متن نوحه های ترکی و فارسی

احوالات راه شام

ایشیق گوندوز دونوب شامین یولندا چون شب تاره

علی اکبر باشین گوردی سکینه گلدی گفتاره

خم ابرولرون قارداش علی محراب طاعتدور

یوزون قبله مقام قربده عشقون عبادتدور

تاپوب تجرید کامل قید جسمانیدن عالمده

اسیر جذبه حسنون، موحددن عبارتدور

یوزیمه اللریمه اشگیمله شست و شو ویرم

وضو خون جگردن، اهل عشقه خوش طهارتدور

دیر تکبیر نیزه ده سلطان دین باشی

نماز عشق، رکن و فعل و شرطی اوزگه صورتدور

خدایه حمد اولا عهد السته ایلدیم ایفا

خطاب آیه اوفو، جوابی بو اسارتدور

ایدر راکع خضوعیله منی بوینومداکی زنجیر

یوزوم اوسته یخار ناقه، سجودیم اوزگه حالتدور

شهادت ویرم آللهه رسوله، تا سلام اهلی

بوله آل رسولم، حبمیز اجر رسالتدور

شکنج زلف شبرنگون، سالوب مه صورته حاله

قمر عقربده دور یا گون جدا اوسته قیامتدور؟

جمالون سوره والشمس، زلفون معنی واللیل

سراسر صفحه رخساروه قرآن کتابتدور

جبینونده ایدوب تیغ جفا، شق القمر ظاهر

سپهر حسنده اعجاز پیغمبردن آیتدور

خمیده قاشلارون، بیر جفت شهلا گوزلرون، گویا

ایکی لفظ جلاله اسم اعظمدن حکایتدور

خم ابرو کنارینده دوشن تک نقطه خالون

علی بسم اللهین آلتنداکی بادن اشارتدور

جمالوندن اگر باد صبا زلفون کنار ایتسه

اولار زایل غمیم گر چه ملالیم بی نهایتدور

دوزولموش قطره قطره قان، سر زلفونده چون مرجان

منیم قانه دونن قلبیم غریق بحر محنتدور

او قانلو گوزلرون آچ، گوزلرون قربانی گل بیر نطقه

اسیره باجوی دیندور، گجه وقتنیده فرصتدور

آچیلسا صبح فرصت فوت اولار، راز و نیاز اولماز

دله قویماز گلوم من، ساربانبم بی مروتدور

سیزیلتمدان گلور غیظه، ورار رخساریمه سیلی

اورکده یوخدی رحمی، معدن بغض و عداوتدور

یوزیمده نقشه سیلی، چکوب بیر پرده نیلی

ایشیق گوندوز منه، شامین یولندا لیل ظلمتدور

پیاده گلمیشم از بس علی کوه و بیابانی

ایاقیم گور نجه خار مغیلاندان جراحتدور

قوولار آت قباقینده ورالار باشیمه قمری

گینه صبر ایلرم، عشقونده بو ذلت جلالتدور

(حسینی) نوکروندور نچه آیدور لیک ناخوشدور

نگاه چشم پرخونون مریضه عین صحتدور

مرحوم حسینی سعدی زمان

منبع مجموعه کانالهای مدح و مرثیه