احوالات کوفه
قران اوخین باش یارالی باشوا قربان
باش باشه چاتان اوغلووا قارداشوا قربان
گل گوزلریوون قاننی اشگیم له سیلیم من
آیات اوخین دیللره قربان کسیلیم من
حاشا بو منور باشی تشبیه ایدم آیه
آی نیزه ده قران اوخوماز آیه به آیه
آیات مبین دور بو باش آیات خدایه
باشدان ایاقا عشقله پرشوردی بوباش
پیغمبرون آنّندان اولان نوردی بوباش
وار بو یارالی باشون عجب حُسن لقاسی
خون گرم دوداقلاردا حزین طرز اداسی
حق کامه سی کهف آیه سی جان بخش صداسی
ای وای بوباش قارداشیمون باشینه بنزر
بیر صورت زیبادی که نقاشینه بنزر
بو جاذبه لی سسده بویوک بیر هیجان وار
دنیا دولوسی جان یارادان جوهر جان وار
زینب کیمی قلبونده مگر سوز نهان وار
اود دوتدوم آلیشدیم بو یانقلی نفسوندن
جان یولدی گیچن گونلریمون نقشی سسوندن
عطشان کسیلن باش لب شادابی نشان ویر
لعل لب آرا لؤلؤ نایابی نشان ویر
کهف آیه سی تک آیت اعجابی نشان ویر
دور کرب و بلا سمتینه اعجازیوی گوستر
کهفنده یاتان پیکر جانبازیوی گوستر
ای باشی سرافراز ایلین نوک جدانی
دلکش سسیله لرزیه سال موج فضانی
تیترت یری افلاکی بوتون کون و مکانی
قوی دولدورا آفاقی کمال کلماتون
عالم گوره یکساندی حیاتونله مماتون
قران اوخی قران اوخوماق ذکر جلیدور
گورسونله بو باش صاحبی نور ازلیدور
دردانه ی زهرادی حسین ابن علیدور
تحصیلینی تکمیل ایلیوب دوش نبی ده
تفسیر یازار نیزه ده قران مجیده
حسرت چکرم نیزه نون احوالینه قارداش
اوپدی بوغازوندان یتوب آمالینه قارداش
افسوس باجون زینبون احوالینه قارداش
دشمنلر الینده گزر الدن اله باشون
گویمازلا منیم یانیمه بیردم گله باشون
قان قطه سی مرجان کیمی مژگانه دوزولموش
جان رشته سینه گوهر شادانه دوزولموش
افروخته مشعلدی نیستانه دوزولموش
دلخون جگریم پارچالانوب پاره سی دور بو
بیر داغ درونون باش آچان یاره سی دور بو
اوّل باشینی باشدان ایدر شمع شبستان
روشن اولور اوندان صورا خلوتگه جانان
سن عشقده سرخیل وفاسن، سنه قربان
باش سهلدی سن حق یولونا واریوی وردون
دوتدون قولونی قولسوز علمداریوی وردون
بیر باش که ایدر ناز اونون جلوه سی نوره
بیر باش که باشین قویمازیدی سینه حوره
خولی نه جثارتله اونی قویدی تنوره
سن ایگل رعنا نیه توپراقه باتوبسان
یوخسا گیجه کول اوسته تنو ایچره یاتوبسان
بولدوم بو اوزاق یولاری قارداش نیه گلدون
باش چکماقا با سیزلارا بو کوفیه گلدون
لیلانون اوغول وای سسنه وای دیه گلدون
خوش گلدون عجب وقتده سالدون بیزی یاده
گل قویما گیداخ بزمگه اِبن زیاده
ای پادشهیم قبله گهیم بنده نوازیم
زنجیر ستم گردن بیماره نه لازم
آرتار اونا باخدوقجا منیم سوز و گدازیم
وار گور یری باشین آچا زلفون یولا زینب
قانه بویانان باشوا قربان اولا زینب
بیر عائله نون مسکن آبادی یخیلدی
تاراجه گیدن لانه ی یبربادی یخیلدی
طوفان بلاخیزیله بنیادی یخیلدی
حسرت کشم آخرنه اولور یانیمه گلسن
ای روح و روان، روح گلور جانیمه گلسن
افسوس گل نازیمی دست ستم آلدی
بلبل باش آلوب گیتدی گلستانی غم آلدی
بیر قاره بولود چیخدی بیابانی چم آلدی
گل گیتدی خزان گلدی چمن ایللره قالدی
گرمیّتِ جمعیّتیمیز محشره قالدی
گوردوم یارالی باشوی باش محمله چالدیم
بنزتدیم او باشه باشیمی کام دل آلدی
سن سیز آنام اوغلی نه یامان گونلره قالدیم
صد شکر باشون سایه سی دوشدی باشیم اوسته
آرتیخ منی وورمازلا آخان گوز یاشیم اوسته
هر یانه گیدم منله گلیر جور زمانه
خوش مونس دلسوزدی وار منّتی جانه
کیم گوردی یاناندا گَلَه پروانه فغانه
عشقونله سنون گوگلومی قارداش غمه ویرمم
عشق عالمنون عالمینی عالمه ویرمم
کیم کعبه مقصودی گوروبدور چخا سیره
سیرینده بوتون خیر ویره یاریله غیره
بو سیر برادر چکر آخر سنی دیره
گوزلر یولووی ایمدی در دیرده عیسی
یوز قبلیه سجّاده آچوب راهب ترسا
ای پایه ارشادی سماواته چخان باش
گلدسته ی یعرش اوسته مناجاته چیخان باش
یالقوز باشنا گردش شاماته چخان باش
شامون یولی چوخ قورخولیدی تک باشا گیتمه
گیتمه بو باشین زحمتی باشدان آشا،گیتمه
دائم باشون آردینجا گلور محنت ایام
گورسون بو باشون امری تاپار هاردا سرانجام
من تک سورونور یرده باشون سایه سی تا شام
ذرات گزر سیرده خورشید دالنجا
منده گزرم سایه ی امّید دالنجا
حسرتله اولور ساکن ویرانه رقیه
ویرانه نی ایلر بیزه غمخانه رقیه
طوفان مصیبتده دویار جانه رقیه
شام ایچره غریبانه قالیر مهد مزاری
دائم او مزار اوسته گزر ناله زاری
(هندی) ندی بو سنده اولان حرص اضافی
ترک ایله سخنگولره میدان مصافی
هر فرده بو بازاریده کافیدی کلافی
شاه شهدا چون آچار ابواب جنانی
البته سالور یاده بوتون نوحه یازانی
مرحوم هندی
منبع مجموعه کانالهای مدح و مرثیه
با سلام