متن نوحه های ترکی و فارسی

در احوالات حضرت ابوالفضل (علیه السلام)

داد او ساعتدن قالوب حیرتده شاه

گوردی ال تاپدی علمداره سپاه

صفحه میدانی دوتدی انقلاب

توز آرا گزلندی قرص آفتاب

هر طرفدن طبل نصرت چالدیلار

نهر علقم سمتنه آت سالدیلار

هایهوی لشگر اشرار شام

گوسترور گویا اولوب عین مرام

اولدی محشردن نمونه، کربلا

قتل عباس اولدی عیناً برملا

ایلدی دریا کیمی بی پرده موج

طبل نصرت چالدی لشگر فوج فوج

رستخیز اوضاعی اولدی آشکار

بیر جدا حدینده قوزاندی غبار

هایهوئیله دولوب گوش فلک

قالدی حیرتده ثریا و سمک

مقتضای فتحیله هر بیر قدم

ئولدورون سسلردی لشگر دمبدم

ایلدی آتلی پیاده هلهله

دوشدی سردار حسین الدن اله

سسلدی قارداش گل ای پیک امید

اوز حیاتمدن من اولدوم ناامید

نقل ایدر بو قصه نی علیا جناب

زینب اول دخت خدیو مستطاب

خیمه لر جنبنده دورموشدی امام

شهریار عز و جاه و احتشام

عالم معناده سولدی صورتی

آشکار اولدی امامون غربتی

سسلدی زینب گل ای کالای غم

آسمان صبره، شمس محترم

عقل و عشقون معنوی سرمایه سی

مادر غم، درد و محنت دایه سی

اهل کوفه دین حقدن چیخدیلار

آت گتور عباسی آتدان یخدیلار

واردی هر موجوده حس و انتظام

حس موجود اولماسا، اولماز نظام

هر بشرده وار ایکی روح حیات

روح خلقت، بیرده روح انبساط

بیر بشر، بی روح، ایدنمز زندگی

روح گیتسه ئولدورر کلا رگی

انبساطون روحی قاردشدور، رشید

سخت وقته باغلیه فکر امید

قارداشون امیدی، قارداشدور بلی

صاف اولا باشی، ایکی سالم الی

گر چه فعلاً روح بهجتدن بوشام

روح خلقتده اگر گیتسه خوشام

وحدتیمده کل کثرتدن چوخام

ئولدی عباسیم باجی منده یوخام

ایتماقا بیر دم توقف یوخ صلاح

دورما زینب حاضر ایله ذوالجناح

قارداشیم اشرار الینده اولدی خوار

واردی اطرافنده سانسیز نیزه دار

زینب کبرا دوتوب بند سمند

شه ایاقین ایلدی مرکبده بند

واردی مقتللرده نقل معتبر

شاه دین گوردی داخی گلمور کمر

خانه زین اوسته تا اگشدی شاه

حربگاهه فوج نصرت آچدی راه

برج عقربدن چخوبدور آفتاب

مه سراقنده، ایده سیر شتاب

رد ایده اشراردن رنگ کدر

جمع اولا بیر برجده شمس و قمر

شش جهتدن چولقادی میدانی نور

هر طرفدن اولدی هامون، رشگ طور

ذوالفقارون قبضه سینده بیر الی

نور بیضا تک اولوردی منجلی

کلمه تکبیری تا اولدی بلند

تتردی اعضای لشگر بند بند

شه گلوب تا که یتشدی لشگره

میمنه هولیندن اولدی میسره

اوز یریندن اوینادی قلب و جناح

گورسنوب هر یرده سم ذوالجناح

شیر غران تک ووراردی ذوالفقار

هر طرفدن لشگری ایتدی کنار

سسلدی ای قوم بد سلک عراق

ای محیط بذله گویان نفاق

من حسینم یادگار حیدرم

نور چشم حضرت پیغمبرم

اولماسیدی حکم سلطان الست

ماه تا ماهی ایدردیم من شکست

لیک مامورم او حکم اجراسینه

غوطه ور اولام بو قان دریاسینه

بیرق فتح و بشارت آچمیون

بیر دورون ای لشگر کین قاچمیون

قلبیمون آرامین الدن آلموسوز

قارداشیم عباسی هاردا سالموسوز؟

درد هجران قویمیوب منده توان

تیز ویرون قارداشیم عباسی نشان

ایتمدی تاثیر سوز، بیر کافره

حمله ایتدی شه، صفوف لشگره

بیر بیر اوسته توکدی چون برگ خزان

سس اوجالدی هر طرفدن الامان

یوز قویوبلار قاچماقا اشرار شام

ایلدی تعقیب هر یردن امام

ساخلادی بیر یرده رفتارین سمند

گوئیا سالدی قضا بند کمند

گوردی قارداشین یارالی پیکرین

بیر بیره ورودی تاسف اللرین

اندی مرکبدن نه نوعی مقتله

گلمیوب مقتلدن عیناً سوز اله

دولدورب قان، گوردی شهلا گوزلرین

باشلادی دلدن یانقلی سوزلرین

دور ایاقه ای منیم آرخام ایلیم

ای آتام اوغلی، سنوب سنسیز بلیم

دور ایاقه گور نه گوز یاشیم آخور

چشم حسرتله سنه قارداش باخور

پیک دلداریله سر خوشسان اوزون

آچموسان قارداش ندن قانلی گوزون؟

آچموسان مین لر پر، اوج وحدته

کیم دوزر وحدتله بئله کثرته

عشق میزانین سرفراز ایلوسن

یا کومکسیز قارداشا ناز ایلوسن؟

کیمده وار سن تک بو آثار هنر؟

نصب ایده اوز باشنا شق القمر

باشون اوسته باخدیم ازل باشوه

گوردوم اگلشمش یارا خم قاشوه

باشوین جامی عجب اولموش شکست

اولموری قان کاسه سینده پای بست

صورتون نقشین پوزوب سوز عطش

یا اولوب بو صورت اوسته کشمکش؟

آنوا بیر دسته گلدور ساچموسان

شاهراه عشقه یا یول آچموسان؟

بو نجه پیکردی قارداش چاک چاک

ایلیوب لشگر یر اوسته زیب خاک

شوریله ساز ایلرم هنگ نوا

کیم ووروب اوچ شعبه لی اوخ آنوا؟

باشوین کیم سندروبدور کاسه سین؟

قارداشون عرشه اوجالدوب ناله سین

ویرموری اول قدر امان بو گوز یاشیم

وردیم اولموش دلده ایوای قارداشیم

آچ گوزون باخ بیر بو بیکس حالنه

وای منه وای زینبون احوالنه

(روفه گر) یازما داخی ختم ایت سوزون

دامن عباسه سال دائم اوزون

مرحوم  روفه گر 

منبع مجموعه کانالهای مدح و مرثیه