آرزوی زیارت و گریز به اربعین

 

عمر بویی حسین آقا چوخلی اولوبدی زحمتیم

کرببلاده وار گوزوم قویما اورکده محنتیم

 

هامی گلور مزاریوه لیک آقا گلنمورم

دوشموشم ایله بیر غمه هیچ کیمه من دینمورم

نوکر لایق اولمادیم علتینی بیلنمورم

جان رقیه ایستمه قلبیده قالسون حسرتیم

 

ایتدی بیری سوال که زیارت همت ایستوری

درهم و دینارین اولا و یا که قسمت ایستوری

جواب ویردی حضرت صادق که دعوت ایستوری

دعا ائدون که تا اولا امضا منیمده دعوتیم

 

سنکه آقا مریضلرین دردینه ایلسن دوا

منده مریض عشقوم ایله منه اوزون عطا

کرببلایه عاشقم دعوت ایله گلیم آقا

اوردا سنه سلام ایدیم آرتیراسان شرافتیم

 

هر ایل که اربعینیوه عاشقلرون نائل اولور

اورکده هر درد و غمی اوردا نچون زائل اولور

لطفون هاچان بو بیکسه بس آقاجان شامل اولور

کرببلا آدین دیوب ذکرین اولوبدی عادتیم

 

یاخنلاشاندا اربعین گوز قالمیوب که دولمادی

هانسی گلی نشان ویروم سنون غمونده سولمادی

چوخلاری گلدی قبریوه هیچ بیری زینب اولمادی

عرض ایلدی بیر عمر اولوب سنسیز حسین هر ساعتیم

 

مصحف درد و محنتی بو دشتیده وراقلادیم

آرخاسی اوسته دوندروب نعشیوی من قوجاقلادیم

یتونجه یانیوه سنون اوخ نیزه چوخ ایاقلادیم

الیم یارا ایاق یارا سنیله اولدی صحبتیم

 

یاره لرون باخدیم اخا گچوبدی چونکه سانیدن

ال آتدیم اللریوه تا یاندی اورک او آنیدن

گوردوم که یوخدی اللرون جفای ساربانیدن

سخلدی بو غملی دلیم یاخنلاشوب شهادتیم

 

دوشدی یولوم او شهره که اوردا خانملیق الدیم

سنون سسون آلان زمان ناقه صبری پیلدیم

گورنده داش یاراسینی گوردی رقیه نیلدیم

باشیمی محمله وروب جوشه گلوب محبتیم

 

بو چرخ کجروش ولی وئرموب امان رقییه

باشون گلوب خرابیه لعنت حق امییه

آلوب قوجاقه باشیوی بابا بابا دیه دیه

آخوبدی گوزیاشی یوزه دیوبدی یوخدی خلعتیم

 

باشدا اولان مصائبی اوچ جمله ده بیان ائدیب

قولاری سست اولوب بیزی ترک اخا بالان ائدیب

باشون دوشوبدی تا یره رباب بیر فغان ائدیب

بولمدیم اوندا نیلیم آرتیب او یرده حیرتیم

 

قالوب جنازه یرده چون دئمم اولوبدی چوخ نلر

بیر کسه سویلدیم گئده غسالیه وئره خبر

اللری تنده اولسا گر خرابیه دئدیم گلر

غسل وئرر بو پیکره عباس او ماه طلعتیم

 

گلوبدی دوسلاریم آقا اولدی بو سوز جای اسف

اولدی منیم یانان دلیم تیر مصیباته هدف

قربان و توحیده دئدیم قسمتیز اولسا گر نجف

حیدره سویله " حیدری " دیور که واردی حاجتیم