حضرت امام حسین (علیه السلام)

 

جهان جهان اولالی دوشمیوبدی دوشمیجاخ

بوبا صفا چمنون گللری طراوتدن

 

غریبه گللر آچوب نیزه لر فرازینده

سالوبدی لاله و نسرینی قدر وقیمتدن

 

نه گللده وار بو طراوت نه لاله ده بو صفا

نه بیله عالی چمن باش ویریب طبیعدن

 

ویریبدی گلشنه بیر غنچه آیری شور و صفا

سحر نسیمینی سرمست ایدب لطافتدن

 

پوزوبدی رونق بازار عشقی بیر یوسف

سالیبدی یوسفی حسن عالمینده شهرتدن

 

مقابلینده نه یوسف نه حوریان بهشت

وجاهتین ئوزی بالله دوشر وجاهتدن

 

ساتاشا نیزده مین یوسفین گوزی گوزونه

کسلله جمله سی جان اللرین محبتدن

 

قیامت عالمی هر نیزه دن عیان اولوری

صبا چکنده کناره حجابی صورتدن

 

چاتبتدی باش باشا باشلار جدا باشیندا عجب

حکایت ایلوری کثرتده عین وحدتدن

 

یغیبدی باشینه یتمش بیر عاشقین معشوق

بیان ایدر اولارا عشق بی نهایتدن

 

دادیزدیریب هامیا قان شرابنی ساقی

ئوزی چکوب باشا ته جرعه شهاتدن

 

فرات سهلیدی تسنیمه ناز ایدر والله

اوکس که مست اولا گر کوثر ولایتدن

 

شهید زحمتی رحمت بولر بلانی ولا

او لحظه دن که تاپار نشئه جام وحدتدن

 

شعار معنوی لا اله الا الله

عیاندی نیزه لر اوستنده سرخ رایتدن

 

ویریبدی جوهره عشقه عشق تعلیمون

امیر لشکر توحید بیر اشارتدن

 

نه گفتگو نه کشاگش که بیر خمار باخبش

محبت اهلینه گویادی مین عبارتدن

 

نه گفتگو ده اثر وار نه جستجوده ثمر

که یار یاره چاتار جذبه محبتدن

 

گلیبدی بال و پر آچسون فضای عشقیده عقل

ولیک شعله چکوب یاندی برق غیرتدن

 

حجاب و پرده نی ستار لم یزل گوتوروب

بولوندره هدفین ماجرای خلقتدن

 

بسیط فرشه نظر سالدی تا ملائک عرش

دوشوبله حیرته اعجاز آدمیتدن

 

حریم قدسیده سبوحیان ستر وعفاف

اولوبلا مات بو جاه و جلال و شوکتدن

 

طواف ایدیر جبروت اهلی عشق کعبه سینی

مگر اورکلری تاپسون صفا زیارتدن

 

جدایه سورتوری شوقیله شهپرین جبریل

که اخذ کام ایله سین مرشد طریقتدن