متن نوحه های ترکی و فارسی

شهادت حضرت ابوالفضل (علیه السلام)

امام ناله سی تا یتدی جان قولاقینه

گوز آچدی اوندا که یتمشدی جان دوداقنه

مسیح عصر او دم مرده جسمه جان ویردی

همان او قالب بی روحه بیر روان ویردی

باخاندا گوردی دوتوب کربلانی شور حسین

احاطه ایلیوب اول سرزمینی نور حسین

ایدر جمال منیرینده جلوه نور الله

گرک اوزون بوله عباس فی حضور الله

غریبه وقتده یتمشدی یار محضرینه

خیال ایدردی که سورته یوزون قدملرینه

همان او حالده مبهوت قالدی موسی تک

توکردی سیل سرشکین یوزونه دریا تک

دانشماقا اؤزی چون شه اجازه ویرمشدی

او کهنه قالبه بیر روح تازه ویرمشدی

کمال عجزیله عرض ایتدی ای امام نبیل

کلیمه نطق , مسیحه روان, خلیله دلیل

سنی قسم ویرورم جدیوین رسالتنه

آناوین عصمتنه , هم آتان ولایتنه

نقدر منده نفس وار آپارما خیمه لره

بو التماسیمی آل عین لطفله نظره

سو اولمادی بولوسن من نقدر منفعلم

نه تک سکینه هامی اهلبیتدن خجلم

آپار سو مشکیمی قوی نعشیمی قالا یرده

سوسوزلارین یوزونه من باخانمارام بیرده

گورن سو مشکیمی بو پاره پاره صورتده

بولر که منده قصور اولمیوبدی خدمتده

علاوه چوخلاری آگه دگل بو حالیمدن

قشون هنوز منیم چخمیوب خیالیمدن

بیله بولولله همان صولتیله من قالورام

ولیک بولموری قان ایچره ال ایاق چالورام

اورک لرینده منیم ایمدیده هراسیم وار

سبب اودور سنه بیر بیله التماسیم وار

اگر خیامه آپارسان منی بو حالتده

جری اولور سنه دشمن لریم او ساعتده

مرحوم صافی تبریزی

منبع مجموعه کانالهای مدح و مرثیه