متن نوحه های ترکی و فارسی

 خطبه امام سجّاد (علیه السّلام)

در مجلس یزید

دولاندیروبدی یزیده یوزون دوباره امام

بویوردی ای قویان آدین خلیفه اسلام

بیر آز زمان من بیماره ویرگلن رخصت

چخوم بو تخته لر اوستنده ایلیوم صحبت

دیوم او سوزلری کیم اوندا وار رضای خدا

ایدوم او سوزلریله دین احمدی احیا

یزید ویرمدی رخصت امام بیماره

بولوردی ویرسه اجازه او شاه ابراره

چخار او منبره انمز سلیل شیر خدا

مگر ایدر هامی آل امیه نی رسوا

یزیده ایتدیله اشیاخ شام چوخ اصرار

که ای امیر بو بیر طفل دور اوزی بیمار

اجازه ویرسن اگر چخسا منبره بو جوان

سوزینی ایلیه بولمز بو کثرتیله بیان

دوشر اشاقه یقینا اوزی خجالت اولار

بیزه او حالی اونون مایه بشارت اولار

یزیدی ایتدیله مجبور شامیان رذیل

ویروب اجازه چخوب منبره امام علیل

اوتوردی منبرین اوستنده حجت دادار

امام حقیله حق مرکزینده دوتدی قرار

امام باشلادی بیر خطبه چوخ فصیح و بلیغ

گلوب تکلمه حق سوزلرین ایده تبلیغ

باباسی حیدر کرار تک او افصح ناس

ازل خدای جلیله ایدوبدی حمد و سپاس

درود گوندروب اوز جدینه او فخر هدات

علی فضایلنه ذکر ایدوب نچه آیات

قیزشدی شیر خدا شیری مثل شیر دلیر

اوزینه منتسب آیاتی ایلدی تفسیر

او آیه لر که مدللدی آل طاهایه

اولاردان ایلدی تفسیر بیر نچه آیه

بویوردی حجت مطلق ایا گروه ظلم

او کسلریکه تانوللار منی بلوله کیمم

منی تانوموری اونلار که شرح ایدوم سوزومی

دیوم کیمم اولارا تا تانوتدوروم اوزیمی

منم که حجت برحق کردگارم من

منم که عالم ایجاده افتخارم من

خدای عالم و آدم او فرد بیهمتا

بیز اهلبیته ایدوب آلتی خصلتی اعطا

علوم و صبر و جوانمردی و فصاحتدور

شجاعتیله گوگللرده کی محبتدور

علاوه بیزلره لطفیله کردگار جلیل

ویروبدی خلق آرا یدی خصالیله تفضیل

او یدی زاد بودی بیزدندی احمد مختار

فضیلتیم بودی بیزدندی حیدر کرار

اولوبدی بیزلره منسوب حمزه شیر خدا

بلون بو مطلبی بیزدندی جعفر طیار

ویروب خدا اونا بیرجفت پر ملائکیله

بهشتده طیران ایلور ایمدی لیل و نهار

دیوم صریح که بیزدندی سبطی الرحمه

بیزاهلبیتی سچوب جمله خلقدن دادار

خدای خلق بیزه نازل ایلیوب قرآن

بیزوق معادن وحی و شفیع روز شمار

اوزیمی ایمدی تانیتدورام ای جماعت شام

سیزه حسب نسبیمدن من ایلرم اظهار

منم او کیمسه نون اوغلی که قطب اعظمدور

او نقطه دور هامی عالم ولی اونا پرگار

منم او کیمسه نون اوغلی که عقل اولدور

اودور خلائقه مرسول قادر غفار

منم او کیمسه نون اوغلی که ایلدی معراج

مقام قربده حقیله باشلادی گفتار

منم او کیمسه نون اوغلی که قاب قوسینه

یتشدی اولدی همان یرده کاشف اسرار

منم او کیمسه نون اوغلی ردا ایچنده زکات

بغشلدی فقرایه او سید ابرار

منم او کیمسه نون اوغلی گویون ملک لرینه

امام اولدی - اونا ایتدی اقتدا احرار

منم او کیمسه نون اوغلی که ذوالفقاریله

او قدر جنگ ایدوب اسلامه گلدیلر کفار

منم او کیمسه نون اوغلی بقدر طرف بصر

شریک ویرمیوب اللهه اول حمیده شعار

امام اوز حسبین بو دلیله آندوردی

یتوردی تا بو یره مطلبی دولاندوردی

منم بویوردی شهنشاه انبیا اوغلی

منم ولی خدا شاه لافتی اوغلی

شهنشه حرمینم سلیل آلعبا

آتامدی مکه و زمزم اودور منا و صفا

منیم بابامدی که گوگلرده آدی احمد دور

نبی رحمت و یرده آدی محمد دور

منیم آتامدی ایکی قبلیه نماز قیلان

صمد پرست و صنم لردن احتراز قیلان

منم او کیمسه نون اوغلی اودور شه حرمین

بنای کفری یخان شهسوار بدر و حنین

بابام رسول امم دور آتام ولی خدا

آنامدی فاطمه گویلرده شهرتی زهرا

منم او کیمسه نون اوغلی که سو کنارینده

شهید اولدی سوسوز کربلا دیارینده

منم او کیمسه نون اوغلی که غسلی قان اولدی

یارالاروندان آخوب قانی مصرعی دولدی

منم او کیمسه نون اوغلی جفائیله دونان

اون ایکی ضربتیله کسدیلر باشون دالیدان

منم او کیمسه نون اوغلی جهانه اود سالدی

جنازه سی قوری یرلرده بیکفن قالدی

منم او کیمسه نون اوغلی که گون قباقنده

یارالی نعشی قالوب آتلارون ایاقنده

منم او کیمسه نون اوغلی که فرقه عدوان

سویوب لباسلرین پیکرین قویوب عریان

منم او کیمسه نون اوغلی که خیمه سی یاندی

عیالی قولقولا ای اهل شام باغلاندی

منم او کیمسه نون اوغلی که الدی قارداشی

دولاندی شهرلری نوک نیزه ده باشی

منم او کیمسه نون اوغلی تمام انصاری

یتوب شهادته قولسوز دوشوب علمداری

منم او کیمسه نون اوغلی که وار بویوک حسبی

آدی حسیندی باباسی محمد عربی

منم او کیمسه نون اوغلی که دینینی داندوز

عیالنی باش آچوخ شامده دولاندوردوز

منم او کیمسه که الدن قراریمی آلدوز

گوله گوله منه باخدوز تمام کف چالدوز

منم او کس که منه شمر دستگیری دیدوز

گیرنده شامه منه خارجی اسیری دیدوز

منم که قامتیمی بار ظلمله بوکدوز

بو شهرده باشما گاه کول گه اود توکدوز

اوقدر اوز حسبندن امام ایلدی یاد

که مسجد اهلی گلوب شوره باشلادی فریاد

یزید گوردی بویوک انقلاب اولدی عیان

دیدی موذنه کس انقلابی باشلا اذان

دوروب ایاقه موذن ازل دیدی تکبیر

امام ایلدی تمجید خالقه تقدیر

دینده اشهد ان لا اله الا الله

دیدی امام که ویرم بو لفظه منده گواه

اتیم قانیم سوموگوم تک به تک شهادت ایدر

که یوخدی غیر خداوند کردگار دگر

اوچومجی فصلین اذانون موذن ایتدی بیان

محمد آدین ایشیتدی امام کون و مکان

دونوب یزیده بویوردی امیر ملک حجاز

دی بیر گوروم منه ای قاتل اذان و نماز

اذانیده او محمد که ذکر اولور آدی

منم اونون نوه سی یا که سنسن اولادی؟

سنون باباندی محمد و یا منیم جدیم؟

دیسن منیمدی واریمدی جوابوه ردیم

منیم بابامدی دیسن کذبدور بو سوز ظاهر

یالان دیمز مگر عالمده فاسق و فاجر

منیم بابامدی اگر بو محمد عربی

اسیر ایلموسن عترتین ندور سببی

ویروبسن آل رسوله بیر ایله یرده سکون

نه ایسیدن نه سویوقدان اولوللار اوردا مصون

مرحوم استاد حسینی سعدی زمان

منبع مجموعه کانالهای مدح و مرثیه