متن نوحه های ترکی و فارسی

عشق فقط علی

بو حدیثی بویوروب حضرت پیغمبر ئوزی

عالمه  حضرت  پیغمبرین حجتدی سوزی

اولسا قلبینده کیمین ذره اگر عشق علی

آللهین جنتی  واجبدی  او  اشخاصه بلی

مرتضی عاشقینین پیکرین اوت یاندیرماز

قبر ماموری اونون باشینه ضربت ویرماز

شکر اولا اللها که بیزده علی نوکریوخ

جانیمز آدینه وقف ایلموشوک حیدریوخ

آند اولا   سوره   حمده   علقه   قارعیه

نوره   یاسینه   حدیده    قلمه   واقعیه

آند اولا دین و کتابه ، هدفه ، هم شرفه

خلقی  شیدا   ایلین   گنبد  زرد   نجفه

ساکنان  فلکه   عرش   معلایه   قسم

طور سینایه  قسم  عالم  معنایه  قسم

کیم اوزون وقف  علی  ایلسه  دنیاده اگر

بیر گون عمر ایلمه گی تخت سلیمانه دگر

آند اولا روز غدیرون او گوزل رتبه سینه

آسمان دا  یازیلان  جاذبه لی خطبه سینه

آند اولا  لیل مبیتون ابدی  سایه سینه

شانینه نازل اولان مائده نین آیه سینه

آند اولا شمس و ضحانی اوخویان لبلرینه

ذکر  یارب لرینه  ،  نافله ی   شب لرینه

من علینین یولونی عشقیمه سرمشق ائلرم

او گوزل  آدی  گلنده  ئولرم  عشق  ائلرم

آند اولا  جنگیده  ابراز اولونان  قدرتینه

آسمانلاردا   گوزل  حرمتینه  شهرتینه

آند  اولا خیبرینه  ، بدر  و  احد   غزوه سینه

حجینه، کعبه سینه، سعی و صفا مروه سینه

آند اولا  مدحتینه،  همتینه  ،  غیرتینه

جوهر  عزتینه ، شوکت  و  شخصیتینه

آللهین لطفی علی شیعه سینه یار اولاجاق

دشمنان  علی و آل  علی ،  خوار  اولاجاق

آند اولا  تیغ  شرربارینه  هنگامه سینه

آند اولا سجده سینه معجز عمامه سینه

داغ داشا، بحر و بره، زینت و زیبنده لره

آللهین  درگهینه   شکر  ایلین  بنده لره

کوه و کاه و مه و مهر و چمن و چاهه قسم

مالک    روز   قیامت    فقط    اللهه   قسم

ئوز مسیرینده  حدیث نبوی  سیر  اولاجاق

مرتضی شیعه سینین عاقبتی خیر اولاجاق

حاج حسن رستمی