راز و نیاز در قتلگاه 1966
راز و نیاز در قتلگاه
اهلِ حقیقت عینِ بلایه بلی' دیَر
اهلِ مجاز لفظِ بلا گلسه لا دیر
حُبّ عالمینده واردی تقرّبده امتحان
محبوب اَلبَلاء اودور لِلوِلاء دیر
معشوق ، رسمیدور ایدر اور عاشقینه ناز
عاشق ، حبیبه عشقیده روحین فدا دیر
بیگانه نازِ دلبره دوزمز مُحقّقا"
اما بلی' بلایه مدام آشنا دیر
یوخ قدرتِ جواب بو رسوای عشقیده
ایتسن سؤال پادشهِ کربلا دیر
بو نکتهء دقیقه ، او عالِمدی فصل فصل
علّت اودور بلایه بلی' برملا دیر
عشق عالمینده گور نقدر امتحان ویروب
احسنت او شاهِ عشقه تمام انبیا دیر
جانان یولوندا مامَلکین ایله ترک ایدوب
محبوبِ لم یزل او شهه مرحبا دیر
توپراقلار اوسته قانه باتوبلار کومکلری
هر کیم باخار او دشتِ بلایه منا دیر
یالقوز سوسوز یارالی کومکسیز پناهسیز
تکیه ایدوب جداسینه وا وَحدتا دیر
بو رسمدور که هر کیمه شدّت ایدر بلا
احبابینه گوگل غمینی مطلقا دیر
بیرده یارالی نعشلره یوز دوتوب او شاه
قانیاش توکر عذارینه واغُربتا دیر
گاهی دییر دورون منی یالقیزلیوب قُشون
گاهی باخار خیامینه واحسرتا دیر
گه عون و فضلی و جعفری سسلر هراینه
واکُربتا او وارثِ قل اِنّما دیر
سسلر حزین سسیله وفالی کومکلرین
وا قِلّت المُعین امامِ هدا دیر
گه مسلم و حبیب و زهیری ایدر ندا
دردِ دلین هِلاله گهی جابجا دیر
گه اوغلی اکبری چاقورور ، گاه قاسمی
گاهی باخار فراته طرف یا اخا دیر
گاهی یوزین دوتوب قوشونا احتجاج ایدر
هل مِن معین او خامسِ آلعبا دیر
سلطانِ دین اوجالدوب اَمِن ناصر سسین
اهلِ حرم خیامده وا ذِلّتا دیر
هل من معین صداسینه اولمور جواب ویرن
لبّیک عنایت اوسته گلوبدور خدا دیر
ای سویگلوم حسین دیمه یوخ یار و یاوریم
لبّیک امروه هامی ارض و سما دیر
یالوارما دشمنه من اوزوم ناصرم سنه
اولما ملول لا سوزیوه اشقیا دیر
گر بزمِ یاره گلمه لیسن یاره چوخ گوتور
یارون یارالی گورسه سنی باوفا دیر
قوی مهجهء دلون قیرا اوچ شعبه لی خدنگ
جنّتده گر چه فاطمه وا مُهجتا دیر
معراجِ وصل آختارانا نیزه دور بُراق
کیم رفرفِ جلالته نوکِ جدا دیر
جدّون ، آتان ، آنان باش آچوب گوزلوری یولون
گَل باخما شمر زینبوه ناسزا دیر
قوی صورتا" اسیر اولا شمره حرملرون
گر چه اولاره خارجی اهلجفا دیر
حوریّه لر یول اوستینه گیسولرین سالوب
باخ فرشِ راهه گور سنه کیم خوش صفا دیر
آغزوندان اوخ وروبلا دولانمور اگر دلون
اوخلار سنون دلونجه منه چوخ ثنا دیر
مرآتِ حق نمادی یوزون ، گر چه قان دوتوب
عالَم بو وجهه آیینهء حقنما دیر
باشون قلجلانوبدی آتان مرتضی کیمی
یرده حسین گوی اهلی سنه مرتضی' دیر
سن مندن اوتری ماملکون ویرموسن بو گون
عینِ ولادی عشقوه هر کیم ابتلا دیر
منده تمام مامَلیکمدن گچم گرک
اهلِ جهان بو عالمه بِیع و شَرا دیر
باش ویرسن ایلسن اگر اسلامی سربلند
اسلامیان مدام سنه مقتدا دیر
باخما ئولوبدی قارداشون عبّاس عَلَم یاتوب
صاحب لوای حمد اونا صاحب لوا دیر
روزِ جزاده تاجِ شغاعت باشوندادور
اَینَ الحسین اهالی روزِ جزا دیر
چوخ تشنه سن حسین ، قورویوبدور دوداقلارون
آغزوندا خشک اولان دلون الماء ماء دیر
عالم سنون ، بهشت سنون ، کوثریم سنون
گر چه سو ایستینده سنه شمر لا دیر
حور و مَلک سنون ، بو هامی ماملک سنون
یا لَیتَ کُنتُ حِزب حسین ، اصفیا دیر
ارض و سما سنون ، بو هامی ماسوا سنون
اَعطَیتُ هر نه فکره گله ذُوالعَلا دیر
عرش و سمک فلک سنون ، حتّی اوزوم سنون
ذاتین سنه یارادان خونبها دیر
قوی عالمِ وَله ده قالا شاهِ کربلا
گور خیمه ده سکینه نجه وا اَبا دیر
قطعُ الوَتین امامی قیلوب تیرِ زهردار
الده عمامه وا ولدا مصطفی دیر
آتدان دوشوب ترابه عزیزِ بوتراب
دردِ دلین حبیبینه ایلر ادا دیر
عرض ایلر ای خدا بو حسینون بو کربلا
احسن وفای عهدیمه گور ماسوا دیر؟
عنقای قافِ وحدتم اوخدان پر آچموشام
هر کیم گورنده بال و پر آچموش هُما دیر
قانیم ترابِ کرب و بلانی گِل ایلیوب
بو قانلی تربته هامی خاکِ شفا دیر
زینب گلوب نوایه دییر وا محمّدا
وا زینبا بهشتده خیرالنساء دیر
باشیم جِداده کوفه و شامی دولانماسا
زینب گیدنده شامه کیمه رهنما دیر؟
هر کیم حسینه اولسا (حسینی) علاقه مند
صدقا" شهادت امرینه یا لَیتَنا دیر
طرزِ کلامی مُلهمِ دولاندیریب
بو یرده منطقیم بیر عجب ماجرا دیر.
مرحوم حسینی سعدی زمان
منبع مجموعه کانالهای مدح و مرثیه
با سلام