کوچ از قتلگاه

 

وا مصیبتا وا محمدا، یادیمه گنه دوشدی کربلا

سویدولار حسینون جنازه سین، غارت اولدی دراعه و ردا

قویمیوبلا حتی او جسمده دورت مین اوخ دگن کوینگی قالا

بیر نفر تاپلموب دیسون سیزه نیلیوب بو باشسیز بدن بوگون؟

 

بو یارالنون بسدی جسمده، اوخ قلج یری بی حسابدور

کسموسوز باشین سویمیون داخی، میته ترحم ثوابدور

بو ورق ورق منتشر بدن، اهل ذکر و ام الکتاب دور

سیز اگر کتاب اهلیسوز جفا، ایلسوز کتابه ندن بوگون؟

 

آه او وقتدن باجی قارداشبن، تاپدی نعشنی قتلگاهده

گوردی رختین ایله سویدوبلار، ساتر بدن یوخ او شاهده

بیر نفر مسلمان تاپولمادی، عرض ایدوب حسین بو سپاهده

ساخلیدی باری کفن سنه، پاره پاره بیر پیرهن بوگون

 

عور قالماق اعرابه ننگدور، سیما او عریان اولا امیر

آغلاسام اولنجه سزادی من، عور سنی لشگر شریر

سویماسیدیلر رختیمی اگر، ایتمسیدیلر باش آچوخ اسیر

پیکرون قوییدیم محالیدی، توپراق اوسته من بیکفن بوگون

 

سن اوسان که یثربده چگنینه، میندیرردی دائیم سنی رسول

سن اوسان قزل گل کیمی سنی، ایگلیوب اوپردی آنام بتول

ایمدی پایمال ایلیوب بیله، خار نعلیله جسموی خیول

گل کیمی داغلمش جنازه وی، یوخدی بیر نفر دفن ایدن بو گون

 

سن اوسان که زلفون یوماقلیقا، گتدی جبرئیل آب سلسبیل

سن اوسان قماطونله عرشینه، زیور ایلدی خالق جلیل

سن اوسان سنه اولماقا ل له ، فخر ایدردی گوگلرده جبرئیل

قصد قربتیله ووروب یارا، یاره اوستینه هر گلن بوگون

 

سن اوسان آلوردی قوجاقینه، جان کیمی سنی مرتضی علی

سن اوسان اوپردی جمالوی، مظهر جمال خدا علی

سن اوسان دیردی او مقتدا، جانوه حسینیم فدا، علی

هاردادور علی؟ بیر گلوب گوره، قالموسان نه احواله سن بو گون

 

سن اوسان که لعیا بهشتیده، خدمتونله ایلردی افتخار

سن اوسان پناهنده مهدوه، فطرس اولدی درک ایلدی وقار

سن اوسان گوزل آدیوی ایدوب، صاق عرشه پیرایه کردگار

یاتموسان اوزی قویلی باتموسان، قانه چون عقیق یمن بوگون

 

پیکرونده کی قانلی یاره لر، انجم سمواتی سان ویرور

بو قانا بلشمیش ستاره لر، هر بیری بیر عالم نشان ویرور

نه دیزیم گلور گیتماقا منیم، نه دایانماقا شمر امان ویرور

نیلیوم الیمده علاج یوخ، قولاریمدا واردور رسن بوگون

 

هانسی بیر یرین کربلا کیمی، قانیله دولی گلستانی وار؟

هانسی گلشنین قتلگاه تک، هم بهاری وار هم خزانی وار؟

هانسی گلستانین منیم کیمی، باغری قان اولان باغبانی وار؟

ترک ایدوم نجه من بو گلشنی؟ هاردا واردی بیله چمن بو گون؟

 

زینبوه سس ویرموسن ندن؟ بلموسن اسیرم بلالیم؟

یوخ سسیمه بیر کیمسه سس ویرن، قارداشیم ئولوبدور عزالیم

سن قلیجدان اوخدان یارالیسان، منده قمچیلردن یارالیم

قولاریم اولوب تازیانه دن، نیل رنگ، چون یاسمن بوگون

 

ای قویان تحیرده عالمین، اهلنی شئون و جلالتی

درگه ملک پاسبانوزه، گر چه یوخ (حسینی) لیاقتی

سیز او قدر اما کریم سوز، جود و فضلوزون یوخ نهایتی

ایلیوب جری جودوز ایستورم، بو خزف کلامه ثمن بوگون

 

 مرحوم حسینی سعدی زمان

منبع مجموعه کانالهای مدح و مرثیه