احوالات قتلگاه

 

قوی دیوم نلر چکمیشم حسین

بو گیچن گیجه روزگاردن

 

بیر یانان چادر منزلیم اولوب

گور نه دوشموشم اعتباردن

 

دویموشام داخی روزگاردن

آختاریب نقدری تاپامادیم

بیرنفرمسلمان گچن گجه

 

پاسبان اولا اهل بیتوه

اولمیاخ هراسان گچن گجه

 

صبح اولنجا اطراف خیمه نی

گزمیشم هراسان گچن گجه

 

اینجیدیم داخی بوردا قالمارام

گورمدیم وفا روزگاریدن

 

پر شکسته قوشلار یغیشدیلار

ظلمله یانان اشیانیمه

 

بیر نفر پرستاریم اولمادی

قورخودان دوشوب لرزه جانیمه

 

نصف شب اوغلسوز انام گلوب

خیمگاهیده بیرجه یانیمه

 

پاسبان اولوبدور اوشاقلارا

قورتولوب باجون گیر وداریدن

 

ایتدی بیر قیزون درد و غصّه دن

بُل بو قدر خرسندیدم اُلم

 

باش قویوب دالینجا من ایستدیم

آختارام تاپام حالینی بُلم

 

بیر شقی منه رحم ایلدی

قتلگاهی گوستردی تا گلم

 

ویردی اوز بالاندان منه خبر

گوردی گیتمیشم اختیاریدن

 

سن اوزون بُلورسن نه حالیله

گلدیم ایله بیر دمده یانیوه

 

کاش کلمییدیم گلن کیمی

اللریم باتوب تازه فانوه

 

گوردوم اللرون ساربان کسوب

لعن حق گله ساربانوه

 

بیله بیوفالوق زمانه ده

گورمیوبدی بیر یار یاردن

 

باشوی بدنده گورنمدیم

تار اولوب گوزومده منیم جهان

 

آنلادیم که حرمت ایدوب سنه

کوللر اوسته خولی ویروب مکان

 

هر کسه دیدیم باشون ایستدیم

کوفه نی منه ویردیلر نشان

 

نه جواب واردور پیمبره

حشرده دوراندا مزاردن

 

گورموشم بو عریان جنازه وی

یوز ویروب منه غضّه و محن

 

چون سویولموشام یوخدی بیر زادیم

ایلیم سنون نعشیوه کفن

 

بیر گلور گمانیم بو ساچلارا

اذن ویر آچوم نعشون اوسته من

 

چاره یوخدی نیلوم خجالتم

چخمشام بو گون هر نه واردن

 

ساخلا ال (ثریا) داخی دایان

یازما بوندان آرتوق بو محنتی

 

بسدی بو قبول ایلسه اگر

پادشاه خوبان بو خدمتی

 

دل سنون دگول اوزگه نوندی دل

باشلیوب بیله طرز صحبتی

 

قیل یقین که تأیید خاصّدور

لطف اوزیله پروردگاردن

 

مرحوم ثریا تبریزی