زبانحال حضرت لیلا (سلام الله) در راه شام

 

باخدی چون اکبرینون نیزده لیلا یوزینه

گوردی زلفی توکولوب چون شبِ یلدا یوزینه

 

ای صبا بیرجه اَس اول زلفِ پریشانی داغیت

خانمان دلِ ویرانهء لیلانی داغیت

دلِ ویرانهء لیلا کیمی دنیانی داغیت

قویما دوشسون داخی اول زلفِ سمن سا یوزینه

 

چون کنار ایتدی صبا زلفِ شکن در شکنی

گورونوب هاشمی خال و خطِ وجه ُالحَسنی

آتدی سازنده لر اول وقت دف و دایره نی

بیر باخوب اکبره بیر باخدیلا لیلا یوزینه

 

دئدیلر کیمدی بو عورت بیزی نالان ایلین

یوخسا لیلادی بو مجنون کیمی افغان ایلین

سنی ای تازه جوان قانوه غلطان ایلین

نجه محشرده باخار حضرتِ زهرا یوزینه؟

 

قاشلارون طاقی اوغول سورهء یاسین اوخوری

باخا هر کیم یوزیوه آیهء تحسین اوخوری

اهلِ قرآندی بولار جمله سی طاسین اوخوری

نجه چکدیله قلج مظهرِ طاها یوزینه

 

آیهء تحسین : فتبارک الله احسن الخالقین ، سورهء مبارکهء مومنون ۱۴

 

ایتدیلر چاهِ زنخدانوه حسرتله نظر

مشتری اولماق ایچون بیر بیرینه ویردی خبر

توکدولر شام زلیخالری چوخ اشگِ بصر

باخدیلار حسرتیله یوسفِ بطحا یوزینه

 

عارضون صفحهء انجیلِ خداوندِ ودود

نیزه باشندا باشون دا اوخوری سورهء هود

دیه سن نیزه ایاقینده دوروب قومِ یهود

دارین اوستونده باخولّار هامی ، عیسا یوزینه

 

مظهرِ حُسنِ پیمبر رخِ آلوندی سنون

آیهء شمسِ ضحی' مِهرِ جمالوندی سنون

سورهء نونِ قلم هاشمی خالوندی سنون

کاکلون پرده چکوب لیلهء اسرا یوزینه

 

باشداکی شورِ شهادتدی سنون تاجون علی

عارضون کعبه ، حرم لر هامی حُجّاجون علی

رَفرَفون نیزه ، مبارکدی بو معراجون علی

قاشلارون قابدی قوسِین او اَدنا یوزینه

 

مه یوزون آینهء مصحف و تورات و زبور

آتشِ طورِ تجلّادی جمالوندا ظهور

مصردور شام بو قبطی لره یا وادی طور

آلِ فرعوندی گلوب باخماقا موسی' یوزینه

 

ای اولان جدّی شبیهی ، شهِ بطها بالاسی

ای گوزل لر گوزی ای خسروِ زیبا بالاسی

باش ویروب حق دانیشان وارثِ یحیی' بالاسی

اهلِ بدعتدی گلوب باخماقا یحیی' یوزینه

 

(صابرا) هر ایل عزا ساخلا علی اکبره سن

کربلاده گیدوب آغلا اول شهِ بی سره سن

گَل قیامتده بو جمعیله صفِ محشره سن

قالما حسرت ایکی دنیا بو مولا یوزینه.

 

صابر قفقازی

منبع مجموعه کانالهای مدح و مرثیه