه
گلیدون مجلس ابن زیاده بیر تماشایه
گوریدون شعله وردور دلده اودلی مخزنیم قارداش
زیاد اوغلی جلالین ایستوری آفاقه بولدورسون
یتیمه قیزلارین گوز کاسه سین اشکیله دولدورسون
بو فکره دوشدی عمّم زینبی مجلسده اُلدورسون
اوجالدی طاق عرشه پرده پرده شیونیم قارداش
شفاعت قیلدیلار گیچدی او ظالم قتل زینبدن
جهانه اود ووروب یاندوردی دنیانی بو مطلبدن
امامین باشینی ووردی چخوب آئین و مذهبدن
یانوب محصول صبریم اود دوتوبدور خرمنیم قارداش
ساراتدی گوردوقوم غملر بو رنگ آلیمی سنسیز
جفای شمر بداختر پوزوب احوالیمی سنسیز
اگر رخساریمه باخسان بولرسن حالیمی سنسیز
اسیر اولدوم، طنابه باغلیوبدور دشمنیم قارداش
دگل ممکن گله هرگز بیانه شامیان ظلمی
خصوصاً جور شمر و زجر و خولی و سَنان ظلمی
بو یولّاردا منی جانه گتوردی شامیان ظلمی
آخوبدور خون دل گوزدن بویاندی دامنیم قارداش
او قدری یولدا دشمن اینجیدوب بو دیده گریانی
گیدوب تالانه صبریم، دویموشام جاندان علی جانی
نه تک من شاکیم گل بیر دانیشدور امّ لیلانی
دیسون گوزده نجه تار اولدی روز روشنیم قارداش
گلن گوندن بو شامه قالموشام طعن و شماتتده
قوتاردیم ناگوار عمری علی قید اسارتده
گورون یوخدور وورام بو زلفیمه شانه بو مدّتده
انیسیم غصّه دور، کنج خرابه میهنیم قارداش
ایدوبدور عاشقون چون مکتب عشق ایچره تحصیلی
دوزوب هرگز دیمز قارداش ووروب اعدا منه سیلی
ولی کشف ایلوری مطلب ندور بو صورت نیلی
نشاندور ظلم اعدادن بو رنگ سوسنیم قارداش
بودور عاشقلرین رسمی گرک گوزیاشلی جان ویرسون
شکایت قیلمارام هر قدر زحمت شامیان ویرسون
ووروب دویسون عدو آخِر خرابه بیر مکان ویرسون
یازیلموش روز اوّلدن خرابه موطنیم قارداش
او قدری آغلارام درده گتورّم قلب اعدانی
گِل آلود ایلرم گوزیاشیمیله مُلک ویرانی
گتورّم قبریم اوسته نالیه کلثوم و لیلانی
اولار توپراقلار آلتی خوابگاه ایمنیم قارداش
بابام جان ویردی غربتده اساس دین اولا محکم
مقدّس بو مرام اوسته نولور منده غریب اُلسم
گلایه ایتمرم هرگز قوری یرلرده جان ویرسم
کفن گر اولماسا اگنیمده وار پیراهنیم قارداش
رجائی هر قدر یازسان دگل ممکن تمام اولسون
سوزی آز یاز چوخ آغلا ورد و ذکرون بو کلام اولسون
ولی گر ایسته سن مطلب پسند خاصّ و عام اولسون
اولوب سندنصورا ویرانه کنجی مسکنیم قارداش
مرحوم رجائی
منبع مجموعه کانالهای مدح و مرثیه
با سلام